ខួបទី៦៦នៃមហាជ័យជំនះលើរបបណាហ្ស៊ីNaziអាល្លឺម៉ង់
បើនៅអឺរ៉ុបខាងលិច បុណ្យជ័យជំនះនេះ ត្រូវគេប្រារព្ធ គឺថ្ងៃ ៨ឧសភាម្សិលមិញនោះរុស្ស៊ីវិញ គឹនៅថ្ងៃ៩ឧសភា។ មូលហេតុមកពីក្នុងឆ្នាំ១៩៤៥ ពេលដែលមេទ័ពអាល្លឺម៉ង់នៃរបបHitler បានចុះហត្ថលេខាសុំចុះចាញ់ ក្នុងសង្គ្រាមលោកលើកទី២ នៅឯក្រុងBerlin ទ្រនិចនាឡិកា បានចង្អុលម៉ោង ១០យប់និង៤៣នាទី នៃថ្ងៃ៨ឧសភា ប៉ុន្តែសម្រាប់រុស្ស៊ីវិញ គឺវាត្រូវនឹងម៉ោង សូន្យនិង៤៣នាទីរំលង អធ្រាត្រចូលថ្ងៃ៩ឧសភាទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
សម្រាប់រុស្ស៊ី បុណ្យនេះជាបុណ្យធំបំផុត ពីព្រោះវាសឲ្យឃើញថា ជាតិរុស្ស៊ី នៅមាន អត្ថិភាពរស់រានដដែល ដ្បិតក្នុងសង្គ្រាមលោកលើកទី២ សហភាពសូវៀត មិនគ្រាន់តែចេះឈរ ទប់ខ្លួនជាប់ប៉ុណ្ណោះទេ តែថែមទាំងបានវាយបកត្រឡប់ទៅវិញ លុះទាល់តែរំដោះជាបណ្តើរៗ បណ្តាប្រជាជនទ្វីបអឺរ៉ុបខាងកើត ដែលបានធ្លាក់ទៅនៅ ក្រោមការកាន់កាប់របស់អាល្លឺម៉ង់ រហូតដល់បោះពួយទៅ ដោតទង់ជាតិខ្លួន ហៅថា”ទង់ជ័យជំនះ”លើដំបូលអគាររដ្ឋសភានៅចំកណ្តាលក្រុង Berlin ផ្ចាញ់របបណាហ្ស៊ីNazi អាល្លឺម៉ង់ឲ្យចុះចាញ់ទៅ។
អ៊ីចឹងហើយ បានជារុស្ស៊ី រៀងរាល់តែឆ្នាំ តែងប្រារព្ធបុណ្យនេះ ដោយ ព្យុហយាត្រាកងទ័ព រំលឹកដល់ឧបការគុណកងទ័ព ឧបការគុណយុទ្ធជនដែលបានពលីជីវិតក្នុងសង្គ្រាមនេះ ឧបការគុណរាល់តែអ្នកច្បាំងជើងចាស់ ដែលមានភ័ព្វសំណាងនៅរស់មកទល់សព្វថ្ងៃ ហើយ ដែលតាមប្រសាសន៍លោកប្រធានាធិបតីរុស្ស៊ី Medvedev ថ្លែងបើក ក្បួនព្យុហយាត្រាថ្ងៃនេះ បានសង្កត់ធ្ងន់ថា ពួកគេបានច្បាំង គឺដើម្បី បុព្វហេតុដ៏ថ្លៃថ្លាបំផុតរបស់ប្រជាជន គឺ “សេរីភាព និងឯករាជ្យ”។
ពីកើតមកលិច លើលំហធំល្វឹងល្វើយ នៃប្រទេសរុស្ស៊ី ព្យុហយាត្រាថ្ងៃនេះដែលរំលឹកដល់ទិវា ជ័យជំនះទី៩ឧសភា បានប្រព្រឹត្តទៅ នៅតាមក្រុង ចំនួន២៣ឯណោះ ពីក្នុងនោះធំជាងគេ គឺនៅលើទីលានក្រហមរដ្ឋធានីម៉ូស្គូ មុខវិមានក្រេមឡាំង។
ព្យុហយាត្រាដ៏មហោឡារិកនេះ បានចាប់ផ្តើមនៅម៉ោង១០ព្រឹក ដោយការលើកដង្ហែ ចូលទីលានក្រហម នូវ ”ទង់ជ័យជំនះ” ពណ៌ក្រហមឆ្អិនឆ្អៅ មានរូបញញួរនិងកណ្ឌៀវ របស់សហភាពសូវៀត។ បន្ទាប់មក គឺការដើរបោះជំហានស្រុះៗគ្នា ដោយចង្វាក់ស្វាហាប់នៃយោធាកងទ័ពទាំង៣ប្រភេទ៖ ជើងគោក ជើងទឹក ជើងអាកាស សរុបទៅ ចំនួន២ម៉ឹននាក់ ដែលតំណាងឲ្យកងកម្លាំងប្រដាប់អាវុធរុស្ស៊ីចំនួន១លាន៣សែននាក់។
តមកទៀត គឺការយាត្រាយ៉ាងកក្រើកដី នៃយានយន្តចំបាំង ចំនួន១០៦គ្រឿងស្រករថ្មីៗតំណាងឲ្យទ័ពជើងគោក តំណាងឲ្យប្រព័ន្ធការពារដែនអាកាសសម្រាប់ប្រយុទ្ធទល់នឹងកាំជ្រួចមីស្ស៊ីលធុនណាក៏ដោយ។
ព្យុហយាត្រាដែលពន្យារទៅអស់១ម៉ោងនិង៥នាទីបានចប់ទៅ ដោយការហោះកាត់ពីលើទីលាន នៃឧទ្ធម្ភាគចក្រ៥គ្រឿង ដែលនីមួយៗសុទ្ធតែពាំទៅជាមួយ គឺទង់រៀងៗខ្លួននិយាយឲ្យចំ ៖ ទង់ជាតិរុស្ស៊ីផ្ទាល់ទង់តំណាងឲ្យកងទ័ពរុស្ស៊ីទាំងមូល ទង់កងទ័ពជើងគោក ទង់កងទ័ពជើងទឹក ទង់កងទ័ពអាកាស។
ជាការកត់សំគាល់ រុស្ស៊ីបានដាក់ឈ្មោះឲ្យសង្គ្រាមកន្លងទៅនោះ ថាជា “ មហាសង្គ្រាម ការពារជាតិ “ ដែលបានពន្យារទៅ ពីឆ្នាំ ១៩៤១ ដល់១៩៤៥។ វាបានប្រព្រឹត្តទៅ គឺក្នុងបរិបទនៃសង្គ្រាមលោកលើកទី២ ដែលបានចាប់ផ្តើម គឺតាំងពីឆ្នាំ១៩៣៩ ម៉្លេះ ទំរាំចប់ទៅ នៅ ក្នុងឆ្នាំ១៩៤៥នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ