ថ្ងៃនេះ បស្ចិមលោកភ្ជង់ស្មារតីជាថ្មីមកលើតុលារការក្រុងម៉ូស្គូ
មូលហេតុ គឺថ្ងៃ២៧ធ្នូនេះឯងដែលតុលាការក្រុងម៉ូស្គូ ត្រូវប្រកាសសាលក្រម ជុំវិញ “ សំណុំរឿងទី២ “ របស់អតីតមហាសេដ្ឋីរុស្ស៊ីឈ្មោះ Khodorkovski ដែល កំពុងជាប់គុកតាំងពីឆ្នាំ២០០៣មកសំរាប់រយៈពេល៨ឆ្នាំ ចំពោះ “សំណុំរឿងទី១ “ គេចមិនបង់ពន្ធ។ ប៉ុន្តែលោកខាងលិច បកស្រាយ ថាគាត់ជាប់គុកនេះ គឺមកពី មូលហេតុនយោបាយទេតើ ដោយគាត់ ហ៊ានគាំទ្រត្រង់ៗ ដល់បក្សប្រឆាំងសេរីនិយម ដែលប្រឈមមុខទល់ នឹងរូបលោកPoutine។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់កែវ ឆាយាពីម៉ូស្គូ
តាំងពីព្រឹកមក មានសកម្មជនប្រមាណ៣០០នាក់ ដែលឈឺឆ្អាល នឹងវាសនា លោក Khodorkovski បានទៅជួបជុំគ្នានៅពីមុខអគារតុលាការ ដោយបន្លឺឡើងនូវសំឡេងស្រុះៗគ្នា ទាមទារសេរីភាពសំរាប់រូបគាត់ ដែលត្រូវគេដាក់ឈ្មោះថាជា " អ្នកទោសនយោបាយ "។ សឲ្យឃើញ ពីគោលជំហរលោកខាងលិច ដែលសាមគ្គីជាមួយ " អ្នកទោសនយោបាយ " នេះ គឺមានសេចក្តីថ្លែងការណ៍ ធ្វើដោយលោកឯកអគ្គរដ្ឋទូតអាល្លឺម៉ង់-ប្រទេសជាក្បាលម៉ាស៊ីនសហភាពអឺរ៉ុប ដែលថា សំរាប់តុលាការក្រុងម៉ូស្គូ ការប្រកាសសាលក្រមជុំវិញ “សំណុំរឿងទី២“ របស់ លោក Khodorkovski គឺជា Test រំលេចឲ្យឃើញ តើរុស្ស៊ី ជានីតិរដ្ឋ-រដ្ឋច្បាប់ ឬក៏ទេ។
រីឯចៅក្រម ដែលថ្ងៃនេះ ចាប់ផ្តើមអានទៅហើយ ខ្លឹមសារសាលក្រមនោះ បានវិនិច្ឆ័យថា លោក Khodorkovski ពិតជាបានប្រព្រឹត្ត បទឧក្រិដ្ឋ ដូចការចោទប្រកាន់ពីខាងភាគីរដ្ឋអាជ្ញាមែន គឺបានលួចប្រេងកាតរបស់ក្រុមហ៊ុនអ្នកដទៃ ដើម្បីបង្កើនការមានបានផ្ទាល់ខ្លួន។ ជាតួលេខ គឺថា ប្រេងកាតដែលលួចនោះ មានបរិមាណ ២១៨លានតោន ក្នុងទឺកប្រាក់ដល់ជាង ៣០.០០០លានដុល្លារអាមេរិកឯណោះ។ ចំពោះឧក្រិដ្ឋកម្មនេះ រដ្ឋអាជ្ញាទាមទារ ឲ្យតុលាការ កាត់ទោស លោក Khodorkovski និង ដៃគូជំនួញរបស់គាត់ គឺលោក Lebedev ជាអតីតថៅកែ ធនាគារឯកជន Menatep ដែលក៏កំពុងជាប់ពន្ធនាគារតាំងពីឆ្នាំ២០០៣មកដែរ ឲ្យជាប់គុក ម្នាក់ៗ ១៤ ឆ្នាំទៀត។ ដោយហេតុថា សំណុំរឿង អ្នកទាំង២នេះ គឺវែងហើយធំធេងណាស់ បានជា តុលាការក្រុងម៉ូស្គូ ត្រូវរួមប្រជុំ លុះប៉ុន្មានលើកទៀត ទើបអាចប្រកាសសាលក្រមនោះ ឲ្យបានដាច់ស្រេចជាស្ថាពរ។
គួរកត់សំគាល់ថា ថ្ងៃសុក្រ២៤ធ្នូកន្លងទៅ ក្នុងសម្ភាសន៍បូកសរុបតុលាការ ប្រចាំឆ្នាំ២០១០នេះ ឲ្យទៅកាណាល់ទូរទស្សន៍៣ធំៗជាងគេ ដែលផ្សាយទៅពេញទូទាំងសហព័ន្ធរុស្ស៊ី លោក ប្រធានាធិបតី Medvedeev បានរិះគន់លោកនាយករដ្ឋមន្ត្រី Poutine ដោយមិនបញ្ចេញឈ្មោះ ថា ៖” មន្ត្រីរូបណាក៏ដោយដែលធ្វើការបម្រើរដ្ឋ បូកទាំងរូបខ្ញុំជាប្រធានាធិបតីផង គឺ គ្មានសិទ្ធិ សំដែង គោលជំហរខ្លួនអ្វីណា ចំពោះសំណុំរឿងណាក៏ដោយ ដរាបណាដែលមិនទាន់មាន សាលក្រមចេញដោយ តុលាការជុំវិញសំណុំរឿងនេះទេ “។
មូលហេតុ មកពីថ្ងៃ១៦ធ្នូកន្លងទៅ ដោយឆ្លើយតបនឹងសំនួរពាក់ព័ន្ធនឹង សំណុំរឿងលោក Khodorkovski លោកនាយករដ្ឋមន្ត្រី Poutine បានថ្លែងថា ៖ “ ចោរត្រូវតែជាប់គុក “។ មិនតែ ប៉ុណ្ណោះ លោក Poutine ថែមទាំងលំអិតថា តុលាការរុស្ស៊ីមនុស្សធម៌ ជាងតុលាការអាមេរិកឆ្ងាយណាស់ ដ្បិតចំពោះទោសដូចគ្នានេះ ឧក្រិដ្ឋជនឈ្មោះ Bernard Madoff បានត្រូវ កាត់ទោស ឲ្យជាប់គុកដល់ ១៥០ឆ្នាំឯណោះ។
គួរនិយាយថា លោក Khodorkovski សម័យមុនគាត់ត្រូវបានចាប់ខ្លួន ក្នុងឆ្នាំ២០០៣ គឺជាមហាសេដ្ឋី អ្នកមានជាងគេនៅរុស្ស៊ី ប្រកបដោយទឹកប្រាក់ ២៣.០០០លាន$ ហើយក្រុមហ៊ុន ប្រេងកាតឯកជន ដ៏ ធំបំផុតនៅរុស្ស៊ីឈ្មោះ Yulos ដែលគាត់បានដឹកនាំ មានតម្លៃ នៅ លើទីផ្សារពិភពលោក ដល់ទៅ ៤០.០០០លាន$ឯណោះ។ គាត់តែងគូសបញ្ជាក់ថា ដោយប្រកប Business នេះ គាត់មិនដែល ប្រព្រឹត្តបទល្មើសអ្វីណាទេ។ ទោសគាត់ មានលក្ខណៈនយោបាយសុទ្ធសាធ។ ម៉្លោះហើយ បាន ជាគាត់ មិនអាចធ្វើឡើយ លិខិត សុំការប្រោសប្រណីទោស ពីសំណាក់លោកប្រមុខរដ្ឋ។
មេធាវី លោក Khodorkovski បានលើកយកសំដីគាត់ មកប្រាប់ពួកអ្នកកាសែតថា ៖ សំរាប់ លោក Khodorkovski “ គោលជំនឿជឿជាក់ របស់គាត់ គឺខ្ពស់ជាង ជីវិតគាត់ទៅទៀត “៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ