ម៉ូស្គូមិនចង់ឃើញសង្គ្រាមផ្ទុះឡើងឡើយរវាងកូរ៉េទាំងពីរ
លោកប្រធានាធិបតីរុស្ស៊ី Dmitri Medvedev ពេលសន្ទនាតាមទូរសព្ទជាមួយលោកប្រធានាធិបតីកូរ៉េខាងត្បូង Lee Myung-bakបានអំពាវនាវឲ្យគូភាគីបដិបក្សកូរ៉េចេះទប់ខ្លួនហើយកុំបណ្តោយឲ្យស្ថានការណ៍នៅឧបទ្វីបកូរ៉េកាន់តែតានតឹងទៀតឡើយ។ ដំណឹងនេះទើបប្រកាសដោយវិមានក្រេមឡាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
គឺម្សិលមិញដែលលោកប្រធានាធិបតីកូរ៉េខាងត្បូង Lee Myung-bak បានទូរសព្ទមកប្រមុខរដ្ឋរុស្ស៊ីលាតត្រដាងអំពីស្ថានការណ៍ដែលកំពុងវិវឌ្ឍទៅ ក្រោយពីមានប្រកាសជាផ្លូវការលទ្ធផលនៃការស៊ើបអង្កេតអំពីឧប្បត្តិហេតុដែលបានកើតឡើងជាមួយនាវាចំបាំងកូរ៉េខាងត្បូងពេលថ្មីៗ។ លោកប្រធានាធិបតីរុស្ស៊ី Medvedev ពីចំណែកខ្លួនបានថ្លែងអំណរគុណចំពោះពត៌មានក្បោះក្បាយស្តីអំពីសោកនាដកម្មសមភាគីកូរ៉េខាងត្បូងឲ្យពាំនាំនូវការរួមមរណទុក្ខទៅកាន់គ្រួសារយោធាដែលបានស្លាប់ទៅ។ រដ្ឋបុរសទាំងពីរសំដែងការសោកស្តាយដោយឃើញថា គំរោងរួមអន្តរកូរ៉េដ៏សំខាន់ៗ ក្នុងវិស័យពាណិជ្ជកម្ម-សេដ្ឋកិច្ច ដែលបានត្រូវតាក់តែងឡើងតាំងពីប៉ុន្មានឆ្នាំមុនម៉្លេះ ដោយមានការចូល រួមរបស់រុស្ស៊ីផង នៅតែមិនទាន់លេចចេញជាផ្លែផ្កានៅឡើយ ចំណែកស្ថានការណ៍នៅឧបទ្វីបកូរ៉េជាទូទៅបែរទៅជាធ្លាក់ចុះដល់កំរិតនៃភាពប្រឈមមុខដាក់គ្នាតែម្តង។ ជាបញ្ចប់សេចក្តី លោក Medvedev និងលោក Lee Myung-bak បានបញ្ជាក់ពីភាពត្រៀមខ្លួនបន្តធ្វើការពិគ្រោះផ្លាស់ប្តូរយោបល់គ្នាជុំវិញរាល់តែបញ្ហាដែលកើតឡើងនៅតំបន់។ គួរនិយាយថា ឥរិយាបថអព្យាក្រឹតប្រកាន់យកដោយទីក្រុងម៉ូស្គូចំពោះទំនាស់រវាងកូរ៉េទាំងពីរក៏បានត្រូវរំលេចឲ្យឃើញដោយសេចក្តីថ្លែងការណ៍របស់ក្រសួងការបរទេសរុស្ស៊ីដែលថាម៉ូស្គូមិនមានក្នុងដៃខ្លួនទេ នូវភស្តុតាងច្បាស់ក្រឡែតស្តីអំពីមូលហេតុដែលនាំឲ្យនាវាចំបាំងកូរ៉េខាងខាងត្បូងលិចទៅនោះ។ រុស្ស៊ីជាភាគីមួយក្នុងចំណោម ៦ភាគី គឺទន្ទឹមនឹងស.រ.អា. ចិន ជប៉ុន កូរ៉េទាំងពីរដែលតែង បានចូលរួមក្នុង កិច្ចចរចាស្វែងរកដំណោះស្រាយឲ្យកម្មវិធីនុយក្លេអ៊ែររកូរ៉េខាងជើង។ រុស្ស៊ីមានទំនាក់ទំនងការទូតជាមួយកូរ៉េខាងជើងផង កូរ៉រខាងត្បូងផង។ ជាមួយកូរ៉េខាងជើងកុម្មុយនិស្ត គឺតាំងពីសម័យសូវៀតមកក្នុងឆ្នាំ១៩១៨ មួយឆ្នាំក្រោយពីនៅរុស្ស៊ីមានប្រព្រឹត្តទៅបដិវត្តន៍សង្គមនិយមផ្តួលរបបស្តេច Tsar។ រីឯ ជាមួយកូរ៉េខាងត្បូងមូលធននិយម គឹទើបក្នុងឆ្នាំ១៩៩០ សម័យនយោបាយផ្នត់គំនិតថ្មីរបស់មេដឹកនាំសូវៀតលោក Gorbatchev ដែលបានធ្វើកំណែទំរង់លុះទាល់តែសហភាពសូវៀតរលាយទៅក្នុងឆ្នាំ១៩៩១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ