ព្រឹកមិញ មានពួកភេរវជនអត្តឃាតបាន វាយប្រហារទៅលើរដ្ឋសភាឆេឆេនី
តាមតួលេខចេញដោយក្រសួងមហាផ្ទៃឆេឆេនី នគរបាលដែលការពារអគារ រដ្ឋសភានោះបានធ្លាក់ខ្លួនស្លាប់អស់ ២នាក់ និងស្លាប់ម្នាក់ទៀតគឺបុគ្គលិករដ្ឋសភា។ មិនតែប៉ុណ្ណោះ ធ្លាក់ខ្លួនរបួស គឺ១៧នាក់ ក្នុងនោះ ៦នាក់ជានគរបាល និង១១នាក់ជាបុគ្គលិក។ រីឯក្នុងចំណោម ភេរវជន៤នាក់ ដែលវាយប្រហារ ទៅលើអគាររដ្ឋសភា មានម្នាក់បានបំផ្ទុះខ្លួនវា នៅពីមុខអគាររដ្ឋសភា ចំណែកបីនាក់ទៀត បានប៉ុនប៉ងសម្រុកចូលអគារនោះតែម្តង។ ប៉ុន្តែ ក្រោយពីមានអន្តរាគមន៍ទាន់ពេលវេលា ពីខាងកងកម្លាំងអាជ្ញាធរ ពួកភេរវជនទាំងនោះ បានត្រូវកំទេចអស់គ្មានសល់ទេ។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
នៅវេលាម៉ោង៩ព្រឹកមិញ ក្នុងក្រុង Grosny រដ្ឋធានីនៃសាធារណរដ្ឋឆេឆេនី ចំណុះ សហព័ន្ធរុស្ស៊ី ដែលស្ថិតនៅតំបន់ភ្នំកូកាស ចម្ងាយប្រមាណ ១.៧០០គម ខាងត្បូងពីរដ្ឋធានី ម៉ូស្គូ ពេលដែលតំណាងរាស្ត្រម្នាក់បើករថយន្តខ្លួនចូលទៅ កាន់ទីធ្លារដ្ឋសភា ក៏មានទាំង រថយន្តមួយគ្រឿងផ្សេងដែរ បើកបន្លំនៅពីក្រោយវាជិះទៅដោយភេរវជន៤នាក់ដែលគ្រាន់តែ ខិតជិតដល់អគាររដ្ឋសភា ពួកវាក៏បានលោតចេញពីឡានវា ហើយបោះពួយសំដៅទៅអគារ រដ្ឋសភាតែម្តង។
តាំងពីមិនទាន់ចូលដល់អគារនោះម៉្លេះ ភេរវជនម្នាក់បានបំផ្ទុះខ្លួនវា ផ្តាច់ជីវិតនគរបាលដែលយាមអគារនោះ អស់២នាក់នៅនឹងកន្លែងភ្លាម បន្ទាប់មក ពេលបាញ់តទល់នឹងពួកវា មានបុគ្គលិកម្នាក់របស់រដ្ឋសភា ស្រាប់តែអភ័ព្វត្រូវគ្រាប់ស្លាប់ដែរ។ ដោយហេតុថា ក្រុង Grosny មិនជាធំ បានជាទ័ពពិសេសខាងបង្ក្រាបអំពើភេរវកម្មដែលប្រចាំការនៅមិនឆ្ងាយពីទីនោះ ក៏បាន អន្តរាគមន៍យ៉ាងលឿនទៅជួយសង្គ្រោះជីវិតពួកអ្នកតំណាងរាស្ត្រទាំង៤០នាក់ ដែលរួមជាមួយ រូបប្រធាន រដ្ឋសភាផ្ទាល់ បានត្រូវជម្លៀសចេញ ទៅកាន់កន្លែងសុវត្ថិភាព។
គួរនិយាយថា ពិតជាថ្ងៃនេះតែម្តង ដែលរដ្ឋមន្ត្រីមហាផ្ទៃទូទាំងសហព័ន្ធរុស្ស៊ី លោក Nougaliev ធ្វើទស្សនកិច្ច នៅរដ្ឋធានីឆេឆេនី។ ទាក់ទងនឹងអំពើភេរវកម្មថ្ងៃនេះ គាត់បានស្ងើចសរសើរ អង្គភាពនគរបាលពិសេសជាតិឆេឆេនី ដែលបានបង្ហាញឲ្យឃើញពីកំរិតអាជីពរបស់ខ្លួន ខាង បង្ក្រាបពួកភេរវជន។ លោកបានរាយការណ៍តាមទូរស័ព្ទទៅហើយ ជូនលោកប្រធានាធិបតីរុស្ស៊ី Medvedev ដែលកំពុងចូលរួមក្នុងជំនួបកំពូលត្រីភាគី រុស្ស៊ី-បារាំង-អាល្លឺម៉ង់ នៅឯក្រុង Deauville ប្រទេសបារាំង។ តាមមតិប្រមុខសាធារណរដ្ឋឆេឆេនី លោក Kadyrov ការវាយប្រហារលើកនេះ ពិតជាចាត់ចែងឡើងដោយពួកអាណាព្យាបាលវានៅបរទេស។
ការវាយប្រហារដ៏ខ្លាំងក្លានៅឆេឆេនី លើកមុន ធ្វើដោយពួកភេរវជនមានគ្នាដល់ទៅ៦០នាក់ឯណោះ បានប្រព្រឹត្តទៅគឺកាលពីចុងខែសីហា។ ធ្វើនោះ គឺទៅលើ ឃុំកំណើតរបស់លោក Kadyrov តែម្តង ដោយកាលណោះ ខាងនគរបាលឆេឆេនី ស្លាប់អស់៦នាក់ របួសដល់១៧នាក់ និង អ្នកស្រុកផ្ទាល់ ក៏របួស ៧នាក់ដែរ។ ចំណែកពួកភេរវជនវិញ គឺបានត្រូវកំទេចអស់ ១២នាក់។
ទើប៥ថ្ងៃមុនសោះ រដ្ឋមន្ត្រីក្រសួងសន្តិសុខរុស្ស៊ី លោក Bortnikov បានថ្លែងក្នុង “ គណៈ កម្មាធិការជាតិខាងប្រឆាំងភេរវកម្ម “ ថា ៖ គិតពីដើមឆ្នាំនេះមក នៅតាម៧សាធារណរដ្ឋ ដែលចំណុះសហព័ន្ធរុស្ស៊ី នៅតំបន់ភ្នំកូកាស បូកទាំងនៅឆេឆេនីផង គឺមានកំទេច ពួកភេរវជន អស់៣០១នាក់ និង ចាប់បានពួកវា ចំនួន ៤៦៨នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ