លើកនេះ គឺរោងចក្រខាងស្តុកធាតុនុយក្លេអ៊ែរ ដែលគំរាមដោយអគ្គិភ័យ
នេះគឺក្រោយពីមានបង្ក្រាបបានអគ្គិភ័យ ដែលបានគំរាមលើ មជ្ឈមណ្ឌលនុយក្លេអ៊ែ ២កន្លែងផ្សេង៖ មួយឈ្មោះ Sarov ក្នុងខេត្ត Mordovia នៅចម្ងាយប្រមាណ ៥០០គ.ម.អាគ្នេយ៍ពីម៉ូស្គូ និង មួយទៀត ឈ្មោះ Snejinsk នៅខេត្ត Tcheliabinsk តំបន់ភ្នំ Oural ចម្ងាយ ម្តុំ ២០០០គ.ម. ខាងកើតពីរដ្ឋធានីម៉ូស្គូ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពី ម៉ូស្គូ
រោងចក្រខាងស្តុក និង សម្រិតសម្រាំងឡើងវិញ កាកសំណល់ធាតុនុយក្លេអ៊ែរ ដែល លើកនេះ គំរាមដោយអគ្គិភ័យ មានឈ្មោះថា Mayak។ វាស្ថិតនៅជាយក្រុង Ozersk ក្នុងខេត្ត Tcheliabinsk ផងដែរ ដូច្នេះគឺនៅចម្ងាយប្រមាណ ២.០០០ឝ.ម. ខាងកើតពីម៉ូស្គូ។ ប្រការ គួរឲ្យ កត់សំគាល់គឺថា បើមកទល់ឥឡូវ អណ្តាតភ្លើងអគ្គិភ័យ បានឆាបឆេះ តែនៅខាងភូមិភាគអឺរ៉ុប នៃប្រទេសរុស្ស៊ី រួចឥឡូវ ការដែលវាឆេះរាលដាលដល់ខេត្ត Tcheliabinsk ដែលស្ថិតនៅ តំបន់ភ្នំ Oural គឺមានន័យថា វាឆ្លងដល់ខ្សែបន្ទាត់ដែលខ័ណ្ឌភាគអឺរ៉ុប ពី ភាគអាស៊ីរបស់ទឹកដី រុស្ស៊ីដ៏សែនល្វឹងល្វើយ ពីលិចទៅកើតលាតសន្ធឹងដល់ប្រវែង ១០.០០០គ.ម.ឯណោះ។ សឲ្យ ឃើញពីគ្រោះថ្នាក់នេះ គឺភាពអាសន្នប្រកាសដោយអភិបាលខេត្ត Tcheliabinskតែម្តង។
ប្រកាស នេះ គឺស្របនឹងបទបញ្ជាចេញកាលពីថ្ងៃ ៥សីហាកន្លងទៅដោយលោកប្រធានាធិបតី Medvedevដែលតម្រូវ ឲ្យក្តោបក្តាប់នៅក្រោមការការពារយ៉ាងកក់ក្តៅ រាល់តែសំណង់ដែលមានន័យ យុទ្ធសាស្ត្រ បែបយ៉ាងមជ្ឈមណ្ឌលនុយក្លេអ៊ែរ និង សំណង់យោធា។ គឺថ្ងៃនេះតែម្តង ដែល បញ្ហា ពាក់ព័ន្ធនឹងគ្រោះថ្នាក់លើរោងចក្រ Mayak ក្លាយជាកម្មវត្ថុនៃការពិភាក្សាក្នុងកិច្ចប្រជុំជាបន្ទាន់។ តាំងពីខែកក្កដាមក អគ្គិភ័យបានកំទេចព្រៃឈើអស់ រាប់សែនហិកតារទៅហើយ។
ចំណែកផ្សែងមានធាតុពុល Oxyde de carbone បណ្តាលមកពីភ្លើងឆេះព្រៃនោះ បូកផ្សំជាមួយធាតុអាកាសក្តៅហួតហែង សឹងទ្រាំមិនបានគ្មានរយាលសោះបានញ៉ាំងឲ្យអត្រាមរណៈនៅ រដ្ឋធានីម៉ូស្គូ កើនឡើងសឹងពីរដង។ តាមតួលេខនៃ Departement សុខភាពក្រុងម៉ូស្គូ ៖ បើតាមធម្មតា នៅម៉ូស្គូក្នុងមួយថ្ងៃៗ មានមនុស្សទទួលអនិច្ចកម្មពី ៣៦០ ដល់ ៣៨០នាក់នោះនាពេលចុងក្រោយ តួលេខស្លាប់នេះ ស្ទុះដល់ ៧០០នាក់ឯណោះក្នុង ១ថ្ងៃ។ ប៉ុន្តែ ក្រសួងសុខាភិបាលរុស្ស៊ី គ្មានជំនឿលើតួលេខនេះទេ ហើយទាមទារពី Departement ក្រុងម៉ូស្គូនោះឲ្យពន្យល់បំភ្លឺ តើគេបានតួលេខនេះពីប្រភពណាមក ដ្បិតតួលេខបែបនេះសំរាប់ខែកក្កដាកន្លង ទៅ នឹងមានចេញលុះក្រោយពីថ្ងៃ ២០សីហាទេតើ។
ប្រាកដណាស់ ដែលអគ្គិភ័យដ៏សែនសាហាវលើកនេះ នាំជាការខូចខាតយ៉ាងធ្ងន់ ដល់សេដ្ឋកិច្ច រុស្ស៊ី។ យោងទៅលើការបូកគុណឃើញត្រួសៗជាមុន នៃពួកអ្នកជំនាញការ កាសែតមជ្ឈដ្ឋាន Business រុស្ស៊ី គឺកាសែត Kommersant លេខថ្ងៃនេះ ចុះផ្សាយថា ការខូចខាតនេះគឺក្នុងទំហំ ១៥.០០០លានដុល្លារអាមេរិក ឫស្មើនឹង ១% នៃផលិតផលសរុបក្នុងស្រុក ហៅថា GDP របស់រុស្ស៊ី សំរាប់ឆ្នាំ ២០១០នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ