នាយករដ្ឋមន្រ្តីរុស្ស៊ីមកបារំាងដើម្បីពង្រឹងទំនាក់ទំនងសេដ្ឋកិច្ច
លោកនាយករដ្ឋមន្ត្រីរុស្ស៊ីបាន ចាប់ផ្តើមធ្វើទស្សនកិច្ចនៅទីក្រុងប៉ារីសនៅល្ងាចថ្ងៃព្រហស្បតិ៍ ទី១០មិថុនាដោយពិធីជប់លៀងជាមួយលោកនាយករដ្ឋមន្ត្រីបារាំងFrançois Fillons។ ពិធីជប់លៀងនិងជំនួបពិភាក្សាជាមួយលោកប្រធានាធិបតីនីកូឡាសាកូហ្ស៊ី នៅថ្ងៃសុក្រនេះក៏មាននៅក្នុងកម្មវិធីនៃទស្សនកិច្ចនេះផងដែរ។ លោកVladimir Poutine មានបំណងពង្រីកពង្រឹងទំនាក់ទំនងសេដ្ឋកិច្ច យោធា ការទូតនិងវប្បធម៌បារាំង-រុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
គម្រោងការរបស់ប្រទេសរុស្ស៊ីក្នុងការទិញនាវាដឹកឧទ្ថម្ភាគចក្រដ៏ទំនើបរបស់បារាំងគឺជាសំណុំរឿងចរចាមួយដ៏សំខាន់។ គម្រោងការរុស្ស៊ីនេះបានបង្កឲ្យកើតមានក្តីបារម្ភយ៉ាងខ្លាំងនៅប្រទេសហ្សកហ្ស៊ីនិងនៅប្រទេសនៃតំបន់បាលតឺ៍។ ហើយជាងនេះទៅទៀត ប្រទេសរុស្ស៊ីតម្រូវឲ្យមានការសាងផ្ទេរបច្ចេកទេសភ្ជាប់នឹងកិច្ចសន្យា។
លោកប្រធានាធិបតីហ្សកហ្ស៊ីMikheïl Saakachvili បានអញ្ជើញមកទីក្រុងប៉ារីសពីរថ្ងៃមុនការអញ្ជើញមកដល់របស់លោកPoutine ។ លោកប្រធានាធិបតីហ្សកហ្ស៊ីដែលមានអធិករណ៍ជាមួយទីក្រុងម៉ូស្គូបានថ្លែងឲ្យដឹងថា បញ្ហាទាំងនេះគឺជាបញ្ហាឧបតោភាគីរវាងប្រទេសបារាំងនិងប្រទេសរុស្ស៊ី។ ក៏ប៉ុន្តែលោក Mikheïl Saakachviliហាក់ដូចជាមានការលំបាកនឹងលាក់បាំងក្តីបារម្ភរបស់ខ្លួន។ហើយលោកប្រធានាធិបតីហ្សកហ្ស៊ីក៏ពុំរួញរាឡើយនឹងប្រកាសឲ្យដឹងថា នៅករណីចាំបាច់ប្រទេសហ្សកហ្ស៊ីអាចនឹងទិញសព្វាវុធរបស់បារាំង។
ចំណែកឯសំណុំរឿងនុយក្លេអ៊ែរអៀរ៉ង់ក៏ជាសំណុំរឿងមួយដ៏សំខាន់ដែលអ្នកដឹកនាំរុស្ស៊ីត្រូវពិភាក្សាជាមួយប្រមុខដឹកនាំបារាំង។ គួរកត់សម្គាល់ថា ប្រទេសរុស្ស៊ីមានទំនាក់ទំនងពាណិជ្ជកម្មយ៉ាងសកម្មជាមួយប្រទេសអៀរ៉ង់។ ក៏ប៉ុន្តែកាលពីថ្ងៃអង្គារកន្លងទៅ ទីក្រុងម៉ូស្គូបានចូលរួមជាមួយប្រទេសលោកខាងលិចនៅក្រុមប្រឹក្សាសន្តិសុខនៃអង្គការសហប្រជាជាតិក្នុងការដាក់ទណ្ឌកម្មទៅលើប្រទេសអៀរ៉ង់។
ក្រោយពីបានរួមចំណែកក្នុងការជួយស្រោចស្រង់រូបិយប័ណ្ណអឺរ៉ុប លោកនាយករដ្ឋមន្ត្រីរុស្ស៊ី Vladimir Poutineកំពុងខិតខំកែលំអមុខមាត់និងកេរ្តិ៍ឈ្មោះពុំសូវល្អរបស់ខ្លួនដែលល្បីថាជាមនុស្សខ្លាំង ដោយបានថ្លែងឲ្យដឹងថា នៅប្រទេសរុស្ស៊ីទំនើបថ្មីគ្មានទេលទ្ធភាពក្នុងការបញ្ចុះបញ្ចូលឲ្យគេគោរពខ្លួនជាបុរសខ្លាំងដូចព្រះអាទិទេព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ