រុស្ស៊ីដាក់ទិសពង្រឹងជំហរខ្លួន នៅតំបន់អាស៊ី-ប៉ាស៊ីហ្វិក
លោកប្រធានាធិបតីរុស្ស៊ី Medvedev បានទៅក្រុង Khabarovsk តំបន់ចុងបូព៌ារុស្ស៊ី ដែលស្ថិតនៅចម្ងាយ ៦.២០០គ.ម. ខាង កើតរដ្ឋធានីម៉ូស្គូ ដើម្បីតាមដានដោយផ្ទាល់ភ្នែក អំពី សមយុទ្ធឈ្មោះ “ បូព៌ាឆ្នាំ២០១០ “។ ក្នុងកិច្ចប្រជុំនោះ លោក Medvedevបានផ្ទុកផ្តាក់ រដ្ឋាភិបាលរុស្ស៊ីឲ្យទៅដល់ចុងឆ្នាំនេះ តាក់តែងឲ្យបានជា “កម្មវិធីនៃសកម្មភាព” ឆ្ពោះទៅពង្រឹងទីតាំងរបស់រុស្ស៊ី នៅតំបន់អាស៊ី-ប៉ាស៊ីហ្វិក។
ចុះផ្សាយនៅថ្ងៃ៖
សេចក្តីរាយការណ៍របស់កែវ ឆាយា ពីទីក្រុងម៉ូស្គូ
ជាបឋម គួរនិយាយថា ២ឆ្នាំទៀត រុស្ស៊ីនឹងក្លាយជាម្ចាស់ផ្ទះនៃជំនួបកំពូលAPEC ឆ្នាំ២០១២ដែលរៀបចំឡើងនៅតំបន់ចុងបូព៌ាប្រទេស។ ក្នុងន័យនេះ លោក Medvedev ចោទ ជាភារកិច្ចគន្លឹះ ៣ សំរាប់អភិវឌ្ឍតំបន់ចុងបូព៌ារុស្ស៊ី៖
ទី១- គឺលើកសហប្រតិបត្តិការសេដ្ឋកិច្ចរបស់តំបន់នេះ និងប្រទេសរុស្ស៊ីទាំងមូល ជាមួយគ្រប់តែ ២១ប្រទេសសមាជិក APECឲ្យបានកាន់តែខ្ពស់។
ទី២-ប្រើសម្បត្តិថាមពលរបស់រុស្ស៊ីដើម្បីបំពេញដល់តម្រូវការទីផ្សារអាស៊ី-ប៉ាស៊ីហ្វិក ជាថ្នូរនឹង ការទទួលបច្ចេកវិទ្យាឈានមុខហៅថា High Tech សំរាប់បង្កើនថែមទៀតឃ្លាំងHigh Tech របស់រុស្ស៊ី ដូចជា ផ្នែកសាងសង់យន្តហោះ និងយានអវកាស។ បន្ថែមលើនេះ រុស្ស៊ីត្រៀមផ្តល់ ត ទៅទៀត នូវសេវាផ្នែកអវកាសសំរាប់បណ្តាប្រទេសនៃតំបន់។
ទី៣- ចាំបាច់ត្រូវតែពង្រឹងតួនាទីរបស់រុស្ស៊ីក្នុងអង្គការនានានៃតំបន់ ពោលគឺ APECផ្ទាល់ អង្គការសហប្រតិបត្តិការក្រុងសៀងហៃ ហៅថា OCS សមាគមន៍រដ្ឋអាស៊ីអាគ្នេយ៍ ASEAN និងក្រុមប្រទេសដែលមានសេដ្ឋកិច្ចកំពុងអភិវឌ្ឍន៍លឿន ហៅថា BRIC ដែលរួមមាន ប្រទេស ប្រេស៊ីល រុស្ស៊ី ឥណ្ឌា ចិន។
ប្រមុខរដ្ឋរុស្ស៊ីកត់សំគាល់ថា ជាទូទៅ ទោះបីមានវិបត្តិក្តី ក៏រុស្ស៊ីនៅរក្សាទុកទីតាំងខ្លួនដដែល ក្នុងតំបន់អាស៊ី-ប៉ាស៊ីហ្វិក ដោយមានជាឧទាហរណ៍ គឺទ្រនិចលេខដ៏សំខាន់ ខាងទំហំផ្តោះប្តូរ ពាណិជ្ជកម្ម។ ឧទាហរណ៍ការផ្តោះប្តូរពាណិជ្ជកម្មរវាងរុស្ស៊ីជាមួយចិន និងម៉ុងហ្គោលី បានកើនឡើង ជាង ៥០%ឯណោះ។
ករណីASEAN រុស្ស៊ីយកចិត្តទុកដាក់ពិសេសទៅលើការពង្រីកភាពជាដៃគូ ជាមួយបណ្តា ប្រទេសអាស៊ីអាគ្នេយ៍។ ឥឡូវកំពុងប្រព្រឹត្តទៅយ៉ាងមមាញឹក ការរៀបចំ សំរាប់ “ជំនួបកំពូលអាស៊ាន-រុស្ស៊ីលើកទី ២” ដែលនឹងបើកធ្វើ នៅក្រុង Hanoi ក្នុងខែតុលា ខាងមុខ។
ចំណែក លោករដ្ឋមន្ត្រីការបរទេសរុស្ស៊ី Serguei Lavrov ថ្លែងក្នុងកិច្ចប្រជុំនោះ បានជូនជា ដំណឹងថា នៅទីបំផុត ក្នុងខែតុលាខាងមុខដែរ ប្រទេសរុស្ស៊ីនឹងត្រូវទទួល ឲ្យចូលជាផ្លូវការក្នុង វេទិកា “ Asie-Europe “ ហៅកាត់ថា ASEM ដែលរុស្ស៊ីបានដាក់ពាក្យសុំចូលអស់ ១៣ឆ្នាំហើយ។
ASEM ជាអង្គការអន្តរជាតិ បង្កើតឡើងក្នុងឆ្នាំ ១៩៩៦ ទៅតាមគំនិតផ្តួចផ្តើមរបស់បារាំង និង សិង្ហបុរី ដែលបច្ចុប្បន្នមានជាង ៤០ប្រទេសអាស៊ីបូព៌ា និង អឺរ៉ុបជាសមាជិក ហើយដែលធានាបានដល់ ២/៣នៃទំហំពាណិជ្ជកម្មក្នុងលោក និងជាងពាក់កណ្តាលនៃផលិតផលក្នុងស្រុកសរុប ហៅថា GDP លើពិភពលោកទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ