រុស្ស៊ីឈប់បង្ហូរចរន្តអគ្គិសនីទៅបេឡារុស្ស៊ី
ការឈប់បង្ហូរនេះបានត្រូវភាគីរុស្ស៊ី ចាប់ផ្តើមប្រតិបត្តិដូចដែលខ្លួនបានព្រមានអ៊ីចឹង គឺនៅម៉ោងសូន្យកណ្តាលអធ្រាត្រយប់មិញ ពេលឆ្លងចូលថ្ងៃទី២៩មិថុនានេះ។ មូលហេតុមកពីភាគីបេឡារុស្សនៅជំពាក់បំណុលក្នុងទំហំ ៦០០លានរូប្ល ឬស្មើនឹង២១លានដុល្លារអាមេរិកចំពោះភ្លើងអគ្គិសនីរុស្ស៊ីប្រើពីមុនៗ។ រុស្ស៊ីសុំបេឡារុស្ស កុំឲ្យរកលេសនយោបាយមកនិយាយអី ពីព្រោះនេះជារឿងពាណិជ្ជកម្មរវាងក្រុមហ៊ុនឯកជនរុស្ស៊ីដែលលក់ អគ្គិសនីខ្លួនទៅឲ្យរដ្ឋបេឡារុស្សទេតើ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្រុមហ៊ុនឯកជនរុស្ស៊ីឈ្មោះ Inter ដែលបានផ្តាច់ភ្លើងនេះ បានថ្លែងថា ក្នុងករណីបើភាគីបេឡារុស្ស ផ្ទេរលុយមកសងបំណុលបានរួចរាល់ដូចចិត្តមែន នោះចរន្តអគ្គិសនីនឹងត្រូវចាប់ផ្តើមបង្ហូរឡើងវិញភ្លាមភ្លែតទៅកាន់បេឡារុស្ស។
ថ្លែងក្នុងសន្និសីទកាសែតព្រឹកថ្ងៃទី២៩មិថុនានេះ នៅទីក្រុងMinsk លោករដ្ឋមន្ត្រីក្រសួងថាមពល បេឡារុស្ស Nicolai Snopkov សង្កត់ធ្ងន់ថា “ រដ្ឋណាក៏ដោយដែលចេះគោរពខ្លួនឯង ពិតជានឹងសងបំណុលដែលខ្លួនជំពាក់ហើយបេឡារុស្ស នឹងផ្ទេរលុយសងបំណុលនេះ “។ ប៉ុន្តែគាត់មិនលំអិតឲ្យដឹងទេ អំពីកាលបរិច្ឆេតសងនោះ។
គួរកត់សម្គាល់ថា ពីក្នុងទំហំបំណុលសរុបទៅ ១.៥០០លានរូប្ល បេឡារុស្សបានផ្ទេរលុយមកសងបានពីរលើកហើយ គឺ សងអស់៩០០លានរូប្ល នៅសល់តែ ៦០០លានរូប្លប៉ុណ្ណោះ គិតតាមអត្រាសព្វថ្ងៃគឺប្រមាណ២១លានដុល្លារអាមេរិក។ ក្រុមហ៊ុនរដ្ឋបេឡារុស្ស ឈ្មោះ “ Belenergo “ ថ្លែងដោះសារថា អស់ប៉ុន្មានខែជាប់មកហើយ លើទីផ្សាររូបិយវត្ថុបេឡារុស្ស គេពិបាកទិញលុយរូប្លរុស្ស៊ី សម្រាប់សងបំណុលនោះ។
ឧបនាយករដ្ឋមន្ត្រីរុស្ស៊ីទទួលបន្ទុកខាងបញ្ហាថាមពល លោក Igor Setchin ថ្លែងថា វិធានការផ្តាច់ភ្លើងនោះ ឥតមានមូលហេតុនយោបាយអ្វីណាទេ ពីព្រោះសាច់រឿងគឺអំពីរឿងទិញ-លក់អគ្គិសនី រវាងក្រុមហ៊ុនថាមពលប៉ុណ្ណោះ។
អគ្គិសនីដែលបេឡារុស្សទិញពីរុស្ស៊ី គឺក្នុងបរិមាណ ពី៤០០ទៅ៥០០Megawatt ធានាបានតែ ១២%ប៉ុណ្ណោះនៃតម្រូវការក្នុង១ថ្ងៃៗ របស់ប្រទេសនេះ។ មកពីមូលហេតុនេះឯង បានជាក្រុមហ៊ុន “ Belenergo “ អះអាងថា ទោះបីមានការផ្អាក ឈប់ទទួលអគ្គិសនីពីរុស្ស៊ីក្តី ក៏បណ្តានបេឡារុស្សនៅតែត្រូវធានាដោយចរន្តភ្លើងនេះ បាន១០០%ដដែល។
ប្រទេសបេឡារុស្សដែលថ្នាក់ដឹកនាំគេសព្វថ្ងៃជាប់ទណ្ឌកម្មរបស់សហភាពអឺរ៉ុប មកពីអំណាចផ្តាច់ការលោកប្រធានាធិបតី Loukachenko ទៅលើបក្សប្រឆាំងកំពុងតែឆ្លងកាត់វិបត្តិដោយបំណុលក្រៅប្រទេសឡើងដល់ជាង៣២.០០០លានដុល្លារអាមេរិកទៅហើយចំណែកស្តុករូបិយវត្ថុក្នុងធនាគារជាតិ មានមិនដល់៣.០០០លានដុល្លារផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ