រុស្ស៊ីត្រូវបង់ខាតអស់ប្រមាណ ៤.០០០លានដុល្លារអាមេរិក
រុស្ស៊ីត្រូវបង់ខាតអស់ប្រមាណ ៤.០០០លានដុល្លារអាមេរិក ដោយហេតុតែខ្លួនបានបោះឆ្នោតគាំទ្រសំឡេងរួមតែមួយ នូវសេចក្តីសម្រេចចិត្តរបស់ក្រុមប្រឹក្សាសន្តិសុខ អ.ស.ប. ដែលចំណុចមួយ គឺហាមមិនឲ្យលក់អាវុធទៅឲ្យរបបកាដាហ្វីនៅលីប៊ី។ ជាមួយរបបកាដាហ្វី រុស្ស៊ីបានចុះទៅហើយ កុងត្រាតម្លៃ ២.០០០លានដុល្លារ និងគ្រោងចុះទាំងកុងត្រា ១.៨០០លានដុល្លារទៀត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ
ក្នុងចំណោមប្រទេសតំបន់ដើមបូព៌ា និងអាហ្វ្រិកខាងជើង លីប៊ី ជាអតិថិជនមួយដ៏ធំបំផុតទិញអាវុធពីរុស្ស៊ី តាំងពីជំនាន់សហភាពសូវៀតមក។ កុងត្រាតម្លៃ ២.០០០លានដុល្លារនោះ មានចុះកាលពីខែមករាឆ្នាំទៅមិញ ពេលដែលលោករដ្ឋមន្ត្រីការពារជាតិលីប៊ី Yunis Jaber បានទៅបំពេញទស្សនកិច្ចនៅក្រុងម៉ូស្គូ។ ស្របនឹងកុងត្រានេះ លីប៊ីទិញពីរុស្ស៊ី គឺកាំភ្លើងបាញ់ច្រើនសន្ធឹកសន្ធាប់ យន្តហោះយោធាធុន Yak-១៣០ ចំនួន៦គ្រឿងសម្រាប់ធ្វើការហោះហ្វឹកហាត់ រថក្រោះ និងរថពាសដែកប្លែកៗមួយចំនួនធំ ព្រមទាំងគ្រឿងបន្លាស់សម្រាប់សព្វាវុធដែលមានទិញពីរុស្ស៊ីសម័យមុនៗ។
ចំណែកកុងត្រាតម្លៃ ១.៨០០លានដុល្លារដែលគូភាគីនិយាយជិតត្រូវគ្នា ដើម្បីចុះវាតែម្តង គឺ ទីមួយ៖ លីប៊ីក្លាយជារដ្ឋបរទេសទី១ ដែលរុស្ស៊ីនឹងលក់ទៅឲ្យ គឺយន្តហោះស្រករទី៥ សំរាប់បំពេញប្រតិបត្តិការប្រយុទ្ធពហុបែប ធុន SU-៣៥ ចំនួនពី ១២ ទៅ១៥គ្រឿងតម្លៃ ៨០០លានដុល្លារ។ ទីពីរ៖
គឺឧទ្ធម្ភាគចក្រចំបាំង Serie ថ្មី ធុន Ka-៥២ មិនតិចជាង១០គ្រឿងឡើយ ប្រព័ន្ធមីស្ស៊ីលការពារដែនអាកាសឈ្មោះ “ ស្នូកអណ្តើក “ ចំនួន ៤០ប្រព័ន្ធ ព្រមទាំងប្រព័ន្ធមីស្ស៊ីលការពារដែនអាកាសធុន S-៣០០ ចំនួន២ប្រព័ន្ធ ទាំងអស់តម្លៃ ១.០០០លានដុល្លារ។
ក្នុងផែនការលីប៊ីក៏មានទាំងគម្រោងទិញពីរុស្ស៊ី គឺប្រព័ន្ធមីស្ស៊ីលការពារដែនអាកាសធុន S-៤០០ រថក្រោះទំនើបផុតលេខធុន T-៩០ នាវាមុជទឹក កាណូតបំពាក់ដោយ Roquettes ល្បឿនលឿនឈ្មោះ “ ផ្លេកបន្ទោរ “។ ដោយគោរពតាមសេចក្តីសម្រេចរបស់ក្រុមប្រឹក្សាសន្តិសុខ អ.ស.ប. រុស្ស៊ីត្រូវព្យួរទុក ដោយឥតកំណត់ពេល កុងត្រាលក់អាវុធដែលមានចុះទៅហើយជាមួយលីប៊ី កុំថាដល់ទៅចុះកិច្ចសន្យាថ្មីៗ។ សំរាប់រុស្ស៊ីសម័យបច្ចុប្បន្ន កិត្តិនាមលើឆាកអន្តជាតិ គឺមានតម្លៃថ្លៃជាងការបង់ខាត តែប៉ុន្មានពាន់លានដុល្លារអាមេរិក។
គួររំលឹកថា ក្នុងចន្លោះពីឆ្នាំ១៩៨១ ដល់១៩៨៥ សហភាពសូវៀតបានលក់ទៅឲ្យលីប៊ី គឺយន្តហោះចំបាំង ៣៥០គ្រឿង រថក្រោះ៤.០០០គ្រឿង ប្រព័ន្ធការពារដែនអាកាសមួយចំនួនធំ ព្រមទាំងនាវាចំបាំងប្លែកៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ