ចារនារីរុស្ស៊ីម្នាក់បង្កប់ខ្លួននៅក្នុងរដ្ឋសភា
យុវស្ត្រីរុស្ស៊ីម្នាក់ដែលធ្វើការជាលេខានៅរដ្ឋសភាឱ្យអ្នក តំណាងរាស្ត្រម្នាក់ជាអ្នកឯកទេសខាងបញ្ហាកិច្ចការពារប្រទេសជាតិ ត្រូវបានចាប់ខ្លួន -ស្របតាមកាសែតអង់គ្លេស Sunday Timesបង្ហើបឱ្យដឹងនៅថ្ងៃអាទិត្យ៥ធ្នូនេះ។ស្ត្រីនេះបានធ្វើការ ឱ្យក្រសួងស៊ើបការសម្ងាត់រុស្ស៊ី។គាត់នឹងត្រូវបណ្តេញចេញពីប្រទេស អង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ Adrien Moss ពីទីក្រុង Londres ប្រែសម្រួលដោយ វីនស្តុនរតនា
នាងKatia Zatuliveter មានអាយុ២៥ឆ្នាំ។ អ្នកតំណាងរាស្ត្រប្រជាធិបតេយ្យសេរីនិយម Mike Hancockដែលបានប្រើនាង Katia មានអាយុ៦៤ឆ្នាំ។ លោក Mike Hancock ជាសមាជិកគណៈកម្មការរដ្ឋសភាទទួលបន្ទុកខាងកិច្ចការពារប្រទេសជាតិ។ គាត់ ក៏ចូលរួមប្រជុំដែរនៅក្នុងសហភាពអឺរ៉ូបខាងលិច ជាអង្គការមួយមានឯកទេសកម្មខាងកិច្ចការពារប្រទេសជាតិ។
លោក Mike Hancock ត្រូវសហសេវិកអឺរ៉ូបរបស់គាត់ពិពណ៌នាថា ជាអ្នកតំណាងរាស្រ្តនៃអឺរ៉ូបខាងលិចទាំងមូល ដែលជិតដិតនឹងរុស្ស៊ីខ្លាំងជាងគេបំផុត។ គឺនៅទីក្រុង Strasbourg ដែលលោក Mike Hancock បានជ្រើសរើសនាង Katiaឲ្យធ្វើជាយុវលេខារបស់ខ្លួន។
ស្របតាមក្រសួងស៊ើបការសម្ងាត់អង់គ្លេស នាង Katia បានធ្វើការឲ្យសមភាគីរុស្ស៊ី របស់គេ។ ការបណ្តេញចេញយុវចារនារីនេះ ត្រូវបានយល់ព្រមដោយលោកស្រីរដ្ឋមន្ត្រីក្រសួងមហាផ្ទៃអង់គ្លេស។ ការិយាល័យរបស់អ្នកតំណាងរាស្រ្តកណ្តាលនិយមដែលជាស្នូលនៃរឿងចារកិច្ចនេះ បានសុំឲ្យក្រសួងការពារជាតិ ផ្តល់ព័ត៌មានសម្ងាត់ស្តីពីនាវាមុជទឹកនុយក្លេអ៊ែរអង់គ្លេស ប៉ុន្តែត្រូវក្រសួងការពារជាតិ បដិសេធពុំព្រមឆ្លើយតបតាមសំណូមពរនេះ។
គឺជាលើកទីមួយហើយចាប់តាំងពីចប់សង្គ្រាមត្រជាក់មកដែលមនុស្សម្នាក់ធ្វើការនៅក្នុងរដ្ឋសភាអង់គ្លេសត្រូវជាប់ចោទថា បានធ្វើចារកិច្ចឲ្យរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ