ក្នុង១០ឆ្នាំទៅមុខចំណាយ ៧០០.០០០លាន$ សម្រាប់បំពាក់អាវុធកាន់តែទំនើប
រឿងនេះ ទើបប្រកាសជាផ្លូវការ ដោយក្រសួងការពារជាតិរុស្ស៊ី ទាំងលំអិតថា កម្មវិធីរដ្ឋខាងទិញសព្វាវុធថ្មីៗ សម្រាប់បំពាក់កងទ័ព បានត្រូវចុះហត្ថលេខា ដោយលោក ប្រធានាធិបតី Medvedev កាលពីថ្ងៃ៣១ធ្នូឆ្នាំ២០១០កន្លងទៅ។ លោក Medvedev ក៏បានអំពាវនាវ ឲ្យធ្វើទំនើបកម្ម ប្រព័ន្ធរោងចក្រយោធា នៅរុស្ស៊ី តាមគំរូអាមេរិកាំងផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយាពីទីក្រុង ម៉ូស្គូ
ថ្លែងល្ងាចម្សិលមិញ ក្នុង” សមាគមអ្នកកាសែតក្រុងម៉ូស្គូ “ លោកអនុទី១នៃរដ្ឋមន្ត្រីក្រសួងការពារជាតិ Vladimir Popovkin បានរៀបរាប់ថា ពីក្នុងទឹកប្រាក់ ៧០០.០០០លានដុល្លារអាមេរិកនោះ ១០% គឺ នឹងត្រូវចំណាយទៅ សំរាប់ធ្វើការស្រាវជ្រាវដើម្បីផលិតអាវុធថ្មីៗ , ៨០% គឺសម្រាប់ធ្វើកុំម្ម៉ង់ទិញអាវុធផ្ទាល់ ហើយ១០%ទៀត គឺសម្រាប់ជួសជុលកែឲ្យទំនើបឡើងអាវុធដែលមានសព្វថ្ងៃ។
ទៅទល់ឆ្នាំ២០២០ អាវុធទំនើប ដែលត្រូវទិញ ពីឧស្សាហកម្មជាតិសម្រាប់ បំពាក់ថែមទៀតគឺ៖
- នាវាចំបាំងថ្មីៗ ១០០គ្រឿង ក្នុងនោះមាន នាវាមុជទឹកបរមាណូស្រករចុងក្រោយ គឺស្រករទី៥ ចំនួន ២០គ្រឿង បំពាក់ទៅដោយកាំជ្រួចមីស្ស៊ីលអន្តរទ្វីប។
ទាក់ទងនឹងរឿងនាវា លោក Popovkin ដោយឆ្លើយនឹងសំណួរអ្នកកាសែត បានបញ្ជាក់ថា រុស្ស៊ី បានកុំម្ម៉ង់ទិញមែន ពីបារាំង គឺនាវាផ្ទុកឧទ្ធម្ភាកចក្រធុន Mistral ចំនួន៤គ្រឿង ពីក្នុងនោះ ២គ្រឿង នឹងសង់បានរួចនៅឯការដ្ឋានសំណង់ស្រុកបារាំងទៅទល់ឆ្នាំ ២០១៤ លុះបន្ទាប់មក ២គ្រឿងទៀត នឹងត្រូវសង់ឡើង នៅការដ្ឋានរុស្ស៊ីផ្ទាល់ ប៉ុន្តែ តាមអាជ្ញាប័ណ្ណបារាំង។
- យន្តហោះចំបាំងថ្មីៗ ៦០០គ្រឿង។
- ឧទ្ធម្ភាគចក្រថ្មីៗ ជាង ១.០០០គ្រឿង ពីក្នុងនោះ ជាង ១០០គ្រឿង គឺនឹងត្រូវបំពាក់ដល់ កងអាកាសរុស្ស៊ី ក្នុងឆ្នាំនេះតែម្តង។
- ប្រព័ន្ធមីស្ស៊ីលការពារដែនអាកាស ចំនួន ១០០ប្រព័ន្ធ៖ ពីក្នុងនោះ ១០ប្រព័ន្ធ គឺ អាធុន S-500 ដែល នឹងមានផលិតបាននៅឆ្នាំ ២០១៣ សំរាប់បន្ថែមទៅលើ អាធុន S-400 សែនទំនើបស្រាប់ទៅហើយ ដែលរុស្ស៊ីដាក់ឲ្យប្រចាំការសព្វថ្ងៃ បានចំនួន៤ប្រព័ន្ធ។ ដោយហេតុថា ប្រព័ន្ធនិមួយៗ មានទីតាំងបង្ហោះដល់ទៅ៤ បានជាសរុបទៅ គឺនឹង មានចំនួនទីតាំងបង្ហោះនោះ ដល់៥៦ ដែលនឹង គ្របជិតស្លុង ផ្ទៃមេឃទូទាំងប្រទេសរុស្ស៊ី។
សូម្បី តែ អាធុន S-300 ដែលប្រទេសអៀរ៉ង់ លេបទឹកមាត់ចង់បានក្រៃ ក៏ មិនសម្រេចបានដូចចិត្តឯណា។
ទាក់ទងនឹងកាំជ្រួចមីស្ស៊ីលអន្តរទ្វីបឈ្មោះ Topol រុស្ស៊ីនឹងផលិតវា គឺអាធុនដែលនឹងដើរដោយ ឥន្ធនៈ” រឹង” ដែលនឹងបម្រើការបានដល់ ៣៥ឆ្នាំ ហើយពាំផ្ទុកក្បាលរំសេវនុយក្លេអ៊ែរប្រយុទ្ធ ដល់១០ក្បាល មិនមែនត្រឹម៣ក្បាលដូចអាធុន ដើរដោយ ឥន្ធនៈ “ រាវ “ សព្វថ្ងៃ ហើយដែល អាច បម្រើការត្រឹម២០ឆ្នាំប៉ុណ្ណោះ។
ស្របនឹងអនុសាសន៍ លោក ប្រធានាធិបតី Medvedev ក្នុងដំណើរស្រាវជ្រាវផលិតអាវុធ ដើម្បីដណ្តើមនូវសមត្ថភាពប្រជែងកម្រិតខ្ពស់ រុស្ស៊ីគប្បីបង្កើតឡើងជា រចនាសម្ព័ន្ធម្យ៉ាង តាមModele អាមេរិកាំង ជាទីដែល នៅអម មន្ទីរបញ្ចកោណ កំពុងដំណើរការយ៉ាងជោគជ័យ គឺ“ ទីភ្នាក់ងារអាមេរិកាំងឈ្មោះ DARPA ដែលទទួលខុសត្រូវចំពោះ ការតាក់តែងបច្ចេកវិជ្ជា ថ្មីៗឈានមុខ សម្រាប់លើកយកមកប្រើ ក្នុងកងកម្លាំងប្រដាប់អាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ