ចារកិច្ចដែលប៉ះពាល់ដល់ទំនាក់ទំនងរុស្ស៊ី-អាមេរិក
តុលាការសឹកក្រុងម៉ូស្គូ បានកាត់ទោស វរសេនីយឯកនៃចារកិច្ចក្រៅប្រទេសរុស្ស៊ី ឈ្មោះ Poteyev ឲ្យជាប់គុក២៥ឆ្នាំ ចំពោះការលួចឲ្យការណ៍ ទៅអាជ្ញាធរអាមេរិក លុះទាល់តែ គេចាប់បាន កាលពីកណ្តាលឆ្នាំទៅមិញ គឺពួកភ្នាក់ងាររុស្ស៊ី១០នាក់ ដែលបន្ទាប់មក ត្រូវបាន ដោះដូរ នឹងជាតិរុស្ស៊ី៤នាក់ជាភ្នាក់ងារយកការណ៍ពីរុស្ស៊ីឲ្យអាមេរិក។ ប៉ុន្តែការកាត់ទោសនេះ មានលក្ខណៈកំបាំងមុខប៉ុណ្ណោះ ដ្បិតសាមីខ្លួនបានរត់ទៅរស់នៅស.រ.អា.ទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
តាមដែលចៅក្រមតុលាការសឹករុស្ស៊ី ប្រកាសឲ្យដឹង ចំពោះអំពើក្បត់ជាតិ ឈ្មោះ Poteyev ត្រូវជាប់គុក២០ឆ្នាំ ហើយ ចំពោះការរត់ចោលមុខតំណែងខ្លួន គឺត្រូវជាប់៦ឆ្នាំទៀត ប៉ុន្តែ ជាសរុប គឺបានត្រូវកម្រិត ឲ្យជាប់២៥ឆ្នាំ។ សាលក្រមចែងថា ទាំងសក្តិជាវរសេនីយឯក ទាំងគ្រឿងឥស្សរិយយសផងទាំងឡាយ ដែលគាត់បានទទួលពេលបម្រើ ក្នុង” ស្ថាប័នចារកិច្ច ក្រៅប្រទេសរុស្ស៊ី “គឺ ត្រូវប្រកាសដកហូតពីរូបគាត់។
សេចក្តីនៃសាលក្រម ក៏លើកឡើងថា ៖
- វរសេនីយឯកនៃចារកិច្ចក្រៅប្រទេសរុស្ស៊ី ឈ្មោះ Poteyev ជាប់ពិរុទ្ធចំពោះការធ្វើឲ្យ ខូចការទៅ នូវសកម្មភាពលួចយកការណ៍នៅលើដែនដីស.រ.អា.ដែល ប្រព្រឹត្ត ដោយ ចារបុរស និង ចារនារីរុស្ស៊ី សរុបទៅ១០នាក់។ មូលហេតុ ដោយសារគាត់មាន លទ្ធភាពឃើញបញ្ជីឈ្មោះ អ្នកទាំងនោះ ហើយលួចប្រាប់ទៅពួកCIA អាមេរិក ជាថ្នូរនឹង ប្រាក់សគុណ ទាំងនៅពេល គាត់ធ្វើដំណើរនៅបរទេស ទាំងនៅពេលលួចជួបជាមួយពួកគេ ក្នុងក្រុងម៉ូស្គូ។
- ទង្វើឈ្មោះ Poteyev បាននាំឲ្យខូចយ៉ាងបង្គួរ ដល់សន្តិសុខជាតិរុស្ស៊ី។ ឈ្មោះនេះ បានជួយឲ្យCIA អាមេរិក យល់ដឹងអំពីយន្តការរបស់រុស្ស៊ី ខាងផ្តល់ហិរញ្ញប្បទានដល់ បណ្តាញភ្នាក់ងាររុស្ស៊ី ដែលដំណើរការនៅស.រ.អា.។ តាមតួលេខដែលមាន ក្រោយពីចាប់បាន ពួកភ្នាក់ងាររុស្ស៊ី ១០នាក់នោះ សមត្ថកិច្ចអាមេរិក ក៏រឹបអូសយកទាំងលុយ ប្រមាណ ៥០លានដុល្លារ ដែលមានបម្រុងទុក សម្រាប់ឧបត្ថម្ភដល់គេទាំងនោះ។
គួររំលឹកថា គឺកាលពីខែកក្កដាឆ្នាំមុន ដែលនៅទីក្រុងVienne ប្រទេសអូទ្រីស អព្យាក្រឹត មាន ប្រព្រឹត្តទៅ ប្រតិបត្តិការ ប្តូរភ្នាក់ងារចារកិច្ចរុស្ស៊ីទាំង១០នាក់នោះ ទល់នឹងជាតិរុស្ស៊ី៤នាក់ ដែលតែងបានដើរតួ ជាភ្នាក់ងារលួចយកការណ៍អស់យ៉ាងយូរពីប្រទេសរុស្ស៊ី ទៅឲ្យអាមេរិក។
ចំណែកឈ្មោះ Poteyev ផ្ទាល់ មួយថ្ងៃ មុនដល់ពេលចាប់ពួកភ្នាក់ងាររុស្ស៊ីទាំងនោះ គឺថ្ងៃ ២៥មិថុនាឆ្នាំ២០១០ ដោយមានការជួយជ្រោមជ្រែង ពីខាងស្ថានទូតអាមេរិក នៅបេឡារុស្សី និងប្រទេសអាល្លឺម៉ង់ បានឆ្លងកាត់តាមដែនដីប្រទេសទាំងនោះ ទៅកាន់ស.រ.អា.បានដូចចិត្ត។
ទីក្រុងវ៉ាស៊ីនតោន នៅតែមិនព្រមឆ្លើយតបនឹងសំណូមពរភាគីរុស្ស៊ី ដែលសុំឲ្យប្រាប់អំពី កន្លែងស្ថិតនៅ របស់ឈ្មោះ Poteyev នៅលើដែនដីសរអា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ