លោកនាយករដ្ឋមន្ត្រី Poutine បានទទួលជួបអតីតចារបុរសនិងចារនារីរុស្ស៊ី១០នាក់
គេទាំងនោះកាលពីថ្ងៃ៩កក្កដាបាន ត្រូវបញ្ជូនចេញពីស.រ.អា. មកប្រទេសរុស្ស៊ីវិញ ជាការដោះដូរគ្នានឹងជាតិរុស្ស៊ី៤នាក់ដែលបានលួចយកការណ៍ឲ្យ អាមេរិកនិងអង់គ្លេសហើយក៏បានត្រូវបញ្ជូនចេញពីរុស្ស៊ីក្នងថ្ងៃនោះ ដែរ ហេតុដែលបានខ័ណ្ឌបញ្ចប់ទៅរឿង”អាស្រូវ ចារកម្ម “រវាងរុស្ស៊ីនិងអាមេរិកពេលថ្មីៗ។ ក្នុងជំនួបនោះ លោក Poutine ដែលសម័យសូវៀតធ្លាប់បានបំរើការជាភ្នាក់ងារក្រសួងសន្តិសុខហៅថា KGBបានសន្យាធានាឲ្យជនរួមឈាមទាំង១០នាក់នោះមានការងារធ្វើយ៉ាងស័ក្តិសមវិញ។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ជាបឋមគួររំលឹកថា ក្នុងចំណោម១០នាក់នោះមានប្រុស៥នាក់ ស្រី៥នាក់។ ថ្ងៃ២៧មិថុនាពួកគេបានត្រូវអាជ្ញាធរអាមេរិកចាប់ខ្លួននៅតាមរដ្ឋប្លែកៗនៃសហរដ្ឋក្រោមបទចោទប្រកាន់ថាបានលួចយកការណ៍ដោយខុសច្បាប់នៅលើដែនដីអាមេរិកសំរាប់ជាប្រយោជន៍ប្រទេសរុស្ស៊ី។ ហើយពីក្នុងនោះ៩នាក់ថែមទាំងជាប់ចោទក្នុងអំពើលាងលុយកខ្វក់ទៅផង។
ក្រោយពីសមត្ថកិច្ចអាមេរិកវែកញែកបំភ្លឺទៅឃើញថា ក្នុង១០នាក់នោះមានតែ៣នាក់ប៉ុណ្ណោះដែលបានធ្វើការនិងរស់នៅ នៅស.រ.អាក្រោមឈ្មោះពិតរបស់ខ្លួនមែន។ ចំណែក៧នាក់ទៀតបានកាន់អត្តសញ្ញាណប័ណ្ណក្លែងក្លាយប្តូរទាំងឈ្មោះខ្លួនទៅផង។ ក្នុងជំនួបកន្លងទៅលោកនាយករដ្ឋមន្ត្រី Poutine បានបង្ហើបឲ្យដឹងថា គឺតាំងពីឆ្នាំ ២០០០ម៉្លេះ ដែលប៉ូលីសអង្កេតអាមេរិក FBI បានចាប់ផ្តើមតាមដានអំពីសកម្មភាពចារកិច្ចជាតិរុស្ស៊ីទាំង១០នាក់នោះ។
មូលហេតុមកពីមានអំពើក្បត់ពីខាងអតីតចារបុរសរុស្ស៊ីម្នាក់ដែលនាខែតុលា ឆ្នាំ២០០០នោះ បានរត់ទៅសុំជំរកជ្រកកោណនៅស.រ.អា ហើយក៏លួចឲ្យការណ៍ទៅក្រសួងស៊ើបការណ៍សម្ងាត់អាមេរិកអំពីសកម្មភាពជន១០នាក់នោះ។ បុរសក្បត់នោះតាមការចុះផ្សាយឲ្យដឹងនៃកាសែតអាមេរិកមានឈ្មោះថាSerguei Tretyakov ដែលកាលពីថ្ងៃ ១៣មិថុនា ឆ្នាំ ២០១០នេះ បានទទួលមរណភាពទៅហើយក្នុងជន្មាយុ៥៣ឆ្នាំ។ ដោយដំណាលរឿងនេះលោកPoutine សង្កត់ធ្ងន់ថា តាមធម្មតាវាសនាជាតិរុស្ស៊ីដែលខំលួចយកការណ៍បំរើមាតុប្រទេសខ្លួនគឺមិនមែនងាយស្រួលទេ។យ៉ាងណាមិញគេត្រូវចេះភាសារអិលដូចភាសាកំណើតខំបំពេញរៀងរាល់ថ្ងៃភារកិច្ចដែលមាតុប្រទេសផ្ទុកផ្តាក់លើរូបគេដោយកុំឲ្យអ្នកជិតខាងចាប់អារម្មណ៍ហើយក្នុងពេលជាមួយគ្នាទាំងបង្កើតជាគ្រោះថ្នាក់ដល់សាច់ញាតិដែលមិនដឹងខ្លួនសោះ។
យោងលើអនុសាសន៍លោកនាយករដ្ឋមន្ត្រីPoutineអតីតចារបុរស ចារនារីរុស្ស៊ី១០នាក់នោះនឹងត្រូវទទួលឲ្យចូលធ្វើការនៅតាមក្រុមហ៊ុនវិនិយោគក្រុមហ៊ុនសំណង់ ក្រុមហ៊ុនធានារ៉ាប់រងដ្បិតសំរាប់និយោជក ការដែលមាននិយោជិតបែបនេះធ្វើការឲ្យខ្លួន គឺជាការងាយស្រួល ក្នុង រឿងធ្វើកិច្ចចរចរចាជាមួយស្ថាប័នរដ្ឋអំណាច។ តាមដែលកាសែតឈ្មោះ Troud របស់សហជីព រុស្ស៊ីចុះផ្សាយនិយោជិតប្រភេទនេះ នឹងទទួលប្រាក់ខែជាមធ្យមគឺពី ៥ពាន់ទៅ ៧ពាន់ដុល្លារ អាមេរិកក្នុង១ខែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ