លោកប្រមុខរដ្ឋរុស្ស៊ីប្រឆាំងនឹងមូលធននិយម ក្រោមឥទ្ធិពលរដ្ឋ
ខ្លឹមសារគោលជំហរប្រឆំាងរបស់លោកប្រមុខរដ្ឋរុស្ស៊ីនេះ គឺនៅត្រង់គាត់បញ្ជាឲ្យពួកមន្ត្រីណាក្នុងរដ្ឋាភិបាលលោក Poutine ដែលខ្លះ ជាឧបនាយករដ្ឋមន្ត្រី ខ្លះជារដ្ឋមន្ត្រីសព្វថ្ងៃ កាន់ទាំងមុខតំណែងដឹកនាំនៅក្នុងក្រុមប្រឹក្សាភិបាលនៃក្រុមហ៊ុនរដ្ឋ នានាទៅផង ឲ្យដកខ្លួនចេញពីមុខតំណែងនោះ ដើម្បីកែឲ្យល្អឡើងនូវបរិយាកាសសម្រាប់ទទួលវិនិយោគពីក្រៅ បរិយាកាសដែលគាត់ចាត់ទុកថា អាក្រក់ណាស់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីទីក្រុងភ្នំពេញ
ថ្លែងម្សិលមិញ នៅក្រុង Magnitogorsk តំបន់ Siberie ក្នុងសម័យប្រជុំនៃគណៈកម្មការជាតិខាងធ្វើទំនើបកម្ម និងអភិវឌ្ឍន៍បច្ចេកវិជ្ជា លោកប្រធានាធិបតីរុស្ស៊ី Medvedev បានសំដែងនូវក្តីទោមនស្ស ដោយឃើញបរិយាកាសវិនិយោគក្នុងប្រទេសធ្លាក់ក្នុងភាពអាក្រក់ណាស់។ មូលហេតុទី១ មកពីអំពើពុករលួយដែលតាមប្រសាសន៍គាត់ ជាកត្តាច្របាច់ ក សេដ្ឋកិច្ចរុស្ស៊ី ញ៉ាំងឲ្យលុយហូរចេញពីប្រទេស។ នៅមានកត្តាផ្សេងៗទៀតបែបយ៉ាង ពន្ធហូតពីប្រាក់ចំណូលសហគ្រាស សម្រាប់យកទៅផ្គត់ផ្គង់ដល់មូលនិធិសោធននិវត្តមានកម្រិតខ្ពស់ពេក ដល់ទៅ៣៤%នៃប្រាក់ចំណូល លុះទាល់តែបណ្តាលឲ្យក្រុមហ៊ុន និងសហគ្រាសតូចតាចរែកបន្ទុកនេះមិនរួច។
ម៉្លោះហើយបានជាគាត់ផ្ទុកផ្តាក់ទៅរដ្ឋាភិបាល ឲ្យគិតគូរអំពីការបន្ទាបពន្ធនេះដែលតាមយោបល់គាត់ ចុះមកនៅត្រឹមកម្រិត២៦% ទើបសម គិតចាប់ពីដើមឆ្នាំក្រោយទៅ។ ប៉ុន្តែអ្វីដែលកាសែតក្រុងម៉ូស្គូលេខថ្ងៃនេះនាំគ្នាចាប់អារម្មណ៍ គឺវិធានការមួយគួរឲ្យភ្ញាក់ផ្អើល ប្រកាសដោយលោក Medvedev ឆ្ពោះទៅកែឲ្យល្អឡើងនូវបរិយាកាសវិនិយោគនោះ។ គាត់តម្រូវឲ្យពួកមន្ត្រីណាក្នុងរដ្ឋាភិបាលលោកPoutine ដែលខ្លះ ជាឧបនាយករដ្ឋមន្ត្រី ខ្លះជារដ្ឋមន្ត្រីសព្វថ្ងៃ កាន់ទាំងមុខតំណែងដឹកនាំនៅក្នុងក្រុមប្រឹក្សាភិបាលនៃក្រុមហ៊ុនរដ្ឋនានាទៅផង ឲ្យដកខ្លួនចេញពីមុខតំណែងនោះ ដើម្បីឈប់បង្កើតជាឧបសគ្គរាំងរាដល់ការប្រកួតប្រជែង ហើយលើកឲ្យល្អឡើងនូវបរិយាកាសវិនិយោគ។
ឧទាហរណ៍ មនុស្សរបស់លោក Poutine បែបយ៉ាង លោកឧបនាយករដ្ឋមន្ត្រី Setchin ត្រូវដកខ្លួនចេញពីតំណែងក្នុងក្រុមប្រឹក្សាភិបាលនៃក្រុមហ៊ុនរដ្ឋខាងប្រេងកាត Rosneft លោកឧបទី១នៃនាយករដ្ឋមន្ត្រី Zubkov ត្រូវចាកចេញពីតំណែងក្នុងក្រុមប្រឹក្សាភិបាលនៃក្រុមហ៊ុនរដ្ឋខាងឧស្ម័ន GazProm លោករដ្ឋមន្ត្រីក្រសួងដឹកជញ្ជូន Levitin ត្រូវដកខ្លួនពីក្រុមហ៊ុនអាកាសចរណ៍ Aeroflot។ល។ សរុបទៅជិត ១០នាក់។
តំណែងទាំងនេះ តាមយោបល់លោក Medvedev គឺនឹងត្រូវជំនួសដោយពួកអ្នកជំនាញការឯករាជ្យទៅវិញ។ ពួកនយោបាយវិទូកត់សំគាល់ថា វិធានការនេះត្រូវលោក Medvedev ចាត់ឡើងការដែលនៅសល់តែមួយឆ្នាំទៀតសោះ ដល់ពេលបោះឆ្នោតរើសប្រធានាធិបតីថ្មីលើកបន្តបន្ទាប់នៅរុស្ស៊ី។
និយាយពីទំហំវិនិយោគបរទេស សរុបនៅរុស្ស៊ី គិតមកទល់ដំណាច់ឆ្នាំ២០១០កន្លងទៅ គឺមានទឹកប្រាក់ ៣០០ពាន់លានដុល្លារអាមេរិក ធ្វើឲ្យប្រទេសរុស្ស៊ី ជាប់ត្រឹមចំណាត់ថ្នាក់ទី១៧នៅក្នុងលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ