លោកហូឡង់៖អនាគតកិច្ចព្រមព្រៀងក្រុងប៉ារីសត្រូវតែមានលក្ខណៈបង្ខិតបង្ខំតាមផ្លូវច្បាប់
ជាង ២សប្តាហ៍មុននឹងសន្និសីទអន្តរជាតិស្តីពីបញ្ហាអាកាសធាតុបើកធ្វើក្នុងទីក្រុងប៉ារីស ប្រទេសបារំាង មានការលើកឡើងខុសៗគ្នាទាក់ទងនឹងអនាគតកិច្ចព្រមព្រៀងដែលនឹងត្រូវសម្រេចឲ្យបាននៅក្រោយសន្និសីទ។ សម្រាប់សហរដ្ឋអាមេរិក លោកប្រមុខការទូតចន ឃ៊ែរីបានអះអាងនៅក្នុងបទសម្ភាសន៍ជាមួយកាសែត Financial Times នាថ្ងៃព្រហស្បតិ៍ ទី១២ វិច្ឆិកាថា អនាគតកិច្ចព្រមព្រៀងក្នុងក្រុងប៉ារីសដែលកំណត់ពីកម្មវត្ថុកាត់បន្ថយកំដៅក្នុងភពផែនដីនឹងគ្មានលក្ខណៈបង្ខិតបង្ខំតាមផ្លូវច្បាប់ទេ និងថា ករណីនេះក៏ធ្លាប់មានចែងនៅក្នុងសន្ធិសញ្ញាក្រុងក្យូតូឆ្នំា ១៩៩៧ ដែរ។ បារំាងបានបញ្ចេញប្រតិកម្មភ្លាមៗ ដោយមិនសប្បាយចិត្តនឹងសម្តីរបស់លោកឃ៊ែរីទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ថ្នាក់ដឹកនាំបារាំងដែលបានបញ្ចេញប្រតិកម្មតបនឹងសម្តីលោកប្រមុខការទូតអាមេរិកចន ឃ៊ែរីមុនគេ គឺលោកប្រមុខការទូតបារំាងឡូរ៉ង់ ហ្វាប៊ីយូស។ លោកហ្វាប៊ីយូសដែលបានចាត់ទុកការលើកឡើងរបស់លោកឃ៊ែរីថា គួរឲ្យសោកស្តាយខ្លំាងណាស់។ លោកប្រមុខការទូតបារំាងបានបន្ថែមថា អ្វីដែលគេអាចបន្តជជែកគ្នាបាន គឺប្រភេទនៃអនាគតនៃសេចក្តីសម្រេច តើជាកិច្ចព្រមព្រៀងអន្តរជាតិ ឬមួយជាសន្ធិសញ្ញាអន្តរជាតិ។ សម្រាប់លោកហ្វាប៊ីយូស ទោះបីជាកិច្ចព្រមព្រៀង ឬសន្ធិសញ្ញា គឺត្រូវតែមានការអនុវត្តន៍ជាក់ស្តែងតាមផ្លូវច្បាប់ ពោលមិនមែនជាកិច្ចព្រមព្រៀងខ្យល់ ឬសន្ធិសញ្ញាខ្យល់នោះទេ។
ប្រតិកម្មក៏មានដែរពីលោកប្រធានាធិបតីបារំាងហ្រ្វង់ស័រ ហូឡង់។ ថ្លែងពីប្រទេសម៉ាល់ដែលលោកកំពុងចូលរួមក្នុងជំនួបកំពូលអឺរ៉ុប-អាហ្រ្វិកស្តីពីជនភៀសខ្លួន លោកហូឡង់បានថ្លែងយ៉ាងដូច្នេះថា៖
ប្រសាសន៍របស់លោកហូឡង់ប្រែសម្រួលដោយ គួច គន្ធារ៉ា
« ប្រសិនបើកិច្ចព្រមព្រៀងមិនមានលក្ខណៈបង្ខិតបង្ខំតាមផ្លូវច្បាប់ទេ គឺដូចជាគ្មានកិច្ចព្រមព្រៀងអ៊ីចឹងដែរ។ ត្រង់ចំណុចនេះមានន័យថា គេពិតជាមិនអាចផ្ទៀងផ្ទាត់មើល ឬមួយក៏ត្រួតពិនិត្យលើកិច្ចសន្យាទំាងអស់ដែលនឹងអនុម័តនៅពេលខាងមុខ។
ខ្ញុំយល់ណាស់ថា សហរដ្ឋអាមេរិកកំពុងជួបប្រទះនូវការប្រទាញប្រទង់ជាមួយសភារបស់ខ្លួន ហើយនេះ ជារឿងមួយធម្មតាទេ ហើយខ្ញុំគិតថា វាជារឿងមួយលំបាកខ្លំាងណាស់។ ក៏ប៉ុន្តែ បើមានកិច្ចព្រមព្រៀងក្រុងប៉ារីសនៅថ្ងៃខាងមុខ កិច្ចព្រមព្រៀងនោះនឹងត្រូវតែមានលក្ខណៈបង្ខិតបង្ខំ ហើយរាល់ពាក្យសន្យាទំាងឡាយដែលបានអនុម័តនឹងត្រូវគោរពឲ្យបានត្រឹមត្រូវ។
សហរដ្ឋអាមេរិកខ្លួនឯងបានយល់ព្រមរួមចំណែកក្នុងការកាត់បន្ថយកំដៅក្នុងភពផែនដី។ គឺអាមេរិកខ្លួនឯងនេះហើយដែលបានបង្ហាញពីឆន្ទៈ និងការសន្យាខ្លួន ព្រមទំាងចង់ឲ្យមានការតាមដានផ្ទៀងផ្ទាត់ជាប្រចំានៃដំណើរការអនុវត្តន៍កិច្ចសន្យាដើម្បីឈានទៅដល់គោលដៅដោយមិនឲ្យសីតុណ្ហភាពក្នុងបរិយាកាសកើនលើសពី ២អង្សារ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ