ខួបកំណើត៨០ឆ្នាំនៃលោក Gorbatchev ល្បីខាងធ្វើកំណែទម្រង់សហភាពសូវៀត
ជុំវិញរូបអ្នកនយោបាយនេះដែលបានកាន់អំណាចពីខែឧសភាឆ្នាំ១៩៨៥ដល់ខែធ្នូឆ្នាំ១៩៩១គឺលុះដល់ពេលដែលសហភាពសូវៀតរលំរលាយទៅ មានមតិពីរផ្ទុយពីគ្នា៖ បើនៅបស្ចិមលោកគេចាត់ទុករូបគាត់ថាជាឥស្សរជនប្រវត្តិសាស្ត្រដ៏វិសេសវិសាលដែលផ្តល់នូវសេរីភាពដល់ពលរដ្ឋខ្លួន នោះក្នុងប្រទេសវិញមានបន្លឺឡើងទាំងការដាក់បណ្តាសាលើរូបគាត់ទៅវិញ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
ពិតជារូបលោក Gorbatchev ដែលបានធ្វើឲ្យពិភពលោកស្គាល់ពាក្យរុស្ស៊ីថា Perestroika ដែលន័យរបស់វា គឺរុះរើសាងសង់ឡើងវិញ កែប្រែមុខមាត់ប្រទេសឲ្យបានថ្មី។
នៅតាមមុខព្រួញនេះ ខាងផ្នែកនយោបាយក្រៅប្រទេស លោក Gorbatchev បានខ័ណ្ឌបញ្ចប់ “សង្គ្រាមត្រជាក់” ជាមួយលោកខាងលិច ឧទាហរណ៍ក្នុងឆ្នាំ១៩៨៩ បានអន្តរាគមលុះទាល់តែ ប្រទេសអាល្លឺម៉ង់ខាងលិចលេបអាល្លឺម៉ង់ខាងកើតកុម្មុយនិស្តចូលគ្នាជាសាច់មួយតាមរយៈការផ្តួលរំលំទៅនៃជញ្ជាំងក្រុងBerlin។ ក្នុងឆ្នាំ១៩៨៩នោះដែរ លោក Gorbatchev ក្រោមសម្ពាធបស្ចិមលោក បានដកចេញពីប្រទេសAfghanistanមកវិញ នូវកងទ័ពសូវៀតដែលបានលុកចូលទៅទីនោះកាលពី១០ឆ្នាំមុន។ សូម្បីតែឈ្មោះលោក Gorbatchev ក៏ត្រូវបណ្តាជននៅតាមប្រទេសខាងលិចស្វាគមអបអរគាត់តាមStyleខាងលិចថា Gorbi Gorbi ពេលគាត់បំពេញទស្សនកិច្ចនៅទីនោះ។
ចំណែកមតិក្នុងប្រទេសវិញ ជាពិសេសក្នុងចំណោមជនកុម្មុយនិស្ត និងពួកជាតិនិយមគឺចោទគាត់ថា “ លក់មាតុភូម៌សូវៀត “ ឲ្យលោកខាងលិច។ គេថា លោក Gorbatchev ដោយទន់ត្រចៀកតាមការបញ្ចើចបញ្ជោរ គឺចាញ់បោកលោកខាងលិចតែម្តងលុះទាល់តែបណ្តោយឲ្យ “ អង្គការកតិកាសញ្ញាVarsovie “ នាំមុខដោយសហភាពសូវៀតរលំរលាយទៅ ប៉ុន្តែក្នុងពេលជាមួយគ្នានេះវិញ បក្សសម្ពន្ធ OTAN ដែលនាំមុខដោយស.រ.អាមិនគ្រាន់តែមិនរំសាយដូចការសន្យាឡើយ តែបែរទៅជាកាន់តែរីករាលដាលធំទៅទៀត។
ក្នុងសម្ភាសន៍នៅឱកាស ខួបកំណើត៨០ឆ្នាំរបស់ខ្លួន លោក Gorbatchev បានលើកឡើងពីគុណូបការៈគាត់ខាងនយោបាយក្នុងប្រទេសបែបយ៉ាងបង្កើតឲ្យមានប្រព័ន្ធពហុបក្សក្នុងប្រទេស ឲ្យមានសេដ្ឋកិច្ចទីផ្សារសេរីទទួលស្គាល់កម្មសិទ្ធិឯកជនសេរីភាពបញ្ចេញមតិ។
លោក Gorbatchev ក៏បានរិះគន់ថ្នាក់ដឹកនាំរុស្ស៊ីបច្ចុប្បន្ន ចំពោះការមានជំនឿទុកចិត្តលើខ្លួនឯងជ្រុលដូចកាលពីសម័យមួយ គាត់ធ្លាប់មានជំនឿទុកចិត្តលើខ្លួនគាត់ជ្រុលយ៉ាងហ្នឹងដែរ លុះទាល់តែប្រទេសរលំរលាយទៅដោយមិនដឹងខ្លួន ហើយដែលចំពោះការរលាយសាបសូន្យទៅនេះគាត់សោកស្តាយជាពន្លឹក។
សព្វថ្ងៃលោក Gorbatchev ជាប្រធាននៃ “ មូលនិធិនាម Gorbatchev “ ផ្ទាល់ដែលជា អង្គការអន្តរជាតិក្រៅរដ្ឋាភិបាលធ្វើការស្រាវជ្រាវបញ្ហាសង្គម-សេដ្ឋកិច្ចនិងនយោបាយ។ គាត់ក៏ជាសហកម្មសិទ្ធិករនៃកាសែតប្រឆាំងឈ្មោះ Novaya Gazeta។
តាមប្រសាសន៍លោក Gorbatchev គាត់បានអញ្ជើញ “ គ្រប់តែមេដឹកនាំធំៗ និងសំខាន់ៗបំផុត “ ចំនួន៣០០នាក់ឲ្យចូលរួមក្នុងពិធីប្រារព្ធល្ងាចថ្ងៃនេះខួបកំណើត៨០ឆ្នាំរបស់គាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ