ខួប ២៤ឆ្នាំ នៃការផ្ទុះម៉ាស៊ីនប្រតិករនុយក្លេអ៊ែរនៅ Tchernobyl
ថ្ងៃទី ២៦ មេសានេះ នៅពេញទូទាំងប្រទេសអ៊ុយក្រែន ទង់ជាតិត្រូវគេបង្ហូតត្រឹមពាក់កណ្តាលដងទង់ ដើម្បីរំលឹកវិញ្ញាណក្ខ័ន្ធជនរងគ្រោះដោយការផ្ទុះម៉ាស៊ីនប្រតិករមួយ របស់ស្ថានីយអគ្គិសនីបរមាណូ នៅជាយទីក្រុង Tchernobyl កាលពីថ្ងៃទី ២៦ មេសា ឆ្នាំ១៩៨៦។ ចំណែកលោកប្រធានាធិបតី Yanoukovitch ផ្ទាល់ បានអញ្ជើញទៅកាន់កន្លែងសោកនាដកម្មនោះតែម្តង ចូលរួមក្នុងមិទ្ទិញកាន់ទុក្ខ។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា ពីទីក្រុងម៉ូស្គូ ប្រទេសរស្ស៊ី
កាលពី ២៤ឆ្នាំមុនក្នុងយប់ពីថ្ងៃទី២៥ឆ្លងចូលថ្ងៃទី ២៦មេសាឆ្នាំ១៩៨៦វេលាម៉ោង១និង២៣នាទីរំលងអធ្រាត្រទៅហើយពីក្នុងចំណោមម៉ាស៊ីនប្រតិករReacteur nucleaire ៤ ដែលនីមួយៗមានកម្លាំងភ្លើង ១.០០០ Megawatt នៃស្ថានីយអគ្គិសនីបរមាណូនៅជាយក្រុង Tchernobyl ប្រទេសអ៊ុយក្រែនស្រាប់តែមានReacteur មួយបានផ្ទុះឡើងផ្ទួនគ្នាជាពីរលើក ច្រានគម្របវាទម្ងន់ដល់ ៣.០០០តោន ខ្ទាតទៅកំពស់រាប់សិបម៉ែត្រឯណោះ។ ផ្ទុះនេះ គឺបណ្តាលមកពីប្រព័ន្ធបូមទឹករបស់វាសំរាប់ធ្វើឲ្យត្រជាក់ ឡើងក្តៅហួសកំរិត។ ធាតុធ្យូង graphite នៃប្លុកនោះ ឆេះទ្រលោមពេញក្នុងផ្ទៃមេឃ បង្កើតជាភ្នក់អគ្គិភ័យដ៏សែនគ្រោះថ្នាក់ សឹង ៣០កន្លែងនៅនឹងប្លុកជិតខាង។ ពីក្នុងចំណោមអ្នកលត់ភ្លើង ២៤០នាក់ដំបូង ដែលខំប្រយុទ្ធអស់ ៤ម៉ោងទំរាំបង្ក្រាបវាបានដូចចិត្ត មាន ៣១នាក់ បានពលីជីវិតខ្លួនមុនគេ។
កំទេចវិទ្យុសកម្មភាយចេញពីធាតុ Uranium ១៨៦ តោនក្នុងប្លុកផ្ទុះខូចនោះ ដែលហើរទៅលាយជាមួយពពកស្រទាប់ខ្ពស់ៗ ក៏រសាត់ទៅធ្លាក់នៅតាមដែនដីអ៊ុយក្រែនក្នុងផ្ទៃក្រឡា៥ម៉ឺនគ.ម.២ បណ្តាលឲ្យអ្នកស្រុកជាង ៣លាននាក់រងគ្រោះ ប្រែតំបន់ក្នុងរង្វង់ ៣០ គ.ម.នៅជុំវិញកន្លែងផ្ទុះ រស់នៅលែងកើត។ តំបន់ចំនួន១៩នៃប្រទេសរុស្ស៊ីមានផ្ទៃក្រឡា ៦ម៉ឺនគម.២ រស់នៅ ដោយបណ្តាជន ២លាន ៦សែននាក់ក៏រងគ្រោះដែរ។ រងគ្រោះទាំងដែនដី ៤ម៉ឺន ៦សែន គ.ម.២ របស់ Bielorussie នៅជិតខាង។ ពីក្នុងចំណោមមនុស្ស ៦ សែននាក់ដែលបានអន្តគមន៍ដោយផ្ទាល់ដើម្បីជំនះលើផលវិបាកនៃមហន្តរាយនោះ ហើយដែលសរីរាង្គកាយគេ ផ្ចាញ់ដោយធាតុវិទ្យុសកម្ម គិតក្នុង២៤ឆ្នាំកន្លងទៅ បានក្ស័យជីវិតទៅអស់ជាង ២ម៉ឺន នាក់ទៅហើយ។
តាមការសន្និដ្ឋានរបស់ពួកអ្នកប្រាជ្ញ ការផ្ទុះនៅ Tchernobyl បានផ្ចាញ់ធាតុវិទ្យុ សកម្មដល់ទៅ ៩០ ដងខ្លាំងជាងផ្ចាញ់ដោយការផ្ទុះនៃគ្រាប់បែកបរមាណូដែលអាមេរិកបានទម្លាក់ទៅលើក្រុងជប៉ុន Hiroshima កាលពី ៦៥ឆ្នាំមុន។ គួរនិយាយថា ប្លុកទាំង៤ នៃស្ថានីយអគ្គិសនីបរមាណូនៅជាយក្រុងTchernobyl ធ្លាប់ផ្តល់ភ្លើងអគ្គិសនីបាន៤.០០០ Megawatt ពីក្នុងកម្លាំងភ្លើងសរុបនៅអ៊ុយក្រែនបរិមាណ៧៥.៣០០ Megawatt បានត្រូវបិទឈប់ឲ្យដើរតាំងពីចុងឆ្នាំ២០០០ម៉្លេះ។ បច្ចុប្បន្ន រដ្ឋាភិបាលគ្រោងសង់ឡើងជាគម្របយក្សម្យ៉ាង កំពស់ ១០៥ម៉ែត្រ ទទឹង ១៥០ម៉ែត្រ និងបណ្តោយ ២៦០ម៉ែត្រ គ្របពីលើផ្នូរដែលកប់ប្លុកផ្ទុះទី៤នោះ ការពារទល់នឹងការភាយចេញនៃធាតុវិទ្យុសកម្ម ហើយដែលសំរាប់គោលដៅនេះ លោកប្រធានាធិបតីអាមេរិក Barack Obama បានប្រកាសក្នុងជំនួបកំពូលស្តីអំពីសន្តិសុខនុយក្លេអ៊ែរ នៅក្រុងវ៉ាស៊ីនតោន កាលពីថ្ងៃ ១២ មេសាថា អាមេរិកនឹងផ្តល់ដល់អ៊ុយក្រែននូវទឹកប្រាក់២៥០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ