ម៉ូស្គូនិងវ៉ាស៊ីនតោនជល់សំដីគ្នាមកពីមេបក្សប្រឆាំងម្នាក់នៅរុស្ស៊ីជាប់ឃុំឃាំង១៥ថ្ងៃ
តបនឹងការទិតៀនពីខាងក្រសួងការបរទេសអាមេរិក ចំពោះការកាត់ទោសដោយសាលាលហុនៃទីក្រុងម៉ូស្គូឲ្យរូបលោក Boris Niemtsov ដែលជាមេដឹកនាំម្នាក់នៃបក្សប្រឆាំងនៅរុស្ស៊ីជាប់ឃុំឃាំងដល់១៥ថ្ងៃ សភាឌូម៉ារុស្ស៊ី ទើបបញ្ចេញប្រតិកម្មថា ស.រ.អា.មើលឃើញព្រឹត្តិការណ៍នៅរុស្ស៊ីគឺ “ តែក្រោមមុមណាដែលខ្លួនចង់ឃើញ "ប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
ជាបឋមគឺយោបល់របស់ភាគីអាមេរិក៖ដោយធ្វើអត្ថាធិប្បាយអំពីការចាប់បាតុករជាង៦០នាក់ខាងបក្សប្រឆាំងនៅរុស្ស៊ីដែលកាលពីថ្ងៃទី៣១ធ្នូកន្លងទៅបានធ្វើមីទិញនៅលើ “ទីលានវិជ័យ” កណ្តាលក្រុងម៉ូស្គូ ការពារមាត្រាទី៣១នៃរដ្ឋធម្មនុញ្ញរុស្ស៊ីដែលធានានូវសិទ្ធិ របស់ប្រជាពលរដ្ឋរុស្ស៊ីរួមប្រជុំដើម្បីបញ្ចេញមតិខ្លួនដោយសេរី ក្នុងនោះមានទាំងរូបលោក Boris Niemtsov ជាសហប្រធាននៃចលនាប្រឆាំងក្រោមឈ្មោះថា “ សាមគ្គីភាព “ ដែលបន្ទាប់មកត្រូវសាលាលហុក្រុងម៉ូស្គូកាត់ទោសឲ្យជាប់ឃុំ១៥ថ្ងៃតែម្តង ជំនួយការនៃរដ្ឋមន្ត្រីការបរទេសអាមេរិកាំង លោក Philip Crowley បានថ្លែងថា គឺ “ក្នុងផលប្រយោជន៍ប្រទេសរុស្ស៊ី “ទេតើ បើរុស្ស៊ីចេះធានាឲ្យមានសេរីភាពបញ្ចេញមតិ។
លោក Crowley កត់សំគាល់ថា គួរឲ្យស្តាយដែលរដ្ឋអំណាចរុស្ស៊ី បានប្រតិបត្តិនូវការចាប់ឃុំឃាំងនេះ។ ភាគីអាមេរិកចង់គូសបញ្ជាក់ជាថ្មីពីសារៈសំខាន់នៃការការពារអ្វីដែលជាតម្លៃសកល បូកទាំងសិទ្ធិបញ្ចេញមតិដោយសេរីនិងសេរីភាពរួមប្រជុំ។
រីឯតំណាងផ្លូវការនៃក្រុមប្រឹក្សាសន្តិសុខជាតិអាមេរិក នៅអមសេតវិមាន លោក Michael Hammer គូសបញ្ជាក់ថា ទើបប៉ុន្មានខែមុនសោះ យើងខំតែត្រេកអរដោយឃើញអភិបាលថ្មីនៃក្រុងម៉ូស្គូ អនុញ្ញាតឲ្យពួកប្រឆាំងធ្វើបាតុកម្មអហិង្សារាល់តែខែណា ដែលមានថ្ងៃទី៣១។ អ៊ីចឹងហើយ បានជាយើងងឿងឆ្ងល់ដោយឃើញបាតុករខ្លះបែបយ៉ាងរូបលោក Boris Niemtsov បែរទៅជាត្រូវអាជ្ញាធររុស្ស៊ី ចាប់ខ្លួន ហើយបន្ទាប់មកថែមទាំងកាត់ទោសឲ្យជាប់គុកដល់១៥ថ្ងៃឯណោះ ដោយមកពីគាត់គ្រាន់តែសមិទ្ធិនូវសិទ្ធិរបស់ខ្លួន ដែលមានចែងក្នុងរដ្ឋធម្មនុញ្ញសោះ។
ចំណែក គណៈកម្មាធិការសភាឌូម៉ារុស្ស៊ីខាងបញ្ហាសន្តិសុខ បានសំដែងនូវភាពអល់អែកចំពោះគោលជំហរប្រកាន់យកជាឯកតោភាគី ដោយក្រសួងការបរទេសអាមេរិកាំងនិងសេតវិមាននៅក្រុងវ៉ាស៊ីនតោនប្រកាន់នេះគឺនៅក្រោមមុមតែមួយមុមដែលភាគីអាមេរិកចង់ឃើញតែប៉ុណ្ណោះ។ ទីក្រុងម៉ូស្គូ ក៏សូមសំដែងនូវក្តីងឿងឆ្ងល់របស់ខ្លួន ចុះហេតុដូចម្តេចបានជាក្នុងសេចក្តីថ្លែងការណ៍របស់ភាគីអាមេរិកស្រាប់តែគ្មានសោះឡើយ ការសាកល្បងវាយតម្លៃដល់សកម្មភាពរបស់ឈ្មោះ Boris Niemtsov ដែលបានតដៃ មិនព្រមស្តាប់ឯណា តាមបង្គាប់របស់នគរបាល សកម្មភាពតដៃយ៉ាងនេះ ទល់នឹងប៉ូលីសនៅប្រទេសណាក៏ដោយក្នុងលោក គឺមានន័យជាការបំពានលើច្បាប់មិនអាចប្រកែកបានឡើយ។
លោកBoris Niemtsov ផ្ទាល់ដែលធ្លាប់ធ្វើជាអភិបាលខេត្តនិងជាឧបនាយករដ្ឋមន្ត្រីរុស្ស៊ីតាមរយៈសម្ភាសន៍ខ្លួនឲ្យពីក្នុងបន្ទប់ឃុំឃាំងគាត់ដែលមានទទឹង១ម៉ែត្រកន្លះនិងបណ្តោយ២ម៉ែត្រប៉ុន្តែគ្មានបង្អួចទេបានបដិសេធថា គាត់ឥតបានតដៃអ្វីណាទល់នឹងនគរបាលឡើយ។ គាត់ថាការកាត់ទោសគាត់គឺតែក្នុងបំណងបំភ័យបក្សប្រឆាំង។ ក្នុងមីទិញកាលពីថ្ងៃ ៣១ធ្នូនោះ គាត់បានស្រែកទាមទារជាថ្មីឲ្យលោកនាយករដ្ឋមន្ត្រីPoutineចុះចេញពីមុខតំណែងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ