លោក Medvedev ៖ បរមាណូកូរ៉េខាងជើងគ្រោះថ្នាក់ជាងបរមាណូអៀរ៉ង់
“មហិច្ឆិតាបរមាណូ របស់កូរ៉េខាងជើងគ្រោះថ្នាក់ជាងមហិច្ឆិតាបរមាណូចិញ្ចឹមទុកដោយ ប្រទេសអៀរ៉ង់ទៅទៀត” សេចក្តីនេះថ្លែងដោយលោកប្រធានាធិបតីរុស្ស៊ី Dmitri Medvedev ក្នុងបទសម្ភាសន៍ទៅកាន់មធ្យោបាយឃោសនាមហាជនកូរ៉េខាងត្បូងល្ងាច ម្សិលមិញក្រោយពីគាត់បានទទួលសញ្ញាប័ត្រជា “ បណ្ឌិតកិត្តិយស Honoris Causa “នៃសាកលវិទ្យាល័យក្រុងSeoul។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ដោយលើកឡើងអំពីកម្រិតគ្រោះថ្នាក់នោះ លោកប្រមុខរដ្ឋរុស្ស៊ី Medvedev ធ្វើការប្រៀបធៀបដូចតទៅ ៖ ជាបឋម កម្មវិធីនុយក្លេអ៊ែរកូរ៉េខាងជើងមានន័យជាប្រព៍ន្ធដែលប្រឈមត្រង់ៗទល់នឹង “ របបអន្តរជាតិខាងហាមប្រាមការសាយភាយបរមាណូ ” ដូច្នេះធាតុពិតនៃប្រព័ន្ធនេះគឺ បង្កឲ្យមានការសាយភាយបរមាណូនៅក្នុងលោកតែម្តង។ ម្យ៉ាងទៀត ទោះបីជាញឹកញយ ពិភពលោកនាំគ្នាភ្ជុងស្មារតីទៅលើប្រទេសអៀរ៉ង់ក្តីក៏ខ្ញុំត្រូវតែកត់សំគាល់ថា ខុសពីទីក្រុង Pyongyangទីក្រុងTeheranមិនដែលប្រកាសខ្លួនឯងថាជាមហាអំណាចបរមាណូឡើយមិនដែលធ្វើការសាកល្បងអាវុធបរមាណូឡើយ កុំថាដល់ទៅកំញើញប្រើអាវុធនេះ។
តាមប្រសាសន៍លោក Medvedev ជាសត្យានុម័តដែលប្រទេសរុស្ស៊ីព្រួយបារម្ភដោយឃើញមហិច្ឆិតាបរមាណូ របស់កូរ៉េខាងជើងបង្កើតជាភាពតានតឹងយោធា-នយោបាយនៅភូម៌ភាគឦសាននៃទ្វីបអាស៊ីនិងនៅតំបន់ជិតបង្កើយនឹងព្រំប្រទល់រុស្ស៊ី។ នេះគឺដោយមិននិយាយទៅផងថា វាលវង់ល្បងពិសោធបរមាណូរបស់កូរ៉េខាងជើងស្ថិតនៅចម្ងាយតែជាង ១០០គ.ម.ប៉ុណ្ណោះពីដែនដីរុស្ស៊ី។
ទាក់ទងនឹងរឿងនេះ គួររំលឹកថា គិតតាំងពីថ្ងៃ៩តុលាឆ្នាំ ២០០៦មក កូរ៉េខាងជើងបានធ្វើការសាកល្បងបរមាណូចំនួន៥លើកហើយ ពីក្នុងនោះ២លើកគឺជាការសាងល្បងក្រោមដីរួចការសាកល្បងក្រោមដីលើកចុងក្រោយបានប្រព្រឹត្តទៅគឺកាលពីថ្ងៃ២៥ឧសភាឆ្នាំ២០០៩។
ក្នុងសម្ភាសន៍ខ្លួនទៅប្រព័ន្ធផ្សព្វផ្សាយកូរ៉េខាងត្បូង លោក Medvedev ចង្អុលឲ្យឃើញថា ការបំផ្ទុះបរមាណូនោះ ដោយកូរ៉េខាងជើងគឺមានកម្លាំងផ្ទុះដល់២០គីឡូតោន នៅចម្ងាយតែ១៥០គ.ម. ពីព្រំដែនរុស្ស៊ី។ កាលណោះ កាសែតរុស្ស៊ីនាំគ្នាចេញផ្សាយអត្ថបទដោយដាក់ចំណងជើងរួមថា “ ភ្លើងសង្គ្រាមអាចឆាបឆេះនៅជិតនឹងព្រំដែនខាងកើតរបស់រុស្ស៊ីតែម្តង “។ មិនតែប៉ុណ្ណោះ អាជ្ញាធរខេត្តទាំងឡាយនៅតំបន់បូព៌ារុស្ស៊ីនាំគ្នាតាមដានឥតល្ហែ អំពីកំរិតវិទ្យុសកម្មនៅលើទឹកដីខ្លួនដែលបណ្តាលមកពីការបំផ្ទុះបរមាណូ នៅកូរ៉េខាងជើងនោះ។
ពិតជាក្រោយពីការបំផ្ទុះនោះឯង ដែលក្នុងខែមិថុនាឆ្នាំ២០០៩ លោកប្រធានាធិបតីរុស្ស៊ី Medvedev បានចេញសេចក្តីថ្លែងការណ៍ ទាមទារពីក្រុមប្រឹក្សាសន្តិសុខអ.ស.ប. ឲ្យដាក់ទណ្ឌកម្មទល់នឹងកូរ៉េខាងជើងបូកទាំងទណ្ឌកម្មតាមផ្លូវសេដ្ឋកិច្ចផង ហើយឲ្យបង្កើតឡើងជាយន្តការសំរាប់បន្សាបពិសពុលនៃកម្មវិធីនុយក្លេអ៊ែររបស់កូរ៉េខាងជើង។
នៅតាមមុខព្រួញនេះ លោក Medvedev បានថ្លែងថា ៖ គឺជាការមិនអាចបណ្តោយឲ្យមានទៅកើតឡើយ នូវការរីករាលដាលធំឡើងនៃចំនួនប្រទេសជាសមាជិក “ ក្លឹបបរមាណូ “ តាមផ្លូវបង្កើតជាផលិតផលបរមាណូដែលផ្ទុយនឹង “ របបអន្តរជាតិខាងហាមប្រាមការសាយភាយបរមាណូ “៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ