លោកប្រធានាធិបតី Medvedev ផ្តល់អនុសាសន៍ដល់ពួកអ្នកការទូតរុស្ស៊ី
អនុសាសន៍នេះ ទើបមានបន្លឺឡើង នាសម័យប្រជុំ ថ្ងៃ១២និង១៣កក្កដានៅ រដ្ឋធានីម៉ូស្គូ ក្នុងក្រសួងការបរទេសរុស្ស៊ី ដែលចូលរួមដោយគ្រប់តែឯកអគ្គរដ្ឋទូតរុស្ស៊ីនៅបរទេស ហើយដែលឆ្នាំនេះ ប្រព្រឹត្តទៅក្រោមបាវចនាថា ៖ “ ការពារផលប្រយោជន៍ជាតិ និងជំរុញឲ្យបានគ្រប់ជ្រុងជ្រោយ ដល់ទំនើបកម្មប្រទេសរុស្ស៊ី”។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ជាបឋមគួរនិយាយថា សហព័ន្ធរុស្ស៊ី បច្ចុប្បន្នមានទំនាក់ទំនងការទូត ជាមួយនឹង១៩១ប្រទេស ដែលពីក្នុងនោះ មានស្ថានទូតផ្ទាល់តែម្តងប្រចាំនៅតាម១៤៤ប្រទេស។ ជាមួយកម្ពុជា រុស្ស៊ីបានតាំងទំនាក់ទំនងការទូត គឺតាំងពីខែឧសភាឆ្នាំ ១៩៥៦មក។ ប៉ុន្តែ នៅក្នុងលោក គឺតែជាមួយ៤ប្រទេសប៉ុណ្ណោះ ដែលរុស្ស៊ីគ្មានទំនាក់ទំនងការទូតទេ បែបយ៉ាងជាមួយប្រទេសGeorgie ជាដើម។
រីឯសម័យប្រជុំនៃពួកមេការទូតរុស្ស៊ីដែលមកជួបជុំគ្នានៅម៉ូស្គូលើកនេះ គឺជាលើកទី៥ហើយ។ ក្នុងប្រទេសរុស្ស៊ីសម័យថ្មី វាប្រព្រឹត្តទៅពីរឆ្នាំម្តង គិតពីឆ្នាំ២០០២មក។ សំរាប់លោក Medvedev ដែលបានឡើងជាប្រធានាធិបតីរុស្ស៊ី តាំងពីឆ្នាំ២០០៨មក លើកនេះ ជាលើកទី២ ដែលគាត់បានអញ្ជើញទៅថ្លែងអនុសាសន៍ណែនាំ តើមុខព្រួញបែបណាដែលគេត្រូវប្រកាន់យក ក្នុងបេសកកម្មការទូតរបស់គេ តំណាងឲ្យប្រទេសរុស្ស៊ី។
អ្វីដែលគេអាចកត់សំគាល់ បើ២ឆ្នាំមុនលោក Medvedev បានថ្លែងថា ប្រទេសរុស្ស៊ីមានជំហររឹងមាំទៅហើយក្នុងលោក នោះក្នុងសន្ទរកថាលើកនេះ គាត់សង្កត់ធ្ងន់ថា ត្រូវចេះប្រើឧបករណ៍នៃនយោបាយក្រៅប្រទេស សំរាប់បំរើដល់ជោគជ័យនៃនយោបាយសេដ្ឋកិច្ចផ្ទៃក្នុងប្រទេស។ លោក Medvedev បានចោទជាភារកិច្ច៣នៅពីមុខពួកអ្នកការទូតរុស្ស៊ី គឺថា ៖ ទី១- ធ្វើទំនើបកម្មដល់សេដ្ឋកិច្ច និងផលិតកម្ម ក្នុងប្រទេស។ ទី២- ពង្រឹងស្ថាប័នប្រជាធិបតេយ្យនៅរុស្ស៊ី និងកសាងឲ្យបានជាសង្គមស៊ីវិលក្នុងប្រទេស។ ទី៣- ប្រយុទ្ធនឹងអង្គការឧក្រិដ្ឋអន្តរជាតិ បែបយ៉ាងខាងភេរវកម្ម និងចរាចរណ៍គ្រឿងញៀន ដែលជាបញ្ហារួមរបស់សហគមន៍ពិភពលោកលើឆាកអន្តរជាតិ។
នៅលើផ្លូវធ្វើទំនើបកម្មប្រទេសរុស្ស៊ី លោក Medvedev ទូន្មានពួកអ្នកការទូតរុស្ស៊ី ឲ្យពង្រឹងសហប្រតិបត្តិការជាមួយសហភាពអឺរ៉ុប និងស.រ.អា។ ហើយក្នុងករណី សហភាពអឺរ៉ុប ជាបឋមគឺជាមួយប្រទេសអាល្លឺម៉ង់ បារាំង អ៊ីតាលី ដែលសុទ្ធតែដក់ជាប់ដោយសក្តានុពលបច្ចេកវិជ្ជាឈានមុខកំរិតខ្ពស់ សំរាប់ជួយបានយ៉ាងច្រើនមែនទែនដល់ការអភិវឌ្ឍន៍បច្ចេកវិជ្ជាបែបនេះនៅរុស្ស៊ី លុះទាល់តែនៅទីបំផុត ជួយឲ្យផលិតផលបច្ចេកវិជ្ជារបស់រុស្ស៊ី ទទួលច្រកចេញទៅលើទីផ្សារតំបន់ក៍ដូចជាទីផ្សារពិភពលោក។
ចំណែកបណ្តាប្រទេសនៃអតីតសហភាពសូវៀត ដែលតែងត្រូវបានចាត់ទុក ជាដៃគូយុទ្ធសាស្ត្ររបស់រុស្ស៊ី លើកនេះបានត្រូវលោក Medvedevរំលឹក គឺក្រោយពីមហាប្រទេសចិន ជប៉ុន បណ្តាប្រទេសអាស៊ី-ប៉ាស៊ិហ្វិក APEC បណ្តារដ្ឋអាស៊ីអាគ្នេយ៍ ASEAN ទេតើ។ លោក Medvedev ព្រមានថាអ្នកការទូតណា ដែលចេះបំពេញអនុសាសន៍គាត់ឲ្យចេញជាផ្លែផ្កា គឺនឹងទទួលរង្វាន់ ហើយនរណាដែលរាយមាយចំពោះការផ្ទុកផ្តាក់របស់គាត់គឺអាចបាត់បង់រហូតដល់មុខតំណែងខ្លួនតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ