វិបត្តិក្រិកធ្វើឲ្យទីផ្សារភាគហ៊ុន និងប្រាក់អឺរ៉ូធ្លាក់ស្រុតចុះ
វិបត្តិហិរញ្ញវត្ថុក្រិក បានបណ្តាលឲ្យកើតមានបាតុកម្មថ្មីៗជាច្រើន ប្រឆាំងនឹងវិធានការត្បិតត្បៀតរបស់រដ្ឋាភិបាល កាលពីម្សិលមិញ នៅប្រទេសក្រិក។ ទីផ្សារភាគហ៊ុននៅអឺរ៉ុប និងនៅទូទាំងពិភពលោកបានស្គាល់ការធ្លាក់ដាំដូង។ ប្រាក់អឺរ៉ូវិញក៏បានធ្លាក់ស្រុតចុះដល់កម្រិតមួយសែនទាបសម្រាប់ រយៈពេលមួយឆ្នាំចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់សៀក សារិន
បន្ថែមពីលើវិបត្តិហិរញ្ញវត្ថុដែលប្រទេសក្រិកកំពុងតែត្រូវធ្វើការប្រឈមតទល់ ស្រាប់តែមានទីភ្នាក់ងារStandard and Poor’s(SP)បានថ្លែងឲ្យដឹងថា ស្ថានភាពហិរញ្ញវត្ថុនៃប្រទេសក្រិកមានលក្ខណៈធ្ងន់ធ្ងរជាងការប្រមាណទុក ដែលទាំងនេះនឹងធ្វើឲ្យប្រទេសក្រិកមានការលំបាកកាន់តែខ្លាំងឡើងក្នុងការស្វែងរកប្រាក់កម្ចីដើម្បីដោះស្រាយបញ្ហាប្រាក់បំណុល និងវិបត្តិហិរញ្ញវត្ថុរបស់ខ្លួន។ កត្តានេះហើយដែលបានធ្វើឲ្យតម្លៃភាគហ៊ុន និងប្រាក់អឺរ៉ូធ្លាក់ស្រុតចុះខ្លាំងបែបនេះ។
ក្រោយពីថ្ងៃអង្គារម្សិលមិញដ៏ខ្មៅងងឹតដែលបណ្តាលមកពីទីផ្សារភាគហ៊ុន នៅប្រទេសសំខាន់ៗ និងទីផ្សារអឺរ៉ុបដែលបានឃើញតម្លៃភាគហ៊ុន នៅទីក្រុងប៉ារីសធ្លាក់ដួលដាំដូងចុះអស់-៣,៨២% ទីផ្សារភាគហ៊ុននៅទីក្រុងFrancfort នៃប្រទេសអាល្លឺម៉ង់ធ្លាក់ស្រុតអស់-២,៧៣% ហើយនិងទីក្រុងLondres ស្រុតអស់-២,៦១%។ នៅថ្ងៃពុធនេះ ទីផ្សារភាគហ៊ុននៅប្រទេសសំខាន់ៗ និងទីផ្សារអឺរ៉ុប នៅតែបន្តធ្លាក់ស្រុតចុះដ៏គួរឲ្យបារម្ភ។
ទីផ្សារភាគហ៊ុននៃប្រទេសព័រទុយហ្កាល នៅម៉ោង៨ម៉ោងសាកល នៃថ្ងៃពុធនេះបានដាំដូងបាត់បង់អស់-៥,៧១%បន្ថែមទៀត។ ទីផ្សារភាគហ៊ុននៃប្រទេសអេស្ប៉ាញបានបាត់បង់អស់-៣,៥%។ រីឯទីក្រុងParis ទីក្រុងFrancfort និងទីក្រុងLondresក៏បានស្គាល់ការធ្លាក់ស្រុតចុះពុំតិចឡើយនៅថ្ងៃពុធនេះ។ ទាំងនេះ ក៏ពីព្រោះតែគេបារម្ភខ្លាចវិបត្តិហិរញ្ញវត្ថុនៃប្រទេសក្រិកធ្លាក់ចុះដុនដាបខ្លាំងពេក ហើយទីក្រុងAthènesលែងមានសមត្ថភាពគ្រប់គ្រាន់នឹងសងប្រាក់បំណុលគេឲ្យបានទាន់ពេលដូចកាលកំណត់។
ដើម្បីជួយស្ដារស្ថានភាពហិរញ្ញវត្ថុនៃប្រទេសក្រិក មូលនិធិរូបិយវត្ថុអន្តរជាតិFMI ហើយនិងសហភាពអឺរ៉ុបបានសម្រេចចាត់វិធានការយ៉ាងរួសរាន់។ កិច្ចព្រមព្រៀងមួយដើម្បីជួយប្រទេសក្រិកនឹងត្រូវសម្រេច នៅថ្ងៃទី២ឧសភាខាងមុខនេះ។ ចំណែកឯលោកស្រីនាយករដ្ឋមន្ត្រីអាល្លឺម៉ង់Angela Merkel ក៏បានយល់ព្រមជួយការពារប្រទេសក្រិក ក្រោយពីមានការរួញរា។ ទាំងនេះហើយដែលបានបណ្តាលឲ្យទីផ្សារហិរញ្ញវត្ថុអន្តរជាតិបារម្ភខ្លាចក្រែង មូលនិធិរូបិយវត្ថុអន្តរជាតិFMI ហើយនិងសហភាពអឺរ៉ុបមកជួយដោះទុក្ខប្រទេសក្រិកពុំទាន់ពេលវេលា។ ដោយហេតុថា នៅថ្ងៃទី១៩ឧសភាដ៏ខ្លីខាងមុខនេះ ទីក្រុងAthènes ត្រូវចាំបាច់សងប្រាក់បំណុលគេឲ្យបានទាន់ពេល ដូចកាលកំណត់ទុកដែលមានដល់ទៅ ៩ពាន់លានអឺរ៉ូ។
ទីផ្សារហិរញ្ញវត្ថុបារម្ភខ្លាចក្រែងវិបត្តិនៃប្រទេសក្រិកឆ្លងរីករាលដាលដល់ប្រទេសព័រទុយហ្កាល និងប្រទេសអេស្ប៉ាញ។ ប្រទេសព័រទុយហ្កាល និងប្រទេសអេស្ប៉ាញដែលកំពុងមានស្ថានភាពសេដ្ឋកិច្ច និងហិរញ្ញវត្ថុធ្លាក់ចុះដុនដាបពុំចាញ់ប្រទេសក្រិកប៉ុន្មានឡើយ ក៏កំពុងឋិតនៅក្រោមការគំរាមរបស់ទីផ្សារហិរញ្ញវត្ថុ។ បច្ចុប្បន្ននេះ ប្រទេសអេស្ប៉ាញមានអ្នកឥតការងារធ្វើដល់ទៅជាង២០%នៃចំនួនប្រជាជនសកម្ម។ ហើយបរិមាណនៃប្រាក់បំណុលនៃប្រទេសទាំងពីរនេះក៏មានចំនួនយ៉ាងច្រើនមហិមា បើប្រៀបប្រដូចទៅនឹងប្រទេសឯទៀតៗនៃសហភាពអឺរ៉ុប។
ប្រសិនជាគេពុំចាត់វិធានការជួយប្រទេសក្រិកឲ្យបានទាន់ពេលទេ ប្រទេសក្រិកអាចនឹងឈានទៅរកភាពធនក្ស័យ។ បើប្រទេសក្រិកស្គាល់ភាពធនក្ស័យ ប្រទេសព័រទុយហ្កាល ប្រទេសអ៊ីតាលី និងប្រទេសអេស្ប៉ាញដែលមានស្ថានភាពហិរញ្ញវត្ថុសែនដុនដាប ច្បាស់ជានឹងត្រូវឋិត នៅក្រោមការគំរាមរបស់ទីផ្សារ ហើយនៅទីបំផុត វិបត្តិហិរញ្ញវត្ថុនឹងរីករាលដាលដល់ទូទាំងអឺរ៉ុប បន្ទាប់មកទៀតដល់ទូទាំងពិភពលោក។
ហេតុដូច្នេះហើយបានជាប្រមុខដឹកនាំនៃសហភាពអឺរ៉ុបបានប្រកាសឲ្យមានជំនួបកំពូលមួយ នៅថ្ងៃទី១០ឧសភាដើម្បីផ្តល់ជំនួយហិរញ្ញវត្ថុឲ្យប្រទេសក្រិកឲ្យបានទាន់ពេលវេលា និងដើម្បីផ្តល់ការទុកចិត្តឲ្យដល់ទីផ្សារហិរញ្ញវត្ថុ កុំឲ្យបារម្ភជ្រួលច្របល់ខ្លាំងពេក។ ក៏ប៉ុន្តែ ទង្វើទាំងនេះពុំបានមកជួយទប់ស្កាត់ការភ័យបារម្ភរបស់ទីផ្សារហិរញ្ញវត្ថុឡើយ។ ជាក់ស្ដែង នៅថ្ងៃពុធនេះ គេនៅតែឃើញមានការស្រុតធ្លាក់ចុះយ៉ាងខ្លាំងនៅលើទីផ្សារហិរញ្ញវត្ថុ នៅអឺរ៉ុប អាមេរិក និងនៅអាស៊ី។ ហើយប្រាក់អឺរ៉ូវិញ នៅថ្ងៃពុធនេះគេឃើញធ្លាក់ស្រុតចុះមកនៅត្រឹម១,៣១ដុល្លារ សម្រាប់១អឺរ៉ូដែលជាកម្រិតសែនទាបពុំដែលកើតមានសម្រាប់រយៈពេលមួយឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ