អគ្គិភ័យឆេះព្រៃដែលលត់ជិតអស់ទៅហើយ ស្រាប់តែឆេះវិញយ៉ាងខ្លាំង
លើកនេះឆេះនៅខេត្ត Volgograd ចម្ងាយប្រមាណ ៩០០គ.ម.អគ្នេយ៍ពីរដ្ឋធានីម៉ូស្គូ ទាល់តែអាជ្ញាធរខេត្តនោះ ប្រកាសភាពអាសន្នតែម្តង ក្រោយពីវាបានផ្តាច់ជីវិតមនុស្សដល់ទៅ ៥នាក់ និងបានលេបត្របាក់អាគារប្លែកៗ អស់ចំនួនជាង ៥០០ ពីក្នុងនោះ ផ្ទះអ្នកស្រុក អស់ ៤៧៤ខ្នងឯណោះ។ លោកប្រធានាធិបតី Medvedev បានផ្ទុកផ្តាក់ឲ្យផ្តល់ជំនួយចាំបាច់ ជាបន្ទាន់ដល់ប្រជាពលរដ្ឋដែលរងគ្រោះ។
ចុះផ្សាយនៅថ្ងៃ៖
មូលហេតុនៃអគ្គិភ័យធម្មជាតិលើកនេះ តាមសេចក្តីសន្និដ្ឋានធ្វើដោយក្រសួងខាងស្ថានការណ៍អាសន្ន គឺមកពីរសៀលម្សិលមិញ ខ្សែពួរលួសដែលនាំចរន្តអគ្គិសនីកម្លាំងភ្លើងជាច្រើន Kilovolt វាដាច់ភឺសៗ ដោយត្រូវខ្យល់បោកបក់សែនខ្លាំងរហូតដល់ល្បឿន ៣០ម៉ែត្រឯណោះក្នុង ១វិនាទី។ ពេលដាច់នោះ វាខ្ទៀតសាចចេញជាផ្កាភ្លើងរាប់មិនអស់ ហើយទៅប៉ះ ស្មៅស្ងួតស្រាប់នៅលើដី ក្រោមចំហាយធាតុអាកាសក្តៅហួតហែងអស់យ៉ាងយូរនៅខេត្តនេះ ក៏ដូចជានៅតាមខេត្តមួយចំនួននៃភូម៌ភាគប៉ែកខាងលិចប្រទេសរុស្ស៊ី ហេតុដែលបណ្តាលឲ្យវាឆេះសព្វទិសលត់លែងទាន់។
ជាតុល្យាការ គិតមកទល់ព្រឹកថ្ងៃនេះ ភ្លើងនោះបានឆាបឆេះ លើផ្ទៃដី ២០០ហិកតា ដោយផ្តាច់ជីវិតមនុស្សអស់ដល់ ៥នាក់ និងបំផ្លាញនៅតាមទីប្រជុំជន ២០កន្លែង អស់សំណង់ចំនួន ៥៣២ ពី ក្នុងនោះ ផ្ទះអ្នកស្រុកអស់ ៤៧៤ខ្នង បណ្តាលឲ្យពលរដ្ឋជិត ១.០០០នាក់បាត់បង់លំនៅខ្លួន។ សំរាប់អ្នកស្រុកអភ័ព្វទាំងនេះ មានបង្កើតបានយ៉ាងលឿនដូចចិត្ត ជាជំរំ ៩កន្លែង ក្នុងឋានៈ ជាជំរកបណ្តោះអាសន្នរបស់គេ ព្រមទាំងផ្គត់ផ្គង់ឲ្យគេ មានអាហារទទួលទានជាប្រចាំ។
ស្របនឹងការផ្ទុកផ្តាក់នៃលោកប្រធានាធិបតី Medvedev តាំងពីព្រឹកមិញទៅហើយ លោក នាយករដ្ឋមន្ត្រី Poutine នាកិច្ចប្រជុំឧទ្ទិសដល់ស្ថានការណ៍អាសន្ននោះ បានប្រកាសឲ្យដឹងថា រដ្ឋាភិបាលរំលែកចេញពីថវិកាជាតិបន្ថែមទៀត នូវទឹកប្រាក់ ១.០០០លានរូប្ល ឬ ស្មើនឹង ៣២លាន ៥សែនដុល្លារអាមេរិក សំរាប់យកទៅ សង់លំនៅថ្មីឲ្យអ្នកដែលលែងមានដំបូលជ្រក បណ្តាលមកពីអគ្គិភ័យ យកទៅជួយប៉ះប៉ូវថ្លៃទ្រពសម្បត្តិដែលគេបាត់បង់ទៅក្នុងអណ្តាតភ្លើងវា និងយកទៅសាងសង់ឡើងវិញហេដ្ឋារចនាសម្ព័ន្ធនៅត្រង់កន្លែងអាសន្នអន់ក្រ។
ភាពអាសន្នដែលប្រកាសនៅខេត្ត Volgograd ស្ថិតនៅមាត់ទន្លេ Volga ក៏ដោយមកពីក្នុងខេត្តនេះ មានស្ថានីយអគ្គិសនីបរមាណូដំណើរការ។ ប៉ុន្តែ ក្រោយពីមានអន្តរគមន៍យ៉ាងសកម្ម តាំង ពីព្រឹកមិញមកនៃយន្តហោះលត់ភ្លើង និង អ្នកលត់ភ្លើងនៅលើដីផ្ទាល់ដល់ទៅ ១.៥០០នាក់ គឺ មានជំនះបានទៅហើយ លើអគ្គិភ័យណា ដែលជាគ្រោះថ្នាក់ដល់ទីប្រជុំជន។
ដោយមិនគិតតួលេខថ្ងៃនេះសរុបទៅក្នុងរដូវក្តៅឆ្នាំនេះ នៅរុស្ស៊ីមានភ្លើងឆេះព្រៃចំនួន ៣ម៉ឺនកន្លែង នៅតាម ២២ខេត្ត លើផ្ទៃក្រឡាជិត ១លានហិកតា ដោយកំទេចផ្ទះអ្នកស្រុកអស់ ២.៥០០ខ្នង និងពលរដ្ឋ ៥៣នាក់បានធ្លាក់ខ្លួនស្លាប់ក្នុងអណ្តាតភ្លើងរបស់វា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ