អ.ស.ប.អំពាវនាវប្រទេសបារាំងឱ្យ “ ចៀសវាង “ ការធ្វើមាតុភូមិនិវត្តន៍ជនជាតិ Roms ទាំងក្រុមៗ
អង្គការសហប្រជាជាតិបានថ្កោលទោសការបណ្តេញចេញជនជាតិ Romsទាំងក្រុមៗ។ បន្ទាប់ពីអឺរ៉ូប បុរីវ៉ាទីកង់និងអង្គការការពារសិទ្ធិមនុស្ស មានការទិតៀនរិះគន់កាន់តែច្រើនឡើងចំពោះការរឹតបន្តឹងនយោបាយប្រឆាំងនឹងជនជាតិ Romsដែលជម្រុញដោយលោកប្រធានាធិបតីបារាំង នីកូឡា សាកូហ្ស៊ី(Nicolas Sarkozy) កាលពីមួយខែមុន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
“ ចៀសវាង “ ការបណ្តេញចេញជនជាតិ Romsទាំងក្រុមៗ : នេះគឺជាអនុសាសន៍មួយដែលគណៈកម្មាធិការដើម្បីបំបាត់ការរើសអើងខាងជាតិសាសន៍( ហៅកាត់ថាCERD ) របស់អ.ស.ប. បានធ្វើចំពោះប្រទេសបារាំង នៅថ្ងៃសុក្រម្សិលមិញ២៧សីហា នៅឱកាសបិទសម័យប្រជុំលើកទី ៧៧របស់ខ្លួន នៅទីក្រុងGenève បន្ទាប់ពីការតស៊ូមតិបីសប្តាហ៍មក។ គណៈកម្មាធិការក៏សំដែងក្តីព្រួយបារម្ភដែរអំពី “ សុន្ទរកថានយោបាយប្រកបដោយលក្ខណៈរើសអើង“។ គណៈកម្មាធិការ ដំណាលពេលគ្នា ក៏ខ្វល់ខ្វាយចិត្តខ្លាំងណាស់ ដោយកត់សំគាល់ឃើញ “ កំណើននាពេលថ្មីៗនៃទង្វើនិងការសំដែងចេញប្រកបដោយលក្ខណៈប្រកាន់ជាតិសាសន៍និងស្អប់ជនបរទេស “។
គណៈកម្មាធិការបានបន្ទោសប្រទេសបារាំងរួចហើយ កាលពីថ្ងៃ ១២សីហាមុន នៅឱកាសពិនិត្យសំណុំរឿងរបស់បារាំង។ ១៥ថ្ងៃក្រោយមក ការកត់សំគាល់របស់គណៈកម្មាធិការCERD ត្រូវបានសំដែងចេញជាផ្លូវការជាងមុន។ នីតិវិធីប្រកាសអាសន្ននឹងត្រូវធ្វើដោយគណៈកម្មាធិការ។ ជានីតិវិធីពិសេសដែលត្រូវធ្វើឡើងតែក្នុងករណី “ ការរើសអើងខាងជាតិសាសន៍ដ៏ច្រើនសន្ធឹកសន្ធាប់ “ -នេះជាការបញ្ជាក់ប្រាប់របស់អ្នកធ្វើរបាយការណ៍ពិសេសទទួលបន្ទុកខាងប្រទេសបារាំងគឺជនជាតិអាមេរិកាំង Pierre-Richard Prosper។ ប៉ុន្តែ គណៈកម្មាធិការបានទទួលស្គាល់ថា បញ្ហាជនជាតិ Romsពុំមែនគ្រាន់តែជាបញ្ហាបារាំងប៉ុណ្ណោះទេ ប៉ុន្តែក៏ជាបញ្ហាអឺរ៉ូបដែរ។ គណៈកម្មការនិងក្រុមប្រឹក្សាអឺរ៉ូបនឹងត្រូវគណៈកម្មាធិការរបស់ អ.ស.ប. ប្រកាសអាសន្នឱ្យដឹងជាផ្លូវការ ចាប់ពីថ្ងៃសុក្រ ២៧សីហា។
អង្គការដូចយ៉ាងសម្ព័ន្ធការពារសិទ្ធិមនុស្ស ( ហៅកាត់ថាLDH )ឬក៏សហព័ន្ធអន្តរជាតិការពារសិទ្ធិមនុស្ស ( ហៅកាត់ថា FIDH ) រីករាយនឹងការសង្កេតឃើញប្រទេសបារាំងពីខាងអ.ស.ប.។ រដ្ឋាភិបាលបារាំង បានបញ្ចេញប្រតិកម្មតប-តវិញភ្លាម។ ការបណ្តេញចេញនេះធ្វើដោយ “ គោរពឥតល្អៀងច្បាប់អឺរ៉ូបនិងការជាប់ពាក់ព័ន្ធជាអន្តរជាតិរបស់ខ្លួន “ -នេះជាការអះអាងឡើងវិញរបស់អ្នកនាំពាក្យនៃក្រសួងការបរទេសគឺលោក Bernard Valero។ “ រាល់ការចាកចេញដំណើរធ្វើទៅតាមករណីជនម្នាក់ៗ និងដោយមានការជួយឩបត្ថម្ភសំរាប់ការវិលត្រឡប់ទៅវិញ “ -នេះជាការគូសបញ្ជាក់ជាថ្មីម្តងទៀតរបស់ក្រសួងការបរទេស ជាប្រតិកម្មតបចំពោះការកត់សំគាល់របស់គណៈកម្មាធិការ CERD៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ