Diaspora ជនជាតិប្លែកៗ ត្រៀមការពារខ្លួនឯងពីពួកជាតិនិយមជ្រុលនៅរុស្ស៊ី
Diaspora ជនជាតិប្លែកៗ នៃសហព័ន្ធរុស្ស៊ី បូកទាំងពួកអ្នកតំណាងសហគមន៍ជនជាតិចិនផង បានពិភាក្សាអំពីស្ថានការណ៍ ដែលកើតឡើងក្នុងរដ្ឋធានីម៉ូស្គូ និងនៅតាមក្រុងឯទៀតនៃប្រទេសរុស្ស៊ី នាប៉ុន្មានថ្ងៃចុងក្រោយ បណ្តាលមកពី មានការវាយប្រហាររង្គាល រហូតដល់ឃាតកម្មទៅផង ទៅលើអ្នកណាដែលមានមុខមាត់មិនមែនជាជាតិរុស្ស៊ី។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ពិគ្រោះផ្លាស់ប្តូរយោបល់គ្នានេះ ប្រព្រឹត្តទៅ គឺក្រោយពីនៅចំកណ្តាលក្រុងម៉ូស្គូ លើទីលានជាប់នឹងវិមានក្រេមឡាំងតែម្តង កាលពីថ្ងៃសៅរ៍កន្លងទៅ មានបាតុកម្មចូលរួមដោយមនុស្សប្រមាណ៥ពាន់នាក់ឯណោះ ដែលនៅដើមឡើយ មានលក្ខណៈអហិង្សាសោះ ទាមទារពីអាជ្ញាធរ ឲ្យរកយុត្តិធម៌ចំពោះការបាញ់សម្លាប់ជាតិរុស្ស៊ីម្នាក់ ឈ្មោះ Egor Svidorov អាយុ២៥ឆ្នាំ បាញ់នេះគឺដោយបុរសឈ្មោះ Aslan Tcherkessov អាយុ ២៦ឆ្នាំ ជាតិ Kabardino-Bolkaria មកពីតំបន់ភ្នំ Caucase ប្រទេសរុស្ស៊ី។
ប៉ុន្តែ មិនយូរប៉ុន្មានក្រោយមក បាតុកម្មនោះ បែរទៅជាមានលក្ខណៈហិង្សាទៅវិញ ដោយមកពី ក្រុមយុវជនជាតិនិយមជ្រុល ដែលបាន លួចបង្កប់ខ្លួន ក្នុងជួរបាតុកម្មនោះ ដោយចងកន្សែង បាំងមុខ ស្រាប់តែបានបង្កឲ្យមានការប៉ះទង្គិច ជាមួយ នគរបាលនិងបានឆ្លៀតវាយប្រហារ គ្មានប្រណី ទៅលើនរណាដែលមានមុខមាត់ មិនមែនជាជាតិរុស្ស៊ី គឺគ្មានឈាមជ័រជា ពូជស្លាវ។ កាលណោះ ធ្លាក់ខ្លួនរបួស គឺដល់២៩នាក់ ក្នុងនោះទាំងនគរបាល ១៣នាក់ផង ដែលខំការពារពួកអ្នករងគ្រោះ។ ជាតុល្យាការ គឺមានចាប់បានពួកយុវជនជាតិនិយមដល់ទៅ៦៥នាក់។
ក្នុងចំណោមអ្នករងគ្រោះធ្ងន់ គឺមានជាតិ Ouzbek អាយុ ២៧ឆ្នាំ មកពីតំបន់អាស៊ីកណ្តាល ដែលត្រូវពួកជាតិនិយមរុស្ស៊ីវាយទ្រមខ្លួន វិះៗស្លាប់ ទាល់តែស្រាំខួរក្បាលនិងបាក់ខ្ទង់ច្រមុះតែម្តង។ រួចក្នុងថ្ងៃអាទិត្យបន្ទាប់មកនៅសង្កាត់ខាងត្បូងនៃរដ្ឋធានីម៉ូស្គូ គេបានប្រទះភ្នែកឃើញសពជនជាតិ Kirghiz ម្នាក់ មកពីតំបន់អាស៊ីកណ្តាលដែរ ដែលត្រូវពួកជាតិនិយមរុស្ស៊ី១៥នាក់ ក្នុងនោះមានទាំងនារីម្នាក់ផង បានចាក់នឹងកាំបិតសុសសាច់ រហូតដល់ក្ស័យជីវិត។
នៅថ្ងៃចន្ទម្សិលមិញ ពលរដ្ឋជាតិ Azerbaidjan ម្នាក់មកពីតំបន់ នាយភ្នំកូកាស បានត្រូវ ពួកជាតិនិយមរុស្ស៊ី លួចបាញ់ ហើយធ្លាក់ខ្លួនរបួសធ្ងន់ ទាល់តែត្រូវបានដឹកទៅស្នាក់ព្យាបាលនៅមន្ទីរពេទ្យ។
តាមតួលេខប្រមូលបាន ដោយអង្គការខាងការពារសិទ្ធិមនុស្សនៅរុស្ស៊ី គ្រាន់តែក្នុង២ថ្ងៃកន្លងទៅ មានការវាយប្រហារបែបនេះ ចំនួនរាប់សិបឯណោះ។
កាសែតក្រុងម៉ូស្គូ សរសេរថា ការវាយប្រហារនោះ មិនគ្រាន់តែមានន័យ ជាការសងសឹក ប៉ុណ្ណោះទេ តែជាចរិតមួយសំគាល់ ទង្វើពួកជាតិនិយម ដែលធ្វើ” ការប្រលងវិញ្ញាសាម្យ៉ាង “ របស់វា គឺថា បើរូបភាពស្តីពីទង្វើនោះ ថែមទាំងបញ្ចាំងតាមកញ្ចក់ទូរទស្សន៍ជាតិទៅផង នោះ គឺត្រូវ មេក្រុមរបស់វា ចាត់ទុកថាប្រលងជាប់ ហើយដំឡើងសក្តិ អ្នកដែលបានប្រព្រឹត្តតែម្តង។
ទោះបីលោកប្រធានាធិបតីរុស្ស៊ី Medvedev ក្នុងនាមរក្សា មុខមាត់ប្រទេសរុស្ស៊ីលើឆាកអន្តរជាតិ បានថ្លែងគាំទ្រពេញទី ដល់សកម្មភាព របស់នគរបាល ខាងបង្ក្រាបអំពើស្រេចតែទំនើងក្បាលចិត្ត នៃពួកជាតិនិយម បង្ក្រាបដោយប្រើគ្រប់តែមធ្យោបាយស្របច្បាប់ដែលមានក្នុងកណ្តាប់ដៃខ្លួនក្តី ក៏ Diaspora ជនជាតិប្លែកៗ ដែលរស់នៅក្នុងសហព័ន្ធរុស្ស៊ី បានចេញសេចក្តីថ្លែងការណ៍ថា ៖ “ បើរដ្ឋអំណាចរុស្ស៊ី គ្មានសមត្ថភាពការពារជីវិតពួកយើងទេ នោះ គឺយើងខ្លួនឯង ដែលនឹងចេញមុខ ការពារជីវិតខ្លួន ដោយប្រើលទ្ធភាពនិងកម្លាំងដែលយើងមាន ! “៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ