ផលវិបាកនៃការរុញអាយុចូលនិវត្តន៍ឲ្យលើសពី៦០ឆ្នាំ
បច្ចុប្បន្ននេះគេអាចដឹងបានខ្លះពី ផលវិបាកនៃការរុញអាយុចូលនិវត្តន៍ជាផ្លូវការឲ្យលើសពី៦០ឆ្នាំ។ ក៏ប៉ុន្តែគេពុំទាន់អាចដឹងបាននៅឡើយថា តើមានផលវិបាកអ្វីខ្លះទៀតដែលអាចជះឥទ្ធិពលវិជ្ជមានឬអវិជ្ជមាន ទៅលើវិស័យការងារ។ រដ្ឋាភិបាលគួរតែជ្រើសយកវិធានការដែលអាចអនុញ្ញាតឲ្យប្រជាជនបារាំងមានសេរីភាពនឹងជ្រើសរើសយកផ្លូវដែលសមស្របនឹងករណីរបស់ខ្លួនម្នាក់ៗទើបប្រសើរ។
ចុះផ្សាយនៅថ្ងៃ៖
បទវិភាគរបស់ សៀក សារិន
នៅក្នុងបញ្ហាចូលនិវត្តន៍ដ៏ស្មុគ្រស្មាញនេះ សំណួរមួយបានលេចឡើងចោទសួរថា តើហេតុអ្វីបានជាការរុញអាយុចូលនិវត្តន៍ជាផ្លូវការឲ្យលើសពី៦០ឆ្នាំ មានផលប្រយោជន៍ជាងការអូសបន្លាយរយៈកាលសម្រាប់បង់ភាគទានទៅក្នុងហិបប្រាក់សោធននិវត្តន៍?
នៅឆ្នាំ២០០៣កំណែទម្រង់ទៅលើប្រព័ន្ធចូលនិវត្តន៍ដែលដឹកនាំដោយលោកFrançois Fillonsដែលកាលណោះជារដ្ឋមន្ត្រីក្រសួងសង្គមកិច្ច បានឲ្យអាទិភាពទៅលើការអូសបន្លាយរយៈកាលសម្រាប់បង់ភាគទានទៅក្នុងហិបប្រាក់សោធននិវត្តន៍ ដោយបានសម្រេចថាចាប់ពីឆ្នាំ២០០៣ទៅទល់ឆ្នាំ២០២០ រយៈកាលសម្រាប់បង់ភាគទាននឹងត្រូវតម្លើងពី៤០ឆ្នាំទៅដល់៤១ឆ្នាំកន្លះ។ ហើយប្រាំពីរឆ្នាំក្រោយមករដ្ឋាភិបាលរបស់លោកFrançois Fillonsចង់ចាត់វិធានការរុញអាយុចូលនិវត្តន៍ជាផ្លូវការឲ្យលើសពី៦០ឆ្នាំ។ ពត៌មាននេះបានត្រូវថ្លែងបញ្ជាក់ដោយលោកEric Woerth រដ្ឋមន្ត្រីក្រសួងការងារ។ ក៏ប៉ុន្តែគេនៅពុំទាន់ដឹងនៅឡើយថា តើរដ្ឋាភិបាលបារាំងគ្រោងរុញអាយុចូលនិវត្តន៍ជាផ្លូវការឲ្យដល់៦២ឆ្នាំ ឬ៦៣ឆ្នាំឬមួយដល់៦៥ឆ្នាំឡើយ។
បញ្ហានេះជាបញ្ហាមួយដ៏សែនរសើបនិងដ៏លំបាក ដោយហេតុថាវិធានការនេះនឹងតម្រូវឲ្យអ្នកធ្វើការបារាំងដែលបានបង់ភាគទានគ្រប់រយៈកាល៤០ឆ្នាំឲ្យទៅហិបប្រាក់សោធននិវត្តន៍ក៏ដោយ ក៏ប្រជាជនបារាំងរូបនេះត្រូវបន្តធ្វើការរហូតដល់កម្រិតអាយុចូលនិវត្តន៍ជាផ្លូវការដែលនឹងកំណត់ដោយរដ្ឋាភិបាល ពោលគឺ៦២ឬ៦៣ឬ៦៥ឆ្នាំ។ វិធានការនេះនឹងធ្វើឲ្យរដ្ឋបារាំងសន្សំសំចៃបានប្រាក់ពុំតិចឡើយ។
ដូច្នេះ តើវិធានការថ្មីនេះនឹងអាចជួយកាត់បន្ថយចំនួនអ្នកឥតការងារធ្វើដែលមានវ័យចាស់ដែរឬទេ?
មុននឹងឆ្លើយតបនឹងសំណួរនេះ យើងគួរងាកទៅមើលតួលេខនៃអ្នកឥតការងារធ្វើដែលមានវ័យចាស់សិន។ នៅប្រទេសបារាំងបច្ចុប្បន្ននេះ អ្នកឥតការងារធ្វើដែលមានអាយុពី៥៥ឆ្នាំទៅ៦៤ឆ្នាំ មានដល់ទៅ៣៨,៤%ដែលគ្មានការងារធ្វើ។ បន្ថែមពីលើនេះ សហគ្រាសតែងបណ្តេញឲ្យឈប់មុនគេអ្នកធ្វើការដែលមានវ័យចាស់។ ដូច្នេះការរុញអាយុចូលនិវត្តន៍ជាផ្លូវការឲ្យលើសពី៦០ឆ្នាំ ពិតជាវិធានការពុំអាចជួយកាត់បន្ថយចំនួនអ្នកឥតការងារធ្វើដែលមានវ័យចាស់បានឡើយ។
ពាក់ព័ន្ធនឹងអ្នកឥតការងារធ្វើដែលមានវ័យក្មេងវិញ តើវិធានការរុញអាយុចូលនិវត្តន៍ជាផ្លូវការឲ្យលើសពី៦០ឆ្នាំអាចនឹងចោទចេញជាបញ្ហាដល់អ្នកឥតការងារធ្វើក្មេងៗទាំងនោះដែរឬទេ?
វាជាការងាយយល់ដឹងណាស់ថា បើអ្នកមានវ័យចាស់ៗទាំងនោះនៅតែបន្តធ្វើការបន្ថែមទៀតរហូតដល់អាយុ៦២ឬ៦៣ឬ៦៥ឆ្នាំ នោះអ្នកឥតការងារធ្វើដែលមានវ័យក្មេងច្បាស់ជានិងកាន់តែមានការលំបាកនឹងរកបានការងារធ្វើ។
ដូច្នេះ រដ្ឋាភិបាលគួរតែជ្រើសយកវិធានការដែលអាចអនុញ្ញាតឲ្យប្រជាជនបារាំងមានសេរីភាពនឹងជ្រើសរើសយកផ្លូវដែលសមស្របនឹងករណីរបស់ខ្លួនម្នាក់ៗទើបប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ