រុស្ស៊ីសាកប្រើផ្លូវសមុទ្ទទឹកកកនៅប៉ែកឧត្តរបំផុតសំរាប់ដឹកប្រេងកាតទៅប្រទេសចិន
ការសាកល្បងនេះប្រព្រឹត្តទៅគឺក្នុងបរិបទនៃ “ឯកសារជាយុទ្ធសាស្ត្រ “ អនុម័តដោយលោកប្រធានាធិបតី Medvedev តាំងពីឆ្នាំ ២០០៨ម៉្លេះ ដើម្បីទៅទល់ឆ្នាំ ២០២០ ប្រែប្រទេសរុស្ស៊ីឲ្យក្លាយទៅជា “ មហាអំណាចនាំមុខគេប្រចាំនៅតំបន់អក្ខោសានឧត្តរនោះ“។ទោះយ៉ាងណាក្តី ដោយយោងទៅលើអាកាសធាតុក្នុងលោក ដែលចេះតែឡើងកំដៅគ្មានឈប់ លុះទាល់តែទៅទល់ឆ្នាំ២០៥០អាចជំរុញឲ្យផ្ទាំងទឹកកកនៅអក្ខោសាន ឧត្តររលាយអស់រលីងហេតុដែលនឹងប្រែផ្លូវសមុទ្ទថ្មីនេះទៅជាផ្លូវ អន្តរជាតិកាត់តាមបណ្តោយឆ្នេរប្រទេសរុស្ស៊ីតែម្តង។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
សាច់រឿងគឺថា ទើបម្សិលមិញដែលជាលើកទី១ ទូរទស្សន៍ជាតិរុស្ស៊ី បញ្ចាំងឲ្យឃើញនាវាបំបែកទឹកកកពីរគ្រឿងដើរដោយថាមពលបរមាណូ បើកតាមបណ្តោយឆ្នេរប៉ែកខាងជើងបង្អស់នៃប្រទេសរុស្ស៊ី ដោយបំបែកផ្ទាំងទឹកកកជាបណ្តើរៗ៖ មួយវែកផ្លូវខាងស្តាំ មួយទៀតវែកផ្លូវខាងឆ្វេង បង្កើតជាប្រឡោះទឹកគ្រប់គ្រាន់ រាប់ការបើកបរ នៃនាវាឈ្មោះ Baltika ដែលបើកនៅពីក្រោយ ទាំងផ្ទុកទៅដោយប្រេងកាតឆៅយកទៅផ្តល់ឲ្យប្រទេសចិន។ តាមពិតក្បួននាវានេះបានចេញដំណើរពីផែ Mourmansk នៅឯឆ្នេរពាយ័ព្យប្រទេសរុស្ស៊ី តាំងពី១០ថ្ងៃមុនម៉្លេះ។
គោលដៅនៃការសាកល្បងបើកបរនេះ គឺដើម្បីវែកញែកបំភ្លឺ ៖ ទី១ តើផ្លូវសមុទ្ទទឹកកកនេះដែលនៅកន្លែងខ្លះមានជំរៅមិនជ្រៅទេ ហើយដែលក្រោយពីចប់ទៅរដូវក្តៅ នឹងរឹបទៅដោយ ផ្ទាំងទឺកកកម្រាស់ជាច្រើនម៉ែត្រឯណោះ អាចនឹងត្រូវប្រើឬទេជាផ្លូវសំរាប់ដឹកប្រេងកាតរុស្ស៊ីជារឿយៗទៅលក់ឲ្យ បណ្តាប្រទេស អាស៊ីបូព៌ានិងអាស៊ីអគ្នេយ៍ ដែលត្រូវការឥន្ធនៈ នេះកាន់តែច្រើនឡើងៗ សំរាប់ការលូតលាស់នៃសេដ្ឋកិច្ចជាតិខ្លួន។ ទី២ តើបញ្ហាសុវត្ថិភាពអាចធានាបានត្រឹមកំរិតណាដែរ? ប៉ុន្តែទី៣ ការប្រើផ្លូវនេះ ដែលមានប្រវែងតែ១៣.០០០គ.ម. គឺពិតជាចំណេញជាងប្រើផ្លូវដែលកុងតាមព្រែកជីក Suez រួចមានប្រវែងដល់ទៅ២២.០០០គម. ឯណោះ ទំរាំទៅដល់ប្រទេសចិន។
ទោះយ៉ាងណាក្តី ដោយយោងទៅលើអាកាសធាតុក្នុងលោក ដែលចេះតែឡើងកំដៅគ្មានឈប់ លុះទាល់តែទៅទល់ឆ្នាំ២០៥០អាចជំរុញឲ្យផ្ទាំងទឹកកកនៅអក្ខោសានឧត្តររលាយអស់រលីងហេតុដែលនឹងប្រែផ្លូវសមុទ្ទថ្មីនេះទៅជាផ្លូវអន្តរជាតិកាត់តាមបណ្តោយឆ្នេរប្រទេសរុស្ស៊ីតែម្តង។ ក្នុងខណៈនោះរុស្ស៊ីនឹងទទួលសិទ្ធិហូតពន្ធពីក្រុមហ៊ុននាវាចរណ៍បរទេសណាដែលនឹងប្រើផ្លូវនេះដូចដែលមកទល់ឥឡូវរុស្ស៊ីតែងហូតពន្ធបែបនេះ ពីក្រុមហ៊ុនអាកាសចរណ៍បរទេសណា ដែលយន្តហោះគេបើកឆ្លងកាត់តំបន់ Siberie របស់រុស្ស៊ី អ៊ីចឹង។
គួរនិយាយថា ក្នុងបរិបទនៃ “ ឯកសារជាយុទ្ធសាស្ត្រ “ អនុម័តយកដោយលោកប្រធានាធិបតី Medvedev ចំពោះតំបន់អក្ខោសានឧត្តរ ក៏មានទាំងការវាទដែនដីប្រទេសរុស្ស៊ីផងដែរ។ យ៉ាងណាមិញក្នុងឆ្នាំ២០០៧ពួកអ្នកប្រាជ្ញរុស្ស៊ីបានមុជទៅជំរៅ៤.០០០ម៉ែត្រទៅដោតទង់ជាតិរុស្ស៊ីនៅឯបាតសមុទ្ទត្រង់ចំណុចអក្ខោសានឧត្តរនោះ ហើយប្រកាសវាជាដីរបស់រុស្ស៊ីតែម្តងដោយ ធាតុផ្សំនៃដីនេះគឺវាដូចគ្នានឹងធាតុផ្សំនៃដីតំបន់ស៊ីបេរីបានន័យថា វាលយចេញពី តំបន់នេះឯងរបស់រុស្ស៊ី។ ដោយហេតុថាអក្ខោសានឧត្តរជាកំណប់ប្រេងកាតដល់ទៅ១៣%និងជាកំណប់ឧស្ម័នដល់ទៅ៣០%នៃភពផែនដីបានជាទន្ទឹមនិងរុស្ស៊ីក៏មានប្រទេសឯទៀតនៃតំបន់នោះ បែបយ៉ាង ស.រ.អា. កាណាដា ដាណឺម៉ាក ន័រវ៉ែហ្សឺ៍ ប្រជែងគ្នាចង់បានដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ