ប្រជាជនចិនរស់ក្នុងទីក្រុងប៉ារីសចុះផ្លូវធ្វើបាតុកម្មប្រឆំាងនឹងអសន្តិសុខ
កាលពីថ្ងៃអាទិត្យ ទី២០ មិថុនា ម្សិលមិញ មានប្រជាជនចិនរាប់ពាន់នាក់បាននំាគ្នាធ្វើបាតុកម្មអហឹង្សានៅ សង្កាត់ Belleville ក្នុងទីក្រុងប៉ារីសទី ២០ ដើម្បីសម្តែងកំហឹងរបស់ខ្លួនប្រឆំាងនឹងអំពើហិង្សាដែលពួកគេបានទទួលរងការវាយប្រហារពីសំណាក់ក្រុមក្មេងស្ទាវក្នុងសង្កាត់ Belleville។ ក្បួនបាតុកម្មបានបញ្ចប់ដោយអំពើហិង្សា និងភាពប្រទូសរ៉ាយគ្នារវាងក្រុមយុវជនជាបាតុករប្រមាណជា ៥០នាក់ និងក្រុមយុវជនដែលមិនមែនជាបាតុករ។ ភាពប្រទូសរ៉ាយ ដែលនំាឲ្យមានអន្តរាគមន៍របស់ក្រុមប៉ូលីសរហូតដល់ទៅ ២ដង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គួច គន្ធារ៉ា
គឺជាក្បួនបាតុកម្មដ៏ធំមួយក្រោមការអំពាវនាវរបស់សហគមន៍ចិនមិនធ្លាប់មានទេ នៅក្នុងប្រទេសបារំាង។ បើយោងតាមតួលេខផ្តល់ដោយប៉ូលីស មានបាតុករប្រមាណជា ៨៥០០នាក់ដែលភាគច្រើនជាជនជាតិចិន បាននំាគ្នាដង្ហែក្បួនបាតុកម្មនៅចន្លោះផ្លូវ Belleville និងទីលាន Colonel-Fabien កាលពីម្សិលមិញ នៅសង្កាត់ Belleville ក្នុងទីក្រុងប៉ារីសទី ២០ ដែលនារយៈពេល ១០ឆ្នំាចុងក្រោយនេះ បានក្លាយជាសង្កាត់ថ្មីមួយទៀតសម្បូរដោយជនអន្តោប្រវេសន៍អាស៊ីរស់នៅ។ ប៉ុន្តែបញ្ហានៅត្រង់ថាសឹងតែរៀងរាល់ថ្ងៃ មិនថាយប់ ឬថ្ងៃទេ អំពើហិង្សាដោយការលួចឆក់ និងវាយប្រហារលើពួកគេបានកើតមានជាប្រចំាពីសំណាក់ក្រុមស្ទាវនៃជនអន្តោប្រវេសន៍របស់ជាតិសាសន៍ផ្សេងទៀតនៅក្នុងសង្កាត់នោះ។ ហេតុផលជាទូទៅ គឺកើតឡើងដោយសារតែភាពច្រណែននិន្ទាលើជនអន្តោប្រវេសន៍អាស៊ីដែលមានកំរិតជីវភាពគ្រាន់បើជាងគេ។
នៅវេលាម៉ោង ៤ និង៣០នាទីរសៀល មានផ្ទុះឡើងនូវអំពើហិង្សា និងភាពប្រទូសរ៉ាយគ្នារវាងក្រុមយុវជនជាបាតុករប្រមាណជា ៥០នាក់ និងក្រុមយុវជនដែលមិនមែនជាបាតុករ។ តែមានប្រភពផ្សេងទៀតឲ្យដឹងថា អំពើហិង្សា និងភាពប្រទូសរ៉ាយគ្នាបានកើតមានឡើង ក្រោយពីមានអំពើឆក់ក្របូបរបស់បាតុករស្រ្តីម្នាក់។ ជាព្រឹត្តិការណ៍ដែលបានជម្រុញឲ្យប៉ូលីសចេញធ្វើអន្តរាគមន៍ចំនួនពីរលើកបន្តបន្ទាប់គ្នា។ លោក ហ៊ុង តានអ្នកនំាពាក្យនៃក្រុមរៀបចំក្បួនបាតុកម្មបានប្រាប់ឲ្យដឹងថា ការដែលសមាគមន៍ចិនបានអំពាវនាវឲ្យមានបាតុកម្មពេលនេះ គឺដើម្បីទាមទារឲ្យរដ្ឋាភិបាលបារំាងគិតគូរបន្ថែមទៀតអំពីសន្តិសុខរបស់ពួកគេ។ អ្វីដែលជាការអំពាវនាវរបស់លោក ហ៊ុង តាន គឺសុំឲ្យមានការបញ្ឈប់អំពើហិង្សាតបនឹងអំពើហឹង្សារវាងជនអន្តោប្រវេសន៍នៃគ្រប់ជាតិសាសន៍នៅក្នុងសង្កាត់ Belleville។
យោងតាមលោក ហ៊ុង តាន អស់រយៈពេលជាច្រើនខែកន្លងមកហើយ ដែលអំពើឆក់ និងការគំរាមកំហែងលើជនអន្តោប្រវេសន៍អាស៊ី ពិសេសជនជាតិចិន បានកើតមានសឹងតែរាល់ថ្ងៃពីសំណាក់ក្រុមក្មេងស្ទាវដែលរស់ក្នុងសង្កាត់ Belleville នោះដែរ។ ជាក់ស្តែង គឺការចូលទៅសំឡុតយកត្រង់ៗ មាស ពេជ្រ និងលុយពីភ្ញៀវដែលកំពុងស៊ីការនៅក្នុងភោជនីយដ្ឋាន។
សូមជម្រាបជូនថានៅក្នុងប្រទេសបារំាង ពិសេសក្នុងទីក្រុងប៉ារីសសង្កាត់ទី១៣ និងសង្កាត់ទី ២០នៅ Belleville ជាសង្កាត់ពីរដែលសម្បូរដោយជនអន្តោប្រវេសន៍អាស៊ីរស់នៅ មានខ្មែរ ចិន វៀតណាម ថៃ និងជនជាតិឡាវ។ ជាទូទៅ ជនអន្តោប្រវេសន៍អាស៊ីដែលរស់នៅទីនោះ ច្រើនបង្ហាញឲ្យគេឯងដឹងអំពីទ្រព្យសម្បត្តិរបស់ខ្លួន តាមរយៈការពាក់មាស ពេជ្រស្រោចខ្លួននៅពេលមានពិធីនីមួយៗ និងតាមរយៈការប្រើឡានម៉ាកល្អៗជាដើម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ