អាមេរិកអាចធានាសន្តិសុខដល់រុស្ស៊ីតែត្រឹមកម្រិតនយោបាយ
ប៉ុន្តែអ្វីដែលរុស្ស៊ីចង់បានគឺការធានាដល់កម្រិតជាច្បាប់តែម្តង។ ការនេះមានរំលេចឲ្យឃើញជុំវិញបញ្ហាស្តីអំពី “ ប្រព័ន្ធខែលមីស្ស៊ីលប្រឆាំងមីស្ស៊ីល “ ដែលបានក្លាយទៅជាកម្មវត្ថុមួយសំខាន់បំផុតនៃកិច្ចចរចាធ្វើនៅម៉ូស្គូម្សិលមិញ ដោយរដ្ឋមន្ត្រីការពារប្រទេសអាមេរិក លោកRobert Gates ជាមួយលោកប្រធានាធិបតីរុស្ស៊ី Dmitri Medvedev និងលោករដ្ឋមន្ត្រីការពារជាតិរុស្ស៊ី Anatoly Serdiukov។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
ជាបឋម គួរនិយាយថា រុស្ស៊ីតែងចាត់ទុក “ប្រព័ន្ធខែលមីស្ស៊ីលប្រឆាំងមីស្ស៊ីល” ដែលអាមេរិកគ្រោងបង្កើតនៅទ្វីបអឺរ៉ុប ថាពាំនាំជាគ្រោះថ្នាក់ដល់សន្តិសុខខ្លួន។
ដោយហេតុថា កិច្ចចរចានោះ ប្រព្រឹត្តទៅក្នុងលក្ខណៈបិទទ្វារជាអសាធារណៈបានជាលទ្ធផលជុំវិញសាច់រឿងដែលមានអាចត្រូវគេដឹងឮគឺតាមរយៈសម្ភាសន៍ដែលម្ខាងៗបានឲ្យទៅមធ្យោបាយឃោសនាមហាជនលុះក្រោយពីកិច្ចចរចានោះបានចប់ទៅហើយ។
ក្នុងសម្ភាសន៍ទៅទីភ្នាក់ងារពត៌មាន Interfax លោក Robert Gates បានថ្លែងថា៖ស.រ.អា.អាចផ្តល់ដល់ភាគីរុស្ស៊ី គឺតែការធានាត្រឹមជាន់ថ្នាក់នយោបាយប៉ុណ្ណោះដែលតាមយោបល់អាមេរិកគឺគ្រប់គ្រាន់ទៅហើយដើម្បីញ៉ាំងរុស្ស៊ីឲ្យជឿជាក់ប្រាកដក្នុងចិត្តថាក្នុងបំណងអាមេរិកគឺគ្មានទិដ្ឋភាពអ្វីណាដែលគំរាមដល់សន្តិសុខរុស្ស៊ីឡើយ។
តាមប្រសាសន៍លោករដ្ឋមន្ត្រីការពារជាតិអាមេរិកការធានាតាមផ្លូវច្បាប់គឺច្បាស់ជាមិនអាចធ្វើទៅកើតពីព្រោះ” អនាគតខែលមីស្ស៊ីល”នោះឥតតម្រង់ប្រឆាំងនឹងរុស្ស៊ីឯណា។
លោក Robert Gates យោងទៅលើទឡ្ហីករណ៍ដែលថា ច្បាប់នីមួយៗពិបាកទទួលការអនុម័តណាស់ដោយសមាជសភា ឧទាហរណ៍ សូម្បីតែសន្ធិសញ្ញាចុះជាមួយប្រទេសជាសម្ព័ន្ធមិត្តដ៏ជំនិតរបស់អាមេរិក បែបយ៉ាង អង់គ្លេស និងអូស្ត្រាលី គឺបានទាមទាររយៈពេលអស់៥ឆ្នាំ ទម្រាំត្រូវបានសភាអាមេរិកឲ្យសច្ចាប័ន។
ក្នុងសម្ភាសន៍ទៅInterfaxដែរតំណាងរបស់វិមានក្រេមឡាំង បានថ្លែងអំពីភាពចាំបាច់ត្រូវមានការធានា ដោយច្បាប់ដែលចែងជាលាយល័ក្ខអក្សរអំពីការធានានេះ ដ្បិត ៖
ទី១-បញ្ហាបែបនេះមិនអាចដោះស្រាយតែដោយសេចក្តីថ្លែងការណ៍នៃពួកអ្នកនយោបាយឡើយ។
ទី២-បើថ្ងៃនេះគេធ្វើសេចក្តីប្រកាសនយោបាយមួយលុះថ្ងៃស្អែកអ្នកនយោបាយផ្សេងឡើងមកកាន់អំណាចសេចក្តីប្រកាសនយោបាយនោះឯងអាចត្រូវកែប្រែនិងថែមទាំងលែងមានសុពលភាពទៅផង។
តំណាងនោះលំអិតថា រុស្ស៊ីត្រៀមដោះស្រាយជាមួយដៃគូខ្លួននូវភារកិច្ចរួមខាងការពារទ្វីបអឺរ៉ុបឲ្យផុតពីការវាយប្រហារជាយថាហេតុនៃកាំជ្រួចមីស្ស៊ីលដោះស្រាយដោយឈរលើការគោរពតាមគោលការណ៍៖
-មិនតម្រង់កាំជ្រួចមីស្ស៊ីលរបស់ម្ខាងទៅលើម្ខាង។
-សន្តិសុខស្មើភាពគ្នា
-សន្តិសុខរបស់ម្ខាងមិនត្រូវនាំឲ្យខូចដល់សន្តិសុខរបស់ម្ខាងទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ