ទីក្រុងម៉ូស្គូប្រដៅទីក្រុង Tokyo កុំឲ្យទូន្មានលោកប្រធានាធិបតីរុស្ស៊ីអី
គឺម្សិលមិញ ដែលក្រសួងការបរទេសរុស្ស៊ី បានប្រតិកម្មទល់នឹងសំដី លោក នាយករដ្ឋមន្ត្រីជប៉ុន Naoto Kan ដែលក្រោយពីឮថា លោកប្រធានាធិបតីរុស្ស៊ី Medvedev មាន បំណងអញ្ជើញទៅសួរសុខទុក្ខអ្នកស្រុករុស្ស៊ី ដែលរស់នៅឯ ប្រជុំកោះ Kouriles ខាងត្បូង បានថ្លែងថា ទីក្រុង Tokyo នៅតែបន្តចាត់ទុកកោះទាំងនោះ ថាជា “ ដែនដីប៉ែកខាងជើង “ របស់ជប៉ុនដដែល ហើយទូន្មានប្រមុខរដ្ឋរុស្ស៊ី កុំឲ្យយកជើងទៅជាន់លើដីនោះអី ពុំនោះសោត ទំនាក់ទំនងជប៉ុន-រុស្ស៊ីមុខជាកាន់តែស្រុតចុះអាក្រក់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
ថ្លែងក្នុង Briefing នៅម៉ូស្គូថ្ងៃ៣០កញ្ញា អ្នកនាំពាក្យផ្លូវការរបស់ក្រសួងការបរទេសរុស្ស៊ី លោក André Nesterenko ដោយឆ្លើយតបនឹងសំណួរអ្នកកាសែតម្នាក់ ពាក់ព័ន្ធនឹងសាច់រឿងនេះ បានថ្លែងថា សំដីទូន្មានពីខាងមេដឹកនាំជប៉ុននោះ គឺជាសំដីដែល” មិនគប្បីបន្លឺចេញមកសោះ “ វាជា “ សំដីដែលភាគីរុស្ស៊ី មិនអាចទទួលយក “ ជាដាច់ខាត។ ដ្បិត ការធ្វើដំណើរ របស់ ប្រធានាធិបតីរុស្ស៊ី ទៅកាន់កន្លែងណាៗ ក្នុងប្រទេសខ្លួន គឺមានតែរូបគាត់ប៉ុណ្ណោះ ដែលជា អ្នកមានសិទ្ធិ កំណត់ដោយម្ចាស់ការណ៍ខ្លួនឯង។
តបនឹង ពាក្យអះអាងជាសាធារណៈកាន់តែញឹកញយ ឡើង ពីខាងពួកមន្ត្រីថ្នាក់ជាន់ខ្ពស់ៗ នៃមជ្ឈដ្ឋានកាន់អំណាចនៅជប៉ុន ដែលថាកោះចំនួន៤ នៅខាងត្បូងជួរកោះ Kouriles គឺបន្ត ស្ថិតនៅជា “ដែនដីប៉ែកខាងជើង “ របស់រដ្ឋជប៉ុនដដែល ក្រសួងការបរទេសរុស្ស៊ីយល់ថា ជាការចាំបាច់ ដែលត្រូវក្រើនរំលឹកប្រាប់ភាគីជប៉ុនជាថ្មីថា កោះ Kourilesខាងត្បូងចំនួន៤នោះ គឺកោះ Habomai Shikotan Kounashir Itourup ជាដែនដីរបស់សហព័ន្ធរុស្ស៊ី ដែលឆ្លើយស្រប ទាំងស្រុងនឹងស្ថានការណ៍អន្តរជាតិពិតជាក់ស្តែង កើតឡើងក្រោយពីសង្គ្រាមលោកលើកទី២ បានចប់ទៅក្នុងឆ្នាំ១៩៤៥ ហើយទាំងក្នុង លក្ខន្តិកៈរបស់អង្គការសហប្រជាជាតិ ក៏មានចែងថា កោះទាំង៤នេះបច្ចុប្បន្ន ជាកម្មសិទ្ធិស្របច្បាប់របស់រុស្ស៊ី។
គួរនិយាយថា ក្នុងសង្គ្រាមនោះ មេដឹកនាំសូវៀត Staline ដែលសុខចិត្តបញ្ជូនទ័ពសូវៀតឲ្យទៅច្បាំងនៅខាងសម្ព័ន្ធមិត្តអាមេរិកាំងនិងអង់គ្លេស ទល់នឹងជប៉ុនកាលណោះ គឺតែក្នុងល័ក្ខខ័ណ្ឌដែលថា កាលណាជប៉ុន ចាញ់សង្គ្រាម កោះទាំងនោះត្រូវតែឆ្លងមកជា កម្មសិទ្ធិរបស់សហភាពសូវៀត ដូចដែលមានចែង ដោយសន្និសិទកំពូលនៃ មហាអំណាច ទាំង៣នោះ នៅក្រុង yalta ក្នុងខែសីហាឆ្នាំ១៩៤៥។
ហើយថ្ងៃ ២កញ្ញាឆ្នាំ ១៩៤៥ ជប៉ុនដែលចាញ់សង្គ្រាមនោះ បានចុះហត្ថលេខាសុំចុះចាញ់មែន។ ដោយមករឿងកោះនៅជាប់វិវាទនេះ រហូតមកទល់សព្វថ្ងៃ ជប៉ុននៅតែមិនព្រមចុះ ”សន្ធិសញ្ញាសន្តិភាព” ជាមួយរុស្ស៊ីនៅឡើយ ហេតុដែលមានន័យថា រវាងប្រទេសទាំង២ នៅតែរក្សាទុកដដែល របស់ដែលហៅថា “ ភាពសង្គ្រាមនឹងគ្នា “។
អ្នកនាំពាក្យផ្លូវការនៃក្រសួងការបរទេសរុស្ស៊ី ក្នុង Briefing ម្សិលមិញក៏ថ្លែងដែរថា៖ ក្នុងផលប្រយោជន៍នៃការអភិវឌ្ឍន៍ ទំនាក់ទំនងរុស្ស៊ី-ជប៉ុន ឲ្យល្អឡើង ទីក្រុង Tokyo គួរតែចៀសវាងឈប់បន្លឺទៅ នូវគោលជំហរខ្លួន ដែលមិនអំណោយផលសោះ ដែលនាំ ទៅកាន់ភាពទ័លច្រកទេតើ រួចអំណោយផលជាង បើ គូភាគី ពង្រឹងសហប្រត្តិការនឹងគ្នាទៅ ក្នុងកិច្ចការអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ