រុស្ស៊ីនឹងបង្ហោះទៅស្ថិតប្រចាំការនៅអវកាសគឺស្ថានីយដែលដើរតួជាសណ្ឋាគារ
ដំណឹងស្តីអំពីការបង្កើតសណ្ឋាគារដែលមិនធ្លាប់មានដូចនេះ បានត្រូវប្រកាសល្ងាចមិញដោយក្រុមហ៊ុនរុស្ស៊ីឈ្មោះ “ Orbital Technologies “ ដែលមានឯកទេសខាងស្ថាបនាសំណង់នៅអវកាស។ ដោយសហការជាមួយក្រុមហ៊ុនរុស្ស៊ីខាងបង្ហោះកាំជ្រួចពាំផ្ទុកទៅអវកាស ឈ្មោះ “ Energie “ ស្ថានីយជាសណ្ឋាគារនោះត្រូវគ្រោងបង្ហោះចេញទៅក្នុងឆ្នាំ២០០៦។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
តាមការរៀបរាប់ឲ្យដឹងនៃលោកSerguei Kostenko ជានាយកក្រុមហ៊ុន“ Orbital Technologies “គំនិតបង្កើតសណ្ឋាគារនេះកំពុងតែលេចចេញជារូបរាងជាក់លាក់មែនគឺថា យានModuleទី១ នៃអនាគតសណ្ឋាគារដែលមានទំហំជិត ២០ម៣ គឺត្រូវគ្រោងសង់ឡើងនៅឆ្នាំ២០១២-២០១៣ចំណែកការបង្ហោះវាទៅអវកាសគឺនឹងប្រព្រឹត្តទៅនៅដំណាច់ឆ្នាំ ២០១៥ឬដើមឆ្នាំ២០១៦។ ការស្រាវជ្រាវនិងការបង្កើតយាន Module នោះគឺទទួលរ៉ាប់រងបំពេញដោយសហគ្រាសរោងចក្រនៃក្រុមហ៊ុន“ Energie “។ នៅលើផ្លូវនេះមានចុះជាកិច្ចព្រព្រៀងមួយចំនួនទៅហើយស្តីអំពីភាពជាដៃគូរវាងក្រុមហ៊ុន“Orbital Technologies“ ក្រុមហ៊ុន “ Energie “និងទីភ្នាក់ងារអវកាសរុស្ស៊ី “ RosCosmos “។
ពីចំណែកខ្លួនវិញអគ្គនាយកក្រុមហ៊ុន “ Energie “លោក Vitali Lopota បានថ្លែងឲ្យដឹងថា ក្រុមហ៊ុនគាត់ ត្រៀមក្លាយទៅជាអ្នកម៉ៅការសរ៉ុបខាងបំពេញគម្រោងដ៏ធំធេងសំបើមនោះ ដ្បិត ក្រុមហ៊ុននេះ អស់ជាង១០ឆ្នាំហើយតែងធ្វើការងារខាងសាងសង់ស្ថានីយសំរាប់ហោះជាប្រចាំនៅអវកាស។ រីឯអ្នកគ្រប់គ្រងកម្មវិធីរបស់ទីភ្នាក់ងារRosCosmos ខាងបង្ហោះអវកាសយានិកទៅធ្វើការក្នុងស្ថានីយអវកាសអន្តរជាតិហៅថា SSI ដែលសព្វថ្ងៃហោះជាប្រចាំនៅកំពស់ ៣៦០គ.ម. ជុំវិញផែនដីគឺលោក Alexei Krasnov ពន្យល់បំភ្លឺថា អនាគតសណ្ឋាគារនោះ ក៏អាចទទួលឲ្យស្នាក់នៅគឺអ្នកអវកាសណា ដែលត្រូវការសំរាកក្រោយពីគេបំពេញការងារអស់យូរពេលក្នុងស្ថានីយ SSI។ គឺកាំជ្រួចពាំផ្ទុកធុន Soyuz របស់រុស្ស៊ី ដែលនឹងដឹកទេសចរទៅកាន់អានាគតសណ្ឋាគារនោះ។
ចំណែកស្បៀងអាហារទឹកនិងរបស់ប្រើប្រាស់ផ្សេងៗ នឹងត្រូវដឹកទៅ គឺដោយកាំជ្រួចពាំផ្ទុក ធុន Progress។ សណ្ឋាគារនោះដែលនឹងមាន៤បន្ទប់អាចទទួលភ្ញៀវឲ្យស្នាក់នៅដល់៧នាក់។ ទោះបី ឥតមានប្រកាសតើសណ្ឋាគារនោះនឹងស្ថិតជាប្រចាំនៅអវកាសក្នុងកំពស់ណាៗក្តី ក៏គេដឹងជាមុនទៅហើយ ថាកំពស់នោះត្រូវតែខ្ពស់ជាង១០៣គ.ម. ទើបអាចសន្មត់ថា ជាលំហអវកាសទៅកើតដ្បិតលុះចាប់ពីកំពស់នេះទៅទើបលែងមានទំនាញរបស់ផែនដី។
ប្រទេសរុស្ស៊ីពូកែខាងបង្កើតយាន Moduleប្លែកៗ ដែលតាំងពីទសវត្សទី៨០ម៉្លេះបានត្រូវបង្ហោះជាបន្តបន្ទាប់ទៅផ្គុំដំឡើងជាស្ថានីយហោះជាប្រចាំនៅអវកាស។ ល្បីជាងគេគឺស្ថានីយ Mir ដែលចាប់ពីកណ្តាលទសវត្សទី៩០មកបានទទួលអ្នកអវកាសដល់១០៤នាក់ តំណាងឲ្យ១២ប្រទេសស្នាក់នៅធ្វើការទំរាំវាបានត្រូវពន្លិចទៅក្នុងមហាសមុទ្ទPacifiqueនៅខែមីនាឆ្នាំ២០០១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ