សម័យប្រជុំលើកទី៦០នៃការិយាល័យអឺរ៉ុបរបស់អង្គការសុខភាពពិភពលោក
គឺជាលើកទី ១ ដែលសម័យប្រជុំនេះបើកធ្វើការងារខ្លួននៅរដ្ឋធានីរុស្ស៊ី ដោយមានវត្តមានផ្ទាល់ នៃរូបលោកនាយករដ្ឋមន្ត្រីរុស្ស៊ី Vladimir Poutine។ ចូលរួមក្នុងការងារសម័យប្រជុំដែលនឹងប្រព្រឹត្តទៅរយៈពេល៣ថ្ងៃ គឺមានប្រតិភូ ៧៥០នាក់តំណាងឲ្យ៥៣ប្រទេស-សមាជិកការិយាល័យអឺរ៉ុប។ បញ្ហាមួយដ៏ចំបង ក្នុងរបៀបវារៈប្រចាំថ្ងៃ គឺ ភាពក្រីក្រដែលជា ការគំរាមធំមែនទែនដល់សុខភាពមនុស្ស។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ជាបឋមគួរនិយាយថា ការិយាល័យអឺរ៉ុប របស់ អង្គការសុខភាពពិភពលោក គ្រាន់តែជា ការិយាល័យមួយ ពីក្នុងចំណោមការិយាល័យតំបន់សរុបទៅចំនួន៦ របស់អង្គការសុខភាពពិភពលោក ហៅកាត់ថា OMS ដែលជាស្ថាប័នមួយរបស់អ.ស.ប. ដំណើរការតាំងពីឆ្នាំ១៩៤៨ម៉្លេះ មានទីស្នាក់ការនៅឯក្រុង Genève។ ការិយាល័យផ្ទាល់ រួមប្រជុំ១ឆ្នាំម្តង ហើយឆ្នាំនេះគឺដល់វេនប្រទេសរុស្ស៊ី ធ្វើជាម្ចាស់ផ្ទះទទួលឲ្យប្រព្រឺត្តទៅនៅក្នុងក្រុងម៉ូស្គូ។
ចូលរួមក្នុងការងារនៃសម័យប្រជុំលើកនេះ គឺមានលោកស្រី Margaret Chan អគ្គនាយក OMS លោកស្រី Jujanna Jacub នាយកការិយាល័យអឺរ៉ុបរបស់ OMS លោក John Dalli ស្នងការគណៈកម្មការអឺរ៉ុបខាងបញ្ហាសុខាភិបាលនិងខាងការពារសិទ្ធិអតិថិជន លោកស្រី Tatiana Golikova រដ្ឋមន្ត្រីក្រសួងសុខាភិបាលនិងអភិវឌ្ឍន៍សង្គមនៃសហព័ន្ធរុស្ស៊ី។
គិតជាសរុប គឺមាន ប្រតិភូ ៧៥០នាក់តំណាងឲ្យក្រសួងមន្ទីរពាក់ព័ន្ធនៃ ៥៣ប្រទេសសមាជិកការិយាល័យអឺរ៉ុប ពីក្នុងនោះ ជាង៣០នាក់ជារដ្ឋមន្ត្រីក្រសួងសុខាភិបាល ព្រមទាំងបណ្តាតំណាង២០ប្រទេស- សង្កេតការមកពីតំបន់ឯទៀតនៃពិភពលោក និងបណ្តាតំណាងអង្គការអន្តរជាតិប្លែកៗ។
ក្នុងបទអន្តរគមន៍ថ្លែងថ្ងៃនេះពីលើវេទិកាសម័យប្រជុំ លោកនាយករដ្ឋមន្ត្រីរុស្ស៊ី Vladimir Poutine បានលើកឡើងអំពីសម្មិទ្ធិផល ដែលរដ្ឋាភិបាលគាត់ ចេះសំរេចបានក្នុងវិស័យសុខាភិបាល បែបយ៉ាងខាងសាងសង់កាន់តែច្រើនឡើងៗ មន្ទីរពេទ្យ មន្ទីរសំរាលកូន ផ្តោត ការយកចិត្តទុកដាក់ទៅលើការកែឆ្នៃកាន់តែប្រសើរឡើង គុណភាពថ្នាំពេទ្យ រួចជាលទ្ធផល អត្រាមរណៈ បានថយចុះទៅ ចំណែកអត្រាកំណើតបានកើនឡើង ហើយអាយុមធ្យមរបស់ប្រជាពលរដ្ឋរុស្ស៊ី ក្នុង៥ឆ្នាំចុងក្រោយ បានកើនឡើង៣ឆ្នាំពី៦៦ឆ្នាំដល់៦៩ឆ្នាំ។
លោក Poutine ក៏បានរំលឹកដែរថា ប្រទេសរុស្ស៊ី បានរួមវិភាគទានអស់ ៤៣០លានដុល្លារអាមេរិកទៅហើយ ទៅក្នុងហិបប្រាក់របស់អង្គការសុខភាពពិភពលោក។ លោក Poutine បានជូនពរឲ្យសម័យប្រជុំលើកទី៦០ នៃការិយាល័យអឺរ៉ុប របស់ OMS ធ្វើការងារខ្លួនបានយ៉ាងជោគជ័យ។
ក្នុងរយៈពេល៣ថ្ងៃនៃការងារខ្លួន សម័យប្រជុំនេះ លើកយកទៅពិភាក្សា គឺបញ្ហាប្រកបដោយបច្ចុប្បន្នភាពនៃវិស័យសុខាភិបាល ពីក្នុងនោះប្រធានបទដ៏ចំបង គឺ៖
“ អំពីភាពក្រីក្រ ដែលជាការគំរាមធំមែនទែន ដល់សុខភាពមនុស្ស“។
តាមទិន្នន័យ អង្គការសុខភាពពិភពលោក គម្លាតនៃអាយុមធ្យម រវាងបណ្តាប្រទេសតំបន់អឺរ៉ុបរបស់អង្គការOMS គឺដល់ទៅ២១ឆ្នាំឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ