លោកអូបាម៉ា និងថ្នាក់ដឹកនាំអឺរ៉ុបសន្យាបន្តដាក់ទណ្ឌកម្មលើរុស្ស៊ី ដរាបណាអ៊ុយក្រែនមិនទាន់មានសន្តិភាព
ជំនួបកំពូលជាលើកចុងក្រោយ ជាការលាគ្នា រវាងលោកអូបាម៉ា និងថ្នាក់ដឹកនាំកំពូលអឺរ៉ុប នៅទីក្រុងប៊ែកឡាំង បានបិទបញ្ចប់ទៅ នៅរសៀលថ្ងៃទី១៨ វិច្ឆិកា។ ថ្នាក់ដឹកនាំទាំងអស់ បានសន្យាថានឹងចាប់ដៃគ្នា ដើម្បីបន្តការដាក់ទណ្ឌកម្មលើរុស្ស៊ី ដរាបណាកិច្ចព្រមព្រៀងសន្តិភាពពេញលេញមួយ សម្រាប់អ៊ុយក្រែន នៅមិនទាន់បានអនុវត្តទេនោះ។ ដូចគ្នាដែរថា្នក់ដឹកនាំទាំងអស់ បានសន្យាថានឹងបន្តការងារនៅក្នុងអង្គការអូតង់ បើទោះបីជាប្រធានាធិបតីអាមេរិកថ្មី ធ្លាប់បានឃោសនាថា នឹងសើរើតួនាទីរបស់អាមេរិកក្នុងអង្គការនេះក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ជំនួបកំពូលពិសេសជាលើកចុងក្រោយសម្រាប់លោកអូបាម៉ា នេះ មានវត្តមានថ្នាក់ដឹកនាំអឺរ៉ុបដូចជា លោកហ្វ្រង់ស័រ ហូឡង់ ប្រធានាធិបតីបារាំង លោកស្រីអង់ហ្គេឡា មែគែល អធិការបតីអាល្លឺម៉ង់ លោកម៉ាតេអូ រេនហ្ស៊ី នាយករដ្ឋមន្ត្រីអ៊ីតាលី និងលោកស្រីតេរ៉េសា ម៉េ នាយករដ្ឋមន្ត្រីអង់គ្លេស។
សារផ្តែរផ្តាំមានជាច្រើន ដែលលោកអូបាម៉ា បានសំណូមពរឲ្យថ្នាក់ដឹកនាំអឺរ៉ុប ជួយពួតដៃគ្នា ដើម្បីថែរក្សាសន្តិភាព និងតំលៃប្រជាធិបតេយ្យនៃសកលលោក។ ក្នុងចំណោមបញ្ហាធំៗ គឺមានទំនាក់ទំនងជាមួយរុស្ស៊ី ដែលលោកអូបាម៉ា មានការព្រួយបារម្ភ។ ថ្នាក់ដឹកនាំអឺរ៉ុប ព្រមទាំងលោកអូបាម៉ា បានសន្យានឹងគ្នាថា បើទោះបីអាមេរិកផ្លាស់ប្តូរប្រធានាធិបតីថ្មី តែអឺរ៉ុបនឹងប្រកាន់ជំហរម៉ឺងម៉ាត់ ក្នុងការរក្សាទណ្ឌកម្មសេដ្ឋកិច្ចលើរុស្ស៊ី ដរាបណា រុស្ស៊ីមិនព្រមអនុវត្តកិច្ចព្រមព្រៀងសន្តិភាព ជាមួយអ៊ុយក្រែនទេនោះ។
ចំណុចសំខាន់មួយទៀត គឺទាក់ទិនទៅនឹងតួនាទីរបស់អង្គការអូតង់។ ប្រទេសអឺរ៉ុបបានសន្យាថា នឹងបន្តចំណងសហប្រតិបត្តិការ និងការសាមគ្គីគ្នា ដើម្បីរក្សាសន្តិសុខតំបន់ ហើយត្រៀមខ្លួនជានិច្ច ដើម្បីទប់ទល់ជាមួយនឹងការគំរាមកំហែងរបស់រុស្ស៊ី។ លោកអូបាម៉ា បានរំលឹកអំពីតួនាទីរបស់អង្គការអូតង់ និងតួនាទីរបស់អាមេរិក ក្នុងប្រវត្តិសាស្ត្រ ដែលបានជួយរក្សាការពារសន្តិសុខនិងសុវត្ថិភាពទាំងសងខាងមហាសមុទ្រអាត្លង់ទិក។
សូមបញ្ជាក់ថា ក្រោយពេលដែលលោកដូណាល់ត្រាំ បានជាប់ឆ្នោតក្លាយជាប្រធានាធិបតីថ្មី របស់អាមេរិក ថ្នាក់ដឹកនាំសហភាពអឺរ៉ុប បានសម្តែងការព្រួយបារម្ភជាខ្លាំង ដោយគេខ្លាចបន្ទាត់នយោបាយការបរទេសរបស់សហរដ្ឋអាមេរិក នឹងប្រែប្រួសខុសគ្នាមេឃនឹងដី ពីអ្វីដែលលោកអូបាម៉ា បានអនុវត្តកន្លងមក។
ក្នុងពេលឃោសនា លោកដូណាល់ត្រាំ បានអំពាវនាវថា សហរដ្ឋអាមេរិក គួរតែខិតទៅចូលឲ្យជិតនឹងរុស្ស៊ី។ លោកក៏បានអំពាវនាវទៀតថា បើលោកឈ្នះឆ្នោត លោកនឹងរុះរើដំណើរការរបស់អង្គការអូតង់ ព្រោះលោកមិនចង់ឲ្យអាមេរិកតែម្នាក់ឯង ជាអ្នកទទួលបន្ទុកផ្តល់លុយកាក់ និងការពារសន្តិសុខដល់ប្រទេសសម្ព័ន្ធមិត្តផ្សេងទៀតទេ។ បើចាំបាញ់ លោកដូណាល់ត្រាំ ថានឹងដកខ្លួនចេញពីអូតង់ទៀត។
ក្រៅពីការព្រួយបារម្ភ ពីចរន្តការទូតរបស់រដ្ឋាភិបាលអាមេរិកថ្មី ប្រទេសនៅអឺរ៉ុបក៏មានការបារម្ភផងដែរពី ទស្សនវិស័យសេដ្ឋកិច្ចរបស់អាមេរិក ក្នុងអាណត្តិរបស់លោកដូណាល់ត្រាំ។ បើសិនជាដូចការប្រកាសឃោសនា របស់លោកដូណាល់ត្រាំ អាមេរិក និងក្លាយជាប្រទេសដែលមានសេដ្ឋកិច្ចបិទខ្ទប់ តាមរយៈការដាក់ជញ្ជាំងរាំងខ្ទប់ ការដោះដូរពាណិជ្ជកម្មសេរី ជាមួយប្រទេសផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ