លោក Poutine អាចចូលប្រឡូកវិញក្នុងការបោះឆ្នោតប្រធានាធិបតីឆ្នាំ២០១២
សេចក្តីនេះបានត្រូវបង្ហើបឲ្យដឹងនៅឯក្រុងSotchiមាត់សមុទ្ទខ្មៅទៅកាន់ពួកអ្នកជំនាញការនៃក្លឹបអន្តរជាតិក្រោមឈ្មោះថា Valdai ដោយលោកនាយករដ្ឋមន្ត្រី Poutine ដែលធ្លាប់ធ្វើជាប្រធានាធិបតីរុស្ស៊ី អស់២អាណត្តិទៅហើយពីឆ្នាំ ២០០០ ដល់២០០៨។ សាច់រឿងនេះឥឡូវក្លាយជាបទអត្ថាធិប្បាយនៃកាសែតបស្ចិមលោកក្នុងន័យថា៖ពេលដែលដឹងថាចៅហ្វាយចាស់អាចវិលត្រឡប់វិញពួកការិយាធិបតេយ្យទំនងជានាំគ្នាព្រងើយកន្តើយចំពោះលោកMedvedev ជាប្រធានាធិបតីបច្ចុប្បន្ន។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ជាបឋមកាសែតអង់គ្លេស The Guardian សរសេរ៖លោក Poutine ទើបស៊ីញ៉ូឲ្យដឹងថា គាត់នឹងអង្គុយយ៉ាងយូរជាថ្មីម្តងទៀតក្នុងតំណែងជាប្រធានាធិបតីរុស្ស៊ី។ ពិភពលោកនឺងបង្ខំចិត្តទម្លាប់ទៀតហើយនឹងប្រព័ន្ធគ្រប់គ្រង កាលដែលអំណាចនឹងផ្តុំតែនៅក្នុងដៃរបស់គាត់ប្រព័ន្ធអំណាចនោះនឹងច្របាច់ក បន្ថប់ដង្ហើមពួកប្រឆាំងនយោបាយ។ សឲ្យឃើញថាPoutineអាចចូលប្រឡូកវិញ ក្នុងការបោះឆ្នោតប្រធានាធិបតី ឆ្នាំ២០១២គឺគាត់លើកយកមកបង្ហាញជាឧទាហរណ៍ រូបលោក Franklin Roosevelt ដែលបានជាប់ឆ្នោតដល់ទៅ៤លើកឯណោះ ធ្វើជាប្រធានាធិបតីដឹកនាំ ស.រ.អា គឺក្នុងឆ្នាំ ១៩៣៣ ១៩៣៦ ១៩៤០ ១៩៤៤។
តាមមតិកាសែតអាមេរិកាំង The New York Times ការរំលឹកឈ្មោះលោក Roosevelt គឹមានន័យ ថា Poutine កំពុងចាក់គ្រឹះសំរាប់ការវិលត្រឡប់ទៅកាន់វិមានក្រេមឡាំងវិញ និងក៏ជាល្បិចមួយញ៉ាំងឲ្យគេនិយាយអំពីអនាគតនយោបាយគាត់ មិនមែនក្នុងឋានៈជា“ ទាកំបាក់ជើង “ ឯណា។
ចំណែកកាសែតអង់គ្លេសThe Financial Times ចោទជាសំនួរ ៖ ហេតុដូចម្តេចបានជាអង្គប្រជុំលើកនេះនៃក្លឹបអន្តរជាតិក្រោមឈ្មោះថាValdaiស្រាប់តែប្រព្រឹត្តទៅដោយគ្មានការចូលរួមនៃប្រធានាធិបតីរុស្ស៊ីដូចលើកមុនៗប៉ុន្តែបែរទៅជាមានលោកនាយករដ្ឋមន្ត្រីPoutine ចូលរួមទៅវិញ? ចម្លើយដែលមានគឺយោងទៅលើការបកស្រាយគួរឲ្យភ្ញាក់ផ្អើលដែលថា Poutine ដែលកំពុងរៀបចំខ្លួនវិលត្រឡប់យ៉ាងសន្សឹមៗទៅកាន់អំណាចនៅវិមានក្រេមឡាំងវិញបានបញ្ជា ទៅលោកMedvedev កុំឲ្យវត្តមានមានមុខអីក្នុងអង្គប្រជុំនោះ។
គួររំលឹកថា ក្លឹប Valdai បានប្រសូតមកក្នុងឆ្នាំ២០០៤សំរាប់ពួកអ្នកជំនាញការអន្តរជាតិ សិក្សាអំពីនយោបាយក្នុងនិងក្រៅប្រទេសរបស់រុស្ស៊ី។ វាតែងរួមប្រជុំមួយឆ្នាំម្តងក្រោមអធិបតីភាពប្រមុខរដ្ឋរុស្ស៊ី។ តាមយោបល់ទស្សនាវដ្តីអង់គ្លេស The Times ការវិលត្រឡប់វិញនៃលោកPoutine តាំងគោលដៅបង្ហាញឲ្យពិភពលោកឃើញថា រូបPoutineគឺមានន័យជាស្ថិរភាពសំរាប់ប្រទេសរុស្ស៊ី។
កាសែតអាមេរិកាំង The Wall Street Journal លើកយកមកសូត្រនូវសំដីPoutineបន្លឺឡើងក្នុងក្លឹបValdaiដែលស្ញប់ស្ញែងនឹងរូបលោកប្រធានាធិបតីអាមេរិកBarack Obama ជាមនុស្សដែលគិតឃើញយ៉ាងម៉េចនិយាយយ៉ាងនុ៎ងនិងថា ថ្នាក់ដឹកនាំរុស្ស៊ីនិង លោកObama ប្រកាន់ទស្សនៈយល់ឃើញដូចគ្នាចំពោះបញ្ហាពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ