មហាអយ្យការប្រឆាំងនឹងភេរវនិយមនៅParis
ការគំរាមរបស់ពួកភេរវជនថានឹងធ្វើភេរវកម្ម នៅប្រទេសបារាំងតែងតែមានលក្ខណៈខ្ពស់ណាស់ជានិច្ច។ លោករដ្ឋមន្ត្រីក្រសួងមហាផ្ទៃ Brice Hortefeux អះអាងថា ស្មារតីប្រុងប្រយ័ត្នវាងវៃត្រូវបានបង្កើនថែមទៀត ហើយផែនការប្រឆាំងនឹងភេរវកម្មហៅថាVigipirateកំរិតក្រហមគឺកំរិត ខ្ពស់នៅតែដំណើរការ។ មហាអយ្យការប្រឆាំងនឹងភេរវនិយមនៅParisបានទាំងបើកការស៊ើបអង្កេតជា ដំបូងមួយ ដើម្បីមើលបញ្ជាក់តើពិតឬពុំពិតព័ត៌មានសម្ងាត់មួយស្តីពីស្ត្រី ម្នាក់ដែលត្រូវគេមន្ទិលសង្ស័យថាចង់ធ្វើអំពើភេរវកម្មអត្តឃាត នៅរដ្ឋធានីParisនៃប្រទេសបារាំង។
ចុះផ្សាយនៅថ្ងៃ៖
សេចក្តីរាយការណ៍របស់ វីនស្តុន រតនា
ប្រទេសអាល់ហ្សេរី នៅពាក់កណ្តាលសប្តាហ៍មុន បានបញ្ជូនព័ត៌មានសម្ងាត់មកឱ្យប្រទេសបារាំងដឹងអំពីស្ត្រីម្នាក់ដែលបម្រុងនឹងប្រព្រឹត្តអំពើភេរវកម្មមួយ នៅរដ្ឋធានីParisនៃប្រទេសបារាំង។នាយកដ្ឋានកណ្តាលខាងស៊ើបការណ៍សម្ងាត់ផ្ទៃក្នុងប្រទេសបារាំងហៅកាត់ថា DCRI បានប្រកាសអាសន្នប្រាប់ទីស្តីការនាយករដ្ឋមន្ត្រី Matignonនិងវិមានប្រធានាធិបតី Elyséeឱ្យដឹងជាបន្ទាន់ភ្លាម។
ផែនការប្រឆាំងនឹងភេរវកម្មហៅថា Vigipirateត្រូវបានពង្រឹងថែមទៀត ប៉ុន្តែនៅដំណើរការកំរិតក្រហមជាកំរិតចុងក្រោយមុននឹងឡើងទៅដល់កំរិតខ្ពស់បំផុតគឺក្រហមជាំក្នុងករណីមានគ្រោះថ្នាក់ភេរវកម្មក្នុងពេលឆាប់ៗខាងមុខនេះ។ស្ត្រីវ័យក្មេងត្រូវបានពួកអ្នករដ្ឋការប្រឆាំងនឹងភេរវនិយមស្វែងរកចាប់ខ្លួនជានិច្ច។ដូច្នេះ ការស៊ើបអង្កេតជាដំបូងមួយត្រូវបានបើកដោយមហាអយ្យការប្រឆាំងនឹងភេរវនិយម ដើម្បីមើលបញ្ជាក់តើពិតឬពុំពិត ព័ត៌មានសម្ងាត់ទាំងនេះ។
ក្រុមអ្នកស៊ើបអង្កេតបារាំងក៏បញ្ជាក់ប្រាប់ដែរថាបណ្តាញ jihadពីរគឺបណ្តាញយុទ្ធជនអ៊ីស្លាមតាមមាគ៌ាអាទិទេពដែលបាននៅសម្ងំស្ងៀមស្ងាត់និងមានធនធានហិរញ្ញវត្ថុនៅប្រទេសបារាំង ប្រហែលជាបានភ្ញាក់រលឹកនាពេលថ្មីៗ ជាមួយការមកដល់លើទឹកដីប្រទេសបារាំងនៃពួកអ៊ីស្លាមនិយមជ្រុលជាច្រើនដែលប្រាកដជាមកពីតំបន់ព្រំដែនប៉ាគីស្តង់និងអាហ្វហ្កានិស្តង់។
ក្រសួងស៊ើបការណ៍សម្ងាត់បារាំងយល់ឃើញថាព័ត៌មានទាំងអស់នេះនាំឱ្យគិតអំពីការគំរាមកំរិតខ្ពស់ណាស់ពីសំណាក់ពួកភេរវជន។
លោកនាយកប្រតិចារកិច្ចបារាំង Bernard Squarcini អះអាងថាការគំរាមនឹងធ្វើភេរវកម្ម នៅលើដែនដីបារាំងនេះពុំដែលធំធេងដូចនៅសព្វថ្ងៃនេះទេនិងអះអាងថា ប្រទេសបារាំងស្ថិតនៅក្រោមការគំរាមមួយដ៏ធំពីខាងពួកភេរវជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ