សំនើបារាំងដែលអបអរដោយរុស្ស៊ីប៉ុន្តែធ្វើឲ្យអាមេរិកមួម៉ៅ
លោកប្រធានាធិបតីបារាំង Nicolas Sarkozy គ្រោងដាក់ចេញមកក្នុងជំនួបកំពូលបារាំង-រុស្ស៊ី-អាល្លឺម៉ង់ នៅបុរី Deauville នាថ្ងៃ ១៨-១៩តុលាខាងមុខនូវសំនើឲ្យសហភាពអឺរ៉រុបពង្រីកយ៉ាងបង្គួរ សហប្រតិបត្តិការជាមួយប្រទេសរុស្ស៊ី លើវិស័យសេដ្ឋកិច្ចនិងសន្តិសុខ។ យោងទៅលើកាសែតអង់គ្លេស The Times លេខដែលទើបចេញផ្សាយនៅទីក្រុងវ៉ាស៊ីនតោន ឥឡូវសំដែងទៅហើយនូវក្តីព្រួយបារម្ភរបស់ខ្លួន ៖ បើសំនើបារាំងស្តីអំពី “ រចនាសម្ព័ន្ធថ្មីនៃសេដ្ឋកិច្ចនិងសន្តិសុខ “ កើតចេញជាផ្លែផ្កាមែននោះគឺវានាំឲ្យខូចដល់ឧត្តមានុភាពរបស់ស.រ.អាលើពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
តាមយោបល់លោកប្រមុខរដ្ឋបារាំងដើម្បីឲ្យសេដ្ឋកិច្ចដំណើរការយ៉ាងរលូនគឺចាំបាច់ត្រូវតែបង្កើតជា “ រចនាសម្ព័ន្ធថ្មីក្នុងលោក ” ជាទីដែលចិនប៉េកាំងនិងរុស្ស៊ី ត្រូវតែមានកន្លែងដ៏សំខាន់។ ក្នុងអភិក្រមនេះ លោក Sarkozy ចង់ឲ្យប្រទេសរុស្ស៊ីនិង២៧ប្រទេសសហភាពអឺរ៉ុប តាំងនឹងគ្នាជាទំនាក់ទំនងស្អិតល្មួត ជុំវិញបញ្ហាប្លែកៗ បែបយ៉ាងក្នុងវិស័យសន្តិសុខជាតិ ទំនាក់ទំនងការទូត នយោបាយសេដ្ឋកិច្ច សិទ្ធិមនុស្ស និងអន្តោប្រវេសន៍។
តាមដែលកាសែតអង់គ្លេស The Times សរសេរលោក Sarkozyឆ្លៀតប្រើស្ថានភាពបារាំងជាប្រធាននៃជំនួបកំពូល “ G-20 “ ដែលនឹងចាប់ផ្តើមនៅថ្ងៃ ១៤វិច្ឆិកាខែក្រោយ ដើម្បីបំផុសមកនូវគំនិតរបស់ខ្លួន។
បើកាសែតរុស្ស៊ីឈ្មោះ “ Niezavissimaya Gazeta “ ចុះផ្សាយថា ទីក្រុងម៉ូស្គូវាយតម្លៃខ្ពស់ និង ជាវិជ្ជមានដល់សំនើរបស់ទីក្រុងប៉ារីស នោះ កាសែតអាមេរិកាំង The New York Times វិញ បានបំភ្លឺទៅឃើញថា គំនិតលោក Sarkozy បែរទៅជាញ៉ាំងទីក្រុងវ៉ាស៊ីនតោនឲ្យទោមនស្សក្រៃលែង។
ទីក្រុងប៉ារីសគូសបញ្ជាក់ថា ការពិភាក្សាអំពី លទ្ធភាពធ្វើសហប្រតិបត្តិការកាន់តែជិតស្និទ្ធ ជាមួយរុស្ស៊ីនឹងក្លាយទៅជាចម្លើយតបនឹងសំនើរបស់លោកប្រធានាធិបតី Medvedev ស្តីអំពី ការបង្កើតឡើងជា រចនាសម្ព័ន្ធថ្មីនៃសន្តិសុខទ្វីបអឺរ៉ុប “។
គួររំលឹកថា គឺតាំងពីខែមិថុនាឆ្នាំ២០០៨ម៉្លេះ បានន័យថា មិនដល់២ខែផង ក្រោយពីគាត់ចូលកាន់តំណែងជាប្រធានាធិបតីរុស្ស៊ីមក លោក Medvedev បានបំផុសមកនូវសំនើឲ្យតាក់តែងឡើងជា“ សន្ធិសញ្ញាថ្មីស្តីអំពីសន្តិសុខទ្វីបអឺរ៉ុប “។ ខ្លឹមសារសំនើនេះ គឺ ឲ្យបង្កើតក្នុងវិស័យសន្តិសុខ យោធា-នយោបាយ ប្រចាំនៅពេញលើលំហអឺរ៉ុប-អាត្លង់ទិក ក្នុងឋានៈជា “លំហរួមតែមួយ មិនអាចញែកបំបែកបាន“ ដើម្បីខ័ណ្ឌបញ្ចប់ជារៀងរហូត យុគសង្គ្រាមត្រជាក់។ ក្នុងគោលដៅនេះ លោក Medvedev ស្នើឲ្យចែងក្នុងច្បាប់អន្តរជាតិ គឺ គោលការណ៍នៃភាពមិនអាចបែងចែក សន្តិសុខទៅជារបស់អ្នកនេះ ឬរបស់អ្នកនោះឡើយ។ គោលការណ៍នេះ ឈរលើនីតិកាតព្វកិច្ច ដែលថា ៖ ទោះរដ្ឋក៏ដោយ អង្គការអន្តរជាតិណាក៏ដោយដែលស្ថិតនៅក្នុងលំហអឺរ៉ុប-អាត្លង់ទិកមិនអាចពង្រឹងសន្តិសុខខ្លួនដោយនាំឲ្យខូចដល់សន្តិសុខរបស់រដ្ឋនិងអង្គការឯទៀតឡើយ។
បើតាមយោបល់លោក Sarkozy ក្នុងបរិវេណថ្មីនេះនៃសន្តិសុខដែលមិននាំឲ្យខូចឯណាដល់ទ្រង់ទ្រាយសហភាពអឺរ៉ុប បក្សសម្ពន្ធអូតង់ និងអង្គការOSCE រុស្ស៊ីអាចក្លាយជាកត្តាពាំនាំមកនូវសមតា នោះស.រ.អាវិញបែរទៅជាមន្ទិលសង្ស័យ ចំពោះប្រសិទ្ធិភាពនៃសំនើរុស្ស៊ីក្នុងវិស័យសន្តិសុខទ្វីបអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ