អ៊ុយក្រែននៅតែមិនពេញចិត្តនឹងតម្លៃនៃឧស្ម័នដែលរុស្ស៊ីលក់ឲ្យខ្លួន
ក្នុងទស្សនកិច្ចរបស់ខ្លួន នៅទីក្រុង Kiev ប្រទេសអ៊ុយក្រែន កាលពីថ្ងៃទី ២៧ តុលា ២០១០នាយករដ្ឋមន្ត្រីរុស្ស៊ី លោកVladimir Poutineបានចុះហត្ថលេខាលើឯកសារ៩ច្បាប់ ក៏ប៉ុន្តែលោកឥតមានបានចុះហត្ថលេខាលើកិច្ចព្រមព្រៀងស្តីពីតម្លៃថ្មីនៃឧស្ម័ន ដែលត្រូវថោកជាងតម្លៃចែងក្នុងកិច្ចព្រមព្រៀងចុះនៅទីក្រុងម៉ូស្គូ កាលពីដើមឆ្នាំ២០០៩ដោយនាយករដ្ឋមន្ត្រីអ៊ុយក្រែនលើកមុនលោកស្រី Julia Timochenko។ តាមយោបល់ប្រមុខរដ្ឋាភិបាលអ៊ុយក្រែនបច្ចុប្បន្ន លោក Nikolai Nazarov កិច្ចព្រមព្រៀងនោះគឺនាំឲ្យខូចដល់ផលប្រយោជន៍សេដ្ឋកិច្ចអ៊ុយក្រែនតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
តាំងពីដើមទី គោលដៅចិញ្ចឹមទុកដោយម្ខាងៗគឺមិនដូចគ្នាទេ។ យ៉ាងណាមិញ ក្រោយពីអញ្ជើញទៅដល់ទីក្រុង Kiev លោកនាយករដ្ឋមន្ត្រី Poutine បានជួបជាបឋម គឺជាមួយ លោក ប្រធានាធិបតីអ៊ុយក្រែន Viktor Yanoukovitch។ សាច់រឿងនៃជំនួបនេះ គឺតាក់តែងឡើងជា ៖ “ សន្ធិសញ្ញាស្តីអំពីទំនាក់ទំនងរវាង រុស្ស៊ីនិងអ៊ុយក្រែន គ្រោងទុករហូតដល់ឆ្នាំ២០២០ តែម្តង ដែលជាក្តីប្រាថ្នាដ៏ចម្បងរបស់ភាគីរុស្ស៊ី។
លុះបន្ទាប់ពីជំនួបនេះ ទើបលោកនាយករដ្ឋមន្ត្រី Poutine ដោយរួមជាមួយសមភាគីអ៊ុយក្រែនបានចូលរួមក្នុងកិច្ចប្រជុំប្រចាំឆ្នាំនៃគណៈកម្មការអន្តររដ្ឋាភិបាល រុស្ស៊ី-អ៊ុយក្រែន ខាងបញ្ហាសហប្រតិបត្តិការសេដ្ឋកិច្ច។
ពិតជាក្នុងឋានៈជាតុល្យាការនៃសម័យប្រជុំនេះ ដែលភាគីអ៊ុយក្រែនសង្ឃឹមថា នឹងមានចុះបានជាកិច្ចព្រមព្រៀងថ្មីស្តីអំពីតម្លៃឧស្ម័នទិញពីរុស្ស៊ី ដែលត្រូវថោកជាងតម្លៃចែងក្នុងកិច្ចព្រមព្រៀងចុះកាលពីជិត២ឆ្នាំមុន ពីព្រោះតាមយោបល់លោកនាយករដ្ឋមន្ត្រីអ៊ុយក្រែនកិច្ចព្រមព្រៀងចាស់នោះ ចុះដោយមិនសមស្របនឹងច្បាប់នៅអ៊ុយក្រែនសព្វថ្ងៃឡើយ។ រីឯតម្លៃជាក់ស្តែងលើទីផ្សារបច្ចុប្បន្ន ទាមទារឲ្យមានរូបមន្តថ្មីសំរាប់កំណត់ថ្លៃឧស្ម័ននោះ ដើម្បីស្របនឹងការស្តារឡើងវិញនៃកំរិតជឿទុកចិត្តគ្នារវាងប្រទេសទាំងពីរ។
ថ្លែងក្នុងសន្និសីទកាសែត លោក Poutine គ្រាន់តែរំលឹកដោយភាសាការទូតថា កាលពីខែមេសាឆ្នាំនេះ រុស្ស៊ីបានបញ្ចុះអស់៣០%ទៅហើយតម្លៃចាស់នៃឧស្ម័នដែលខ្លួនលក់ទៅឲ្យអ៊ុយក្រែនចុះអស់១០០ ដុល្លារ ពោលគឺមកនៅត្រឹម ២៤៨ដុល្លារអាមេរិកប៉ុណ្ណោះក្នុង១.០០០ម៣ ជាថ្នូរនឹងការយល់ព្រមរបស់អ៊ុយក្រែន ដែលព្រមពន្យារឲ្យមានវត្តមានកងនាវារុស្ស៊ីនៅនឹងមូលដ្ឋាន Sebastopol នៃទៀបកោះ Criméeរបស់អ៊ុយក្រែន នៅមាត់សមុទ្ទខ្មៅលុះរហូតដល់ឆ្នាំ២០៤២។ ការបញ្ចុះថ្លៃនេះនឹងជួយឲ្យអ៊ុយក្រែនសន្សំបានទឹកប្រាក់ដល់៤០.០០០លានដុល្លារអាមេរិកសំរាប់អ៊ុយក្រែនប្រើជាប្រយោជន៍នៃសេដ្ឋកិច្ចជាតិខ្លួនតែម្តង។
ស្របនឹងតួលេខដែលមានគ្រាន់តែក្នុង១ខែកញ្ញាកន្លងទៅ អ៊ុយក្រែនបានទិញឧស្ម័នពីរុស្ស៊ីក្នុងទឹកប្រាក់ជាង៧០០លានដុល្លារ ហើយចំពោះថ្លៃសេវាបង្ហូរឧស្ម័នរុស្ស៊ីកាត់តាមដែនដីខ្លួនទៅកាន់ប្រទេសសហភាពអឺរ៉ុប អ៊ុយក្រែនទទួលពីរុស្ស៊ីក្នុង១ឆ្នាំៗនូវចំណូលប្រមាណ១.០០០លាន$។
ក្នុងចំណោមឯកសារ៩ច្បាប់ដែលមានចុះនៅទីក្រុង Kiev លើកនេះសំខាន់បំផុតសំរាប់អ៊ុយក្រែនគឺកិច្ចព្រមព្រៀងស្តីអំពីការសាងសង់នៅអ៊ុយក្រែនជារោងចក្រខាងផលិតឥន្ធនៈនុយក្លេអ៊ែរតាមបច្ចេកវិជ្ជារុស្ស៊ី ដ្បិត៤៨%ឯណោះនៃភ្លើងអគ្គិសនីនៅអ៊ុយក្រែន ពិតជាផ្ដល់ដោយស្ថានីយអគ្គិសនីដែលដើរដោយថាមពលបរមាណូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ