ទីក្រុងម៉ូស្គូនិងតូក្យូតឹងសរសៃដាក់គ្នាមកពីបញ្ហាកោះKouriles
ការជល់សំដីគ្នានេះបានឡើងដល់កម្រិតខ្លាំងមែនទែនគឺនាថ្ងៃ៧កុម្ភៈម្សិលមិញដែលនៅជប៉ុនត្រូរគេប្រារព្ធក្នុងឋានៈជា “ ទិវាដែនដីខាងជើង“។ ពាក្យថាដែនដីខាងជើងនេះសំរាប់ជប៉ុនគឺមានន័យថា កោះ៤នៃជួរ”កោះគូរីលខាងត្បូង”ដែលស្ថិតនៅប៉ែកខាងជើងនៃកោះHokkaido ជាកោះខាងជើងបង្អស់របស់ជប៉ុន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
ថ្លែងក្នុងមីទិញចូលរួមដោយពួកអ្នកជាតិនិយមដៃដល់ផុតលេខ ប្រមាណ១.៥០០នាក់ នៅពីមុខស្ថានទូតរុស្ស៊ីក្នុងក្រុងតូក្យូដែលនាំគ្នាស្រែកទាមទារលាន់រំពងឲ្យរុស្ស៊ីប្រគល់ទៅជប៉ុនវិញនូវកោះ៤ នៃជួរ”កោះគូរីលខាងត្បូង”នោះ។ លោកនាយករដ្ឋមន្ត្រីជប៉ុន Naoto Kan បានចង្អុលឲ្យឃើញថា៖ ទស្សនកិច្ចធ្វើកាលពីថ្ងៃទី១វិច្ឆិកាឆ្នាំទៅមិញ ដោយលោកប្រធានាធិបតីរុស្ស៊ី Medvedev នៅឯកោះមួយពីក្នុងចំណោមកោះទាំង៤នោះ គឺជា “អំពើដ៏កំរោលដែលមិនអាចអនុញ្ញាតទៅកើត”។
ជាប្រតិកម្មបកវិញភ្លាមភ្លែតរដ្ឋមន្ត្រីការបរទេសរុស្ស៊ី លោក Serguei Lavrov សង្កត់ធ្ងន់ថា៖ សេចក្តីថ្លែងការណ៍នោះរបស់ប្រមុខរដ្ឋាភិបាលជប៉ុន មិនមានលក្ខណៈការទូត ទេ។ លោកNaoto Kann ដែលខំបន្លឺឡើងជាសេចក្តីថ្លៃងការណ៍បែបនេះគឺច្បាស់ជាដើម្បី ផ្គាប់យកចិត្តពួកអ្នកជាតិនិយមជ្រុលនៃប្រទេសខ្លួន។
ចំណែកវិមានក្រេមឡាំងតាមរយៈសេចក្តីថ្លែងការណ៍នៃជំនួយការប្រមុខរដ្ឋរុស្ស៊ីខាងកិច្ចការអន្តរជាតិ លោក serguei Prikhodko បានប្រកាសថា៖ប្រធានាធិបតីរុស្ស៊ី លោក Medvedev ទាំងក្នុងថ្ងៃមុខនឹងបន្តធ្វើដំណើរតទៅទៀតទៅកាន់កោះ៤នៃជួរ"កោះគូរីលខាងត្បូង"នោះ ដ្បិតការធ្វើដំណើរទៅកាន់តំបន់ណាក៏ដោយនៃទឹកដីរុស្ស៊ីគឺជាសិទ្ធិរបស់ប្រមុខរដ្ឋដោយមិនចាំបាច់សួរយោបល់អ្នកក្រៅទេ។ នាពេលចុងក្រោយតាមការផ្ទុកដាក់របស់លោក Medvedev មានអ្នកមុខអ្នកការជាន់ខ្ពស់រុស្ស៊ីបូកទាំងរដ្ឋមន្ត្រីការពារជាតិរុស្ស៊ីផងបានធ្វើដំណើរជាបន្តបន្ទាប់ទៅកាន់កោះគូរីលខាងត្បូងរួចមួយលើកៗតែងញ៉ាំងឲ្យមានការប្រឆាងយ៉ាងក្តួលក្តៅពីខាងក្រុងតូក្យ៉ូ។
គួរនិយាយថា ក្នុងមីទិញនៅក្រុងតូក្យ៉ូម្សិលមិញពួកអ្នកជាតិនិយមជប៉ុនថែមទាំងបានប្រញ៉ាយគ្នាហែកចោលទៅផងទង់ជាតិត្រីពណ៌របស់រុស្ស៊ីហែកដោយចងកំហឹងតែម្តង។ ចំពោះទង្វើប្រមាថនេះ ស្ថានទូតរុស្ស៊ីនៅក្រុងតូក្យ៉ូបានផ្ញើកំណត់ទូតតវ៉ាជាបន្ទាន់ទៅកាន់ក្រសួងការបរទេសជប៉ុន។
ព្រឹកមិញស្ថានទូតរុស្ស៊ីនៅក្រុងតូក្យ៉ូស្រាប់តែបានទទួលសំបុត្រមួយច្បាប់ដែលនៅខាងក្នុងស្រោមសំបុត្រនោះមានលាក់ទាំងគ្រាប់កាំភ្លើងមួយគ្រាប់ផងអមទៅដោយពាក្យទាមទារឲ្យរុស្ស៊ីប្រគល់ទៅជប៉ុនវិញនូវកោះ៤នៃជួរ”កោះគូរីលខាងត្បូង”។
មិនមែនចៃដន្យទេដែលតាំងពីឆ្នាំ១៩៨១មក នៅជប៉ុន ថ្ងៃទី៧កុម្ភៈតែងត្រូវពួកអ្នកជាតិនិយមលើកជា “ ទិវាដែនដីខាងជើង “ របស់ខ្លួនពីព្រោះពិតជាថ្ងៃនេះឯងដែលក្នុងឆ្នាំ១៨៥៥ ស្របនឹងសន្ធិសញ្ញាដំបូងបង្អស់ចុះរវាងចក្រភពរុស្ស៊ីនិងជប៉ុនស្តេច Tsar រុស្ស៊ី បានផ្ទេរទៅឲ្យជប៉ុននូវកោះ៤នៃជួរកោះគូរីលខាងត្បូង ប៉ុន្តែក្រោយពីជប៉ុនចាញ់សង្គ្រាមលោកលើកទី២ក្នុងឆ្នាំ១៩៤៥មក កោះទាំងនេះដែលមានផ្ទៃក្រឡាសរុប៥.០០០គម ២ សព្វថ្ងៃរស់នៅដោយបណ្តាជនប្រមាណ២ម៉ឺននាក់ក៏បានឆ្លងមកជាកម្មសិទ្ធិរុស្ស៊ីវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ