រុស្ស៊ីប្រារព្ធខួបទី៦៥ នៃទិវាជ័យជំនះ ៩ឧសភា
នៅថ្ងៃអាទិត្យ ទី៩ ឧសភា ២០១០នេះ រុស្ស៊ីបានប្រារព្ធខួប ទី៦៥ នៃជ័យជំនះលើរបបហ៊ីត្លែរអាឡឺម៉ង់ កាលពីសង្រ្គាមលោកលើកទី២។ ដើម្បីអបអរទិវាជ័យជំនះនេះ រុស្ស៊ីបានរៀបចំការដើរក្បួនព្យុហយាត្រាយោធាដ៏ធំមួយ ដោយមានទាំងទាហានមកពីប្រទេសសមាជិកអូតង់ចូលរួមផង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា ពីម៉ូស្គូ
បុណ្យនេះ ជាបុណ្យធំបំផុតរបស់ប្រទេសរុស្ស៊ី ដ្បិតវាជាជ័យជំនះដណ្តើមបាន កាលពី ៦៥ឆ្នាំមុន ក្នុងសង្គ្រាមលោកលើកទី ២។ វាជាជ័យជំនះ ដែលជួយរក្សាជាតិ រុស្ស៊ីឲ្យនៅមានអត្តសញ្ញាណខ្លួន។ ជ័យជំនះនេះសំរេចបាន ដោយសារការចង “សម្ព័ន្ធភាពគ្នាប្រយុទ្ធទល់នឹងហ៊ីត្លែរ“។ សម្ព័ន្ធភាពនេះដឹកនាំ ម្ខាង ដោយរុស្ស៊ី (កាលណោះជាសូវៀត) និង ម្ខាងទៀត ដោយមហាប្រទេសបស្ចិមលោក រួមមាន អាមេរិក អង់គ្លេស និងបារាំង។
ខុសពីបណ្តាប្រទេសបស្ចិមលោក ដែលយកថ្ងៃ ៨ ឧសភា ជាទិវាជ័យជំនះ រុស្ស៊ី កំណត់យកថ្ងៃ៩ឧសភាវិញ។ នៅឆ្នាំនេះ ជាលើកទី១ ដែលរុស្ស៊ីបានអញ្ជើញប្រមុខរដ្ឋបរទេសមួយចំនួន ធំ ឲ្យមកចូលរួម ក្នុងពិធីបុណ្យជ័យជំនះនេះ។ វាក៏ជាលើកទីមួយដែរ ដែលកងយោធានៃបណ្តាប្រទេសអូតង់ បានមកចូលរួមក្នុងព្យុហយាត្រាកងទ័ពរុស្ស៊ី។
សង្គ្រាមនោះ ត្រូវរុស្ស៊ីដាក់ឈ្មោះជាផ្លូវការថា “ មហាសង្គ្រាមការពារមាតុភូមិរបស់សហភាពសូវៀត “ ពីព្រោះវាជាសង្គ្រាមស្លាប់រស់សំរាប់ជាតិរុស្ស៊ី ដែលកាលណោះ ជាសសរទ្រូងនៃសហភាពសូវៀតដោយមកពីមនោគមវិជ្ជាកុម្មុយនិស្តមហាប្រទេសនេះ បានត្រូវ Hitler ដាក់ទិសកំទេចឲ្យរលប់បាត់ពីផែនដីតែម្តង តាមរយៈការបញ្ជូនកម្លាំងទ័ពខ្លួនដល់ទៅ ៣ភាគ៤ឯណោះ ឲ្យទៅប្រយុទ្ធទល់នឹងសហភាពសូវៀត។ ថ្លែងសុន្ទរកថាក្នុងពិធីបុណ្យថ្ងៃនេះ លោកប្រធានាធិបតី Medvedev ដោយសំដែងអំណរគុណ ទៅកាន់បណ្តាយុទ្ធជនជើងចាស់រុស្ស៊ី ដែលសព្វថ្ងៃនៅរស់រាននៅឡើយក្នុងចំនួនប្រមាណ ២សែននាក់ ទោះបីគេម្នាក់ៗសុទ្ធតែមានចំណាស់វ័យលើសពី ៨០ឆ្នាំទៅហើយក្តី។
លោកប្រធានាធិបតី Medvedev បានសង្កត់ធ្ងន់ថា ពិតជាអ្នកទាំងនោះហើយដែលបានបញ្ចៀសប្រជាជាតិរុស្ស៊ីមិនឲ្យធ្លាក់ក្នុងស្ថានភាពជាទាសា ទាសី។ “ មហាសង្គ្រាមការពារមាតុភូមិរបស់សហភាពសូវៀត “ បានពន្យារទៅអស់ ១៤១៨ថ្ងៃ គឺពីថ្ងៃទី ២២ មិថុនា ឆ្នាំ១៩៤១ ពេលដែលទ័ពហ្វាស៊ីស្តអាល្លឺម៉ង់បានឈ្លានពានឆ្លងចូលព្រំដែនសហភាពសូវៀត រហូតដល់ថ្ងៃដែលមេទ័ពបស់ Hitler បានចុះហត្ថលេខាសុំចុះចាញ់។
សម្ព័ន្ធនេះប្រសូតមកតាមរយៈសេចក្តីថ្លែងការណ៍របស់សហប្រជាជាតិ នាថ្ងៃទី១ មករា ឆ្នាំ១៩៤២ ដែលចុះហត្ថលេខាដោយ ២៦ប្រទេស គឺដើម្បីតទល់នឹងសម្ព័ន្ធត្រីភាគី អាល្លឺម៉ង់ អ៊ីតាលី ជប៉ុន និងដែលមានមហិច្ឆិតាក្តោបក្តាប់យកពិភពលោកទាំងមូលតែម្តង។ ក្នុង “ សម្ព័ន្ធប្រឆាំងហ្វាស៊ីស្ត និងយោធានិយម “ ដែលនាំមុខដោយសហភាពសូវៀត អង់គ្លេស សហរដ្ឋអាមេរិក បារាំង លុះទៅទល់ពេលចប់សង្គ្រាម គឺមានដល់ទៅជិត ៥០ប្រទេសឯណោះ ក្នុងនោះមានជាអាទិ៍ ប្រទេសប៉ូឡូញ ចិន Yougoslavie tchecoslovaquie។
នៅដើមឡើយ គឺប្រទេសអង់គ្លេសដែលបានចូលខ្លួនមុនគេទៅក្នុងសង្គ្រាម នៅថ្ងៃទី ៣ កញ្ញា ឆ្នាំ ១៩៣៩ បានន័យថា ២ថ្ងៃបន្ទាប់ពីអាល្លឺម៉ង់បានវាយលុកទៅលើប្រទេសប៉ូឡូញ ហេតុដែលបានបណ្តាលឲ្យផ្ទុះឡើងជាសង្គ្រាមលោកលើកទី២តែម្តង។ ថ្ងៃទី ២២ មិថុនា ឆ្នាំ ១៩៤០ ប្រទេសបារាំងបានធ្លាក់ក្រោមការកាន់កាប់របស់អាល្លឺម៉ង់អស់៣ភាគ៥។ ភ្លើងសង្គ្រាមនេះបានឆាបឆេះដល់រុស្ស៊ី គឺនៅថ្ងៃទី ២២ មិថុនា ឆ្នាំ ១៩៤១។ សហរដ្ឋអាមេរិកបានប្រកាសចូលខ្លួនទៅក្នុងសង្គ្រាម នាថ្ងៃទី ៧ ធ្នូ ឆ្នាំ១៩៤១ ពេលដែលជប៉ុនដែលជាសម្ព័ន្ធមិត្តអាល្លឺម៉ង់នៅអាស៊ី បានវាយប្រហារបំផ្លាញកងនាវាអាមេរិកាំងនៅមូលដ្ឋាន Pearl Harbor កោះ Hawaii របស់អាមេរិក។
ខកខានមិនបានមកចូលរួមដោយផ្ទាល់ ក្នុងពិធីបុណ្យជ័យជំនះនៅម៉ូស្គូថ្ងៃនេះ គឺលោកប្រធានាធិបតីអាមេរិក Barack Obama ដែលជាប់សូត្រសិក្ខាបទក្នុងសកលវិទ្យាល័យមួយនែប្រទេសខ្លួន ដ្បិតគាត់បានសន្យាជាមួយនិស្សិតតាំងពីយូរមកហើយ។ មិនអាចមានវត្តមានដែរ គឺលោកប្រមុខរដ្ឋបារាំង Nicolas Sarkozy លោកនាយករដ្ឋមន្ត្រីអ៊ីតាលី Silvio Berlusconi ដែលសុទ្ធតែជាប់រវល់ដោះស្រាយជាបន្ទាន់ វិបត្តិនៅតំបន់ចាយលុយអឺរ៉ូ ព្រមទាំងលោក នាយករដ្ឋមន្ត្រីអង់គ្លេស Gordon Brown ដែលកំពុងវិលក្បុងនឹងការចាញ់ឆ្នោត។
ប៉ុន្តែសំខាន់ គឺមានការចូលរួមរបស់លោកស្រីនាយករដ្ឋមន្ត្រីអាល្លឺម៉ង់ Angela Merkel ដែលថ្លែងថា សង្គ្រាមនោះបានជួយឲ្យដកយកមេរៀននៃប្រវត្តិសាស្ត្រដែលតម្រូវឲ្យយើងទាំងអស់គ្នា ចេះរួមរស់ក្នុងសុខសន្តិភាព និងមិត្តភាពជាមួយគ្នា។ ចំណែកមេដឹកនាំចិន លោក Hu Jintao បានហៅសង្គ្រាមធ្វើដោយប្រជាជនសូវៀតនោះ ថាជា “ សង្គ្រាមស្នេហាជាតិ “។ ជាមួយគ្នានេះ នៅមានវត្តមានពីប្រមុខរដ្ឋជាង២០ប្រទេសទៀត ក្នុងនោះមាន ប្រទេសប៉ូឡូញ Serbie វៀតណាម អ៊ីស្រាអែល Tcheque Slovaquie Estonie Croatie និងបណ្តារដ្ឋឯករាជ្យនៃអតីតសហភាពសូវៀត។ល។ និង។ល។
ទីប្រជុំបុណ្យ គឺទីលានក្រហមមុខវិមានក្រឹមឡាំង ក្រុងម៉ូស្គូ។ បុណ្យនេះបានចាប់ផ្ដើមឡើងនៅម៉ោង ១០ ព្រឹក។ បន្ទាប់ពីការយាត្រាត្រួតពល ដោយរដ្ឋមន្ត្រីការពារជាតិ និងសុន្ទរកថាថ្លែងដោយលោកប្រធានាធិបតី Medvedev ក្នុងឋានៈជាអគ្គមេបញ្ជាការជាន់ខ្ពស់បំផុតរបស់ប្រទេសមក ក៏មានការដង្ហែរចូលទីលាន គឺទង់ជ័យជំនះដែលកាលពី ៦៥ឆ្នាំមុន បានត្រូវទាហានរុស្ស៊ីដោតលើអាគាររដ្ឋសភានៃក្រុង Berlin ដែលជារដ្ឋធានីនៃប្រទេសចាញ់សង្គ្រាម។ ក្បួនព្យុហយាត្រាផ្ទាល់ បើកដោយការបោះជំហានស្រុះៗគ្នានៃយោធារុស្ស៊ីចំនួន ១ម៉ឺន ៥រយនាក់។ បន្ទាប់មកជាលើកទី១ មានការចូលរួមដង្ហែរក្បួនយាត្រាពីកងយោធាចំនួន ១៤ប្រទេស សរុប ១ពាន់នាក់ និងដែលជាមធ្យម មួយក្រុមៗមានគ្នា ៧០ នាក់។ កងយោធាដែលគួរឲ្យទាក់ភ្នែកជាងគេ គឺក្បួនយោធាអង់គ្លេស បារាំង អាមេរិកាំង ប៉ូឡូញ ដែលសុទ្ធតែជាប្រទេសសមាជិកបក្សសម្ព័ន្ធអូតង់។
បន្តមក គឺការយាត្រានាំឲ្យលាន់សូរសឹងរង្គើដី នៃយានយន្តចំបាំងប្លែកៗដល់ទៅ ១៦១ គ្រឿង ឯណោះ ពីក្នុងនោះមានទាំងកាំជ្រួចមីស៊ីលទំនើបបំផុតធុន Topol សម្រាប់បាញ់ឆ្លងទ្វីបទៅចម្ងាយ ១០.០០០គ.ម.។ ជាបញ្ចប់ គឺការហោះបញ្ចេញរាងនៃអាកាសយានគ្រប់ធុនចំនួនដល់ទៅ ១២៧ គ្រឿងឯណោះ ហោះចែកជា ២០ក្រុម ពីក្នុងនោះ យន្តហោះចំបាំងគ្រប់ធុន គឺ៨៧គ្រឿង និង ឧទ្ធម្ភាគចក្រធុនធំៗ ប្លែកៗ ចំនួន ៤០គ្រឿង ហោះនៅកំពស់តែ ៣០០ម៉ែត្រប៉ុណ្ណោះពីដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ