ទស្សនកិច្ចលោកប្រធានាធិបតីរុស្ស៊ីMedvedevនៅប៉ាឡេស្ទីន
គោលដៅធំចំបងនៃទស្សនកិច្ចថ្ងៃនេះរបស់ប្រមុខរដ្ឋរុស្ស៊ីនៅលើ ដែនដីPalestineគឺផ្តល់សន្ទុះថ្មីដល់អភិក្រមសន្តិភាពឆ្ពោះទៅស្តារ ឡើងវិញកិច្ចចរចាPalestine-Israel។ ជាលទ្ធផលក៏នឹងមានចុះឯកសារមួយចំនួនបែបយ៉ាងវិស័យកសិកម្មនិងផ្នែក ពត៌មាន។ ស្អែកលោកប្រធានាធិបតីរុស្ស៊ី Medvedev នឹងបន្តដំណើរទស្សនកិច្ចទៅកាន់ប្រទេស Jordanie។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
ជាបឋមគួរនិយាយថា រុស្ស៊ីតាំងពីជំនាន់សហភាពសូវៀតមក តែងស្ថិតនៅខាងការតស៊ូរបស់ប្រជាជនPalestineដើម្បីបង្កើតឡើងជារដ្ឋរបស់គេផ្ទាល់។ គឺតាំងពីឆ្នាំ១៩៧៤ម៉្លេះដែលសហភាពសូវៀតបានចងទំនាក់ទំនងការទូតជាមួយ“ អង្គការរំដោះ Palestine “ ហើយបានបើកស្ថានទូតរបស់អង្គការនេះ ឲ្យប្រចាំនៅក្រុងម៉ូស្គូតែម្តង។ ស្ថានទូតនេះ តាំងពីឆ្នាំ១៩៩០មក បានប្រែឈ្មោះ ទៅជា “ ស្ថានទូតរដ្ឋPalestine “។
ទោះបីសហភាពសូវៀតបានរលាយទៅក្នុងឆ្នាំ១៩៩១ក្តី ក៏ប្រទេសរុស្ស៊ីសម័យថ្មី ដែលបន្តកេរពីសហភាពនេះនៅតែប្រកាន់ខ្ជាប់មាគ៌ាសាមគ្គីជាមួយប្រជាជន Palestine។ គ្រាន់តែក្នុងចន្លោះឆ្នាំ ២០០៥ ដល់២០១០ ប្រធានាធិបតីរុស្ស៊ីបានធ្វើជំនួបក្នុងជាន់ថ្នាក់កំពូល អស់៨លើកទៅហើយ ជាមួយប្រមុខនៃ”ដែនដីស្វយ័ត Palestine” គឺលោក Mahmoud Abbas។
ក្នុងជំនួបលើកនេះ ជាមួយមេដឹកនាំ Palestine ប្រធានាធិបតីរុស្ស៊ី លោក Medvedev បញ្ជាក់ជាថ្មី ថា ទីក្រុងម៉ូស្គូ នឹងបន្តគាំទ្រតាមគ្រប់មធ្យោបាយដល់ប្រជាជនPalestine ឲ្យគេសំរេចបាននូវក្តីប្រាថ្នាជាអាយុជីវិតរបស់គេ គឺបង្កើតឡើងជារដ្ឋឯករាជ្យ មានសមត្ថភាពរស់រាន និងមានរដ្ឋធានី គឺក្រុងJerusalem ប៉ែកខាងកើត ដែលរួមរស់ក្នុងសុខសន្តិភាពជាមួយរដ្ឋIsrael។
នៅតាមមុខព្រួញនេះ នាកិច្ចចរចាជាមួយសមភាគី Palestine លោកប្រមុខរដ្ឋរុស្ស៊ីនឹងខិតខំប្រោះឲ្យរស់ឡើងវិញ ការងាររបស់ចតុអន្តរការីអន្តរជាតិខាងស្វែងរកដំណោះស្រាយឲ្យស្ថានការណ៍ដ៏សាំញ៉ាំនៅតំបន់ដើមបូព៌ាពោលគឺសហភាពអឺរ៉ុបរុស្ស៊ី ស.រ.អា. អ.ស.ប។ ពិតជា ចតុអន្តរការីទាំងនេះ ដែលកាលពីដើមខែកញ្ញាឆ្នាំ២០១០ចេះបង្វែរឲ្យIsraelនិងPalestineវិលត្រឡប់វិញមកក្នុងអភិក្រមសន្តិភាពនៅតំបន់ដើមបូព៌ា។ ប៉ុន្តែដោយមកពី Israel ពុំព្រមបញ្ឈប់ការសាងសង់ភូម៌ករអាណានិគមជាតិ Juif នៅសង្កាត់អារ៉ាប់ នៃក្រុងJerusalem បានជាកិច្ចចរចា Israel-Palestine បានអាក់ខានទៅវិញ។ ចំណុចសំខាន់មួយទៀត ដែលភាគីរុស្ស៊ីចង់សំរេចឲ្យបាន គឺស្តារឡើងវិញ ឯកភាពPalestine និងស្ថានការណ៍ជុំវិញតំបន់ Gaza ដែលស្ថិតនៅក្រោមការគ្រប់គ្រងរបស់ចលនា Hamas។ តាមយោបល់រុស្ស៊ី សហគមន៍អន្តរជាតិត្រូវតែគន់គិតទាំងគោលជំហររបស់អង្គការនេះ ពីព្រោះ Hamas តំណាងឲ្យបណ្តាជនម្ចាស់ឆ្នោតPalestineមួយភាគដែរ។
ចំណែករុស្ស៊ីដែលផ្តល់ជំនួយខ្លួនគឺសម្រាប់ប្រជាជន Palestine ទាំងមូល។ តាំងពីកណ្តាលទសវត្សទី៧០ម៉្លេះ រុស្ស៊ីតែងជួយបណ្តុះបណ្តាល ពួកអ្នកឯកទេសPalestine នៅតាមគ្រឹះស្ថានឧត្តមសិក្សាខ្លួនខាងផ្នែកវិស្វកម្ម មហាផ្ទៃសន្តិសុខ សេដ្ឋកិច្ច កសិកម្មជាដើម។ បច្ចុប្បន្ន មានសិក្ខាកាម Palestine ៦០នាក់ កំពុងធ្វើការសិក្សានៅបណ្ឌិតសភាការទូតរបស់ក្រសួងការបរទេសរុស្ស៊ី។ ឆ្នាំ២០០៦ ឆ្នាំ២០០៨ ឆ្នាំ២០១០ រុស្ស៊ី បានផ្តល់ទៅPalestineនូវជំនួយហិរញ្ញវត្ថុមួយលើកៗ គឺ១០លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ