ការសប្បាយហ៊ោកញ្ជ្រៀវ ខ្ញៀវខ្ញារ គឹកកងរំពងលាន់ឮ ពេញទូទាំងប្រទេស
អេស្ប៉ាញ ប្រារព្ធពិធីបុណ្យ មហាជ័យជំនះ ក្លាយជាអ្នកជើងឯកពិភពលោកខាងកីឡាបាល់ទាត់។ ជ័យជំនះជាប្រវត្តិសាស្ត្ររបស់ក្រុមកីឡាករបាល់ទាត់អេស្ប៉ាញ La Roja (ឡារ៉ូហា) ១ទល់នឹងសូន្យ លើក្រុមកីឡាករហូឡង់ នៅល្ងាចថ្ងៃអាទិត្យ១១កក្កដាម្សិលមិញ នៅពហុកីឡាឋាននៅសាធារណរដ្ឋអាហ្រ្វិកខាងត្បូង ក្នុងការប្រកួតផ្តាច់ព្រ័ត្រដណ្តើមពានរង្វាន់ពិភពលោក ផ្តល់គោរមងារជាអ្នកជើងឯកពិភពលោកលើកទី១ ខាងកីឡាបាល់ទាត់ ជូនប្រទេសជាតិអេស្ប៉ាញ។ មហាជ័យជំនះ ក្លាយជាមហាពិធីបុណ្យប្រារព្ធទូទាំងប្រទេសជាតិ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីប្រែសម្រួលរបស់វីនស្តុន រតនា
១០ឆ្នាំបន្ទាប់ពីជ័យជំនះរបស់ក្រុមកីឡាករបាល់ទាត់បារាំងមក គឺដល់វេនប្រទេសអេស្ប៉ាញម្តងវិញ បន្ទាប់ពីបានទាត់ឈ្នះមួយគ្រាប់ចូលទីរបស់ក្រុមកីឡាករ ហូឡង់។ ជ័យជំនះនេះនឹងសណ្ឋិតជាប់ក្នុងប្រវត្តិសាស្រ្តអេស្ប៉ាញ។
កីឡាករ Andrès Iniesta ជាអ្នកដែលបានទាត់ចូលទី ហូឡង់ គឺជានិមិត្តរូបនៃប្រទេសមួយដែលរមែង បានឈឺចាប់ដោយការបែកបាក់គ្នានៃតំបន់ និងយ៉ាងហោចណាស់ក៏បានជានាគ្នាក្នុងអំឡុងពេលប្រកួតដណ្តើមពានរង្វាន់ពិភពលោកជាអ្នកជើងឯកខាងកីឡាបាល់ទាត់។
អ្នកឈ្នះតែម្នាក់គត់ គឺប្រទេសអេស្ប៉ាញទាំងមូល-នេះជាចំណងជើងចុះនៅទំព័រទី១ នៃកាសែតមួយចេញផ្សាយនៅថ្ងៃច័ន្ទនេះ។ គ្មានវីរបុរសដទៃទៀតទេ មានតែបុគ្គលអ្នកជើងឯក ប៉ុន្តែសំខាន់ពុំដល់ក្រុមជម្រើសជាតិអេស្ប៉ាញLa Roja (ឡារ៉ូហា)ទេ។
គេបានក្រេបរសជាតិជ័យជំនះនៅទីក្រុងម៉ាទ្រីត ប៉ុន្តែក៏នៅ ទីក្រុង Barcelone Bilbao (នៃសហគមន៍ស្វយ័ត Pays Basque) Andalousie និងនៅកោះ កាណារី ផងដែរ។
នៅខណៈដែលពួកកាតាឡង់ រាប់សែននាក់ធ្វើបាតុកម្មទាមទារស្វ័យភាពថែមទៀត ខ្យល់ដ៏ពិតប្រាកដមួយបានបក់មកលើប្រទេសជាតិទាំងមូល គឺកីឡាបាល់ទាត់បានសំរេចអ្វីដែលនយោបាយពុំបានធ្វើឲ្យសំរេច។ បន្ទាប់ពីព្រឹត្តិការណ៍ប្រកួតដណ្តើមពានរង្វាន់បាល់ទាត់ពិភពលោកមក គេចង់ដឹងថា តើមនោសញ្ចេតនាឯកភាពជាតិនេះនឹងនៅឋិតថេរបានយូរអង្វែងឬទេ ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ