ម៉ូស្គូទើបប្រកាសឈ្មោះអ្នកអវកាស៧នាក់សំរាប់ហោះទៅផ្កាយអង្គារ
ក្នុងចំណោម៧នាក់នេះ៤នាក់ជាជាតិរុស្ស៊ី៣នាក់ជាបរទេស។ ការពិសោធន៍អន្តរជាតិដ៏ធំធេងនេះខាងសមជើងធ្វើត្រាប់ការហោះហើរមែនទែន ទៅកាន់ភពMarsនោះ នឹងចាប់ផ្ដើមនៅថ្ងៃទី៣មិថុនាខាងមុខ។ ដោយហេតុថា ដើម្បីហោះទៅដល់ភពនោះ និងហោះត្រឡប់មកផែនដីវិញ គឺត្រូវចំណាយពេលអស់ជាង៥០០ថ្ងៃឯណោះ បានជាកម្មវិធីនោះមានឈ្មោះថាMars - 500 ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
ជាបឋមកន្លែងសំរាប់ដើរតួជាយានអវកាសធ្វើត្រាប់ហោះទៅនោះគឺបង្ហា hangar នៃវិជ្ជាឋានខាងបញ្ហាវេជ្ជ-ជីវសាស្ត្រនៅអមបណ្ឌិតសភាវិទ្យាសាស្ត្ររុស្ស៊ីដែលស្ថិតនៅជាយក្រុងម៉ូស្គូ។ រីឯ អ្នកអវកាស៧នាក់ដែលត្រូវបានស្រាល់ជ្រើសជាបេក្ខជនសំរាប់ហោះទៅផ្កាយMars ក្នុងឋានៈជា Marsonaute គឺ ជាតិរុស្ស៊ី ៤នាក់ក្នុងនោះ ២នាក់ជាគ្រូពេទ្យ ២នាក់ជាវិស្វករ ចំណែកបរទេស៣នាក់គឺជាតិបារាំងម្នាក់ ជាតិអ៊ីតាលីម្នាក់ ជាតិចិនម្នាក់។ ក្នុងយានអវកាសធ្វើត្រាប់នោះ មានបំពាក់ទៅហើយដោយកន្លែងសំរាប់អនាគតMarsonauteធ្វើការកន្លែងដែលគេម្នាក់ៗត្រូវសំរាករួចនៅពេលទំនេរ គេអាចហាត់ប្រាណក្នុងសាលកីឡា។
មុននឹងជាប់ជាបេក្ខជន គេម្នាក់ៗសុទ្ធតែបានត្រូវគណៈកម្មការពេទ្យ ឲ្យតម្លៃដល់អការៈសុខភាព គេថាល្អឥតខ្ចោះ អាចធន់ទ្រាំបាននឹងការពិសោធន៍យ៉ាងយូរដល់ទៅជិត១ឆ្នាំកន្លះ ក្នុងលក្ខណៈដែលគេត្រូវខ្ទប់នៅដាច់ស្រឡះពីពិភពក្រៅតែម្តង។ ដ្បិត គ្រាន់តែសំរាប់ហោះទៅដល់ផ្កាយ Mars ដើម្បីឃើញតើនៅទីនោះ មានជីវិតឫទេ គឺទាមទារពេលអស់២៥០ថ្ងៃ បន្ទាប់មកត្រូវស្នាក់នៅធ្វើការស្រាវជ្រាវលើផ្ទៃដីភពនោះ ប្រមាណ១ខែឯណោះ លុះនៅទីបំផុតទើបហោះ ត្រឡប់មកផែនដីវិញដោយត្រូវចំណាយពេលអស់២៤០ថ្ងៃទៀតគិតជាសរុបគឺដល់៥២០ថ្ងៃ។
សំរាប់ជាការប្រៀបធៀបដើម្បីហោះទៅឋានព្រះច័ន្ទដែលជាផ្កាយរណបធម្មជាតិរបស់ផែនដីយើង និងដែលស្ថិតនៅចម្ងាយតែជិត៤សែន គ.ម.ពីផែនដី គឺស៊ីពេលអស់តែ៧៦ម៉ោង ឫជាង៣ថ្ងៃ៣យប់ប៉ុណ្ណោះ។ រីឯ ភពMars ត្រាច់ចរគឺនៅតាមតារាវិថីចម្ងាយដល់២២៨លានគ.ម.ពីព្រះអាទិត្យ ឆ្ងាយជាងតារាវិថីរបស់ផែនដីយើងដែលស្ថិតនៅចម្ងាយតែ១៥០លានគ.មពីព្រះអាទិត្យ ដូច្នេះភពMars ត្រាច់ចរតាមតារាវិថីឃ្លាតឆ្ងាយពីតារាវិថីរបស់ផែនដីដល់ទៅ៧៨លានគ.ម.ឯណោះ។
មកពីមូលហេតុនេះ បានជាទូរសញ្ញាបញ្ជូនពីផ្ទៃភពMarsទំរាំមកដល់ផែនដីយើងគឺស៊ីពេលដល់ទៅ២០នាទី។ ដើម្បីធ្វើត្រាប់តាមភាពយឺតយ៉ាវនៃការទទួលទូរសញ្ញានេះ ក្នុងមន្ទីរពិសោធន៍មានបង្កើតជាលក្ខណៈសមស្របដែរ ក៏ដូចជាទំរង់ផ្ទៃដីភពMars ដែលមានថ្មរដិបរដុប និងសំបូរដោយខ្សាច់។ គ្រឿងហូបចុកសំរាប់ពួកអ្នកអវកាសទាំងនោះ គឺសុទ្ធតែមានថេរវេលាទុកបានយូរមិនខូចគុណភាពឡើយ។ មានទាំងកន្លែងសំរាប់គេដាំដំណាំស្វ័យឧបត្ថម្ភទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ