រដ្ឋសភាអ៊ុយក្រែននីតិកាលថ្មី ថ្ងៃនេះ បានរួមប្រជុំពេញអង្គជាលើកដំបូង
រដ្ឋសភានេះ ត្រូវបានបង្កើតឡើង ស្របនឹងលទ្ធផលនៃការបោះឆ្នោតមុនអាណត្តិ ដែលបានប្រព្រឹត្តទៅមួយខែមុន គឺថ្ងៃ២៦តុលា។ អាសនៈភាគច្រើនលើសលុប ក្នុងរដ្ឋសភានេះ គឺដណ្តើមបានដោយគណបក្សទាំងឡាយ ក្រោមការដឹកនាំនៃអ្នកបស្ចិមលោកនិយម ដែល បានធ្វើ បដិវត្តន៍មានពណ៌ ក្រោមឈ្មោះថា “ម៉ៃដាន” ជាឈ្មោះទីលានឯករាជ្យកណ្តាល ក្រុងគៀវ ពន្យារទៅអស់៣ខែទម្រាំផ្តួលរបបដឹកនាំ មានទំនោរមកខាងរុស្ស៊ី កាលពីថ្ងៃ២២ កុម្ភៈ។
ចុះផ្សាយនៅថ្ងៃ៖
ស្តាប់ - ០២:០៤
ដោយចាប់ផ្តើមសម័យប្រជុំពេញអង្គនេះ តំណាងរាស្ត្រទាំង៤២៣នាក់ បានច្រៀងចម្រៀងបួងសួង សុំសន្តិភាពសម្រាប់ទឹកដីអ៊ុយក្រែន និងបានទទួលសច្ចាប្រណិធាន។ ចំណុចមួយគួរឲ្យកត់សម្គាល់ គឺថា ពីក្នុង៤២៣នាក់នោះ អវត្តមានគឺតែម្នាក់គត់ លោកស្រី Nadezhda Savchenko អតីតអ្នកបើកឧទ្ធម្ភាគចក្រយោធា ដែលកំពុងជាប់ក្នុងមន្ទីរឃុំឃាំង នៅរុស្ស៊ី ក្រោមបទចោទប្រកាន់ថា គាត់បានបាញ់សម្លាប់អ្នកកាសែតរុស្ស៊ីដោយចេតនា ហើយ ដែលត្រូវ គណបក្សលោកស្រី អតីតនាយករដ្ឋមន្ត្រីអ៊ុយក្រែន Julia Timochenko ប្រកាសថា ជាប់ឆ្នោតជាតំណាងរាស្ត្រអ៊ុយក្រែន តាមបញ្ជីឈ្មោះបេក្ខជនគណបក្សគាត់ និងថែមទាំងជាប់ជាតំណាងរាស្ត្រអ៊ុយក្រែន ប្រចាំនៅសភាអឺរ៉ុបទៅផង ដើម្បីផ្តល់ដល់រូបស្ត្រីនេះ នូវអភ័យឯកសិទ្ធិ។ ប៉ុន្តែទោះយ៉ាងណាក្តី ក៏តំណាងរាស្ត្ររូបនេះ នៅបន្តជាប់ក្នុង ពន្ធនាគាររុស្ស៊ីដដែល។
ថ្ងៃព្រហស្បតិ៍នេះ ត្រូវប្រកាសអំពី សម្ព័ន្ធភាគច្រើន នៃពួកអ្នកតំណាងរាស្ត្រ ដែលផ្សំឡើងពី ៥គណបក្ស សុទ្ធតែបស្ចិមលោកនិយម ដែលក្នុងការបោះឆ្នោតសភាមួយខែមុន បានទទួល សម្លេងគាំទ្រ លើសពី៥% ហើយដណ្តើមបានអាសនៈប្រចាំនៅរដ្ឋសភា។ ដើរតួជាស្នូលនៃសម្ព័ន្ធនោះ គឺគណបក្សលោកប្រធានាធិបតី ប៉ូរូឆេនកូ ដែលទទួលបានអាសនៈចំនួនដល់ ១៣២ និងគណបក្សលោកនាយករដ្ឋមន្ត្រី យ៉ាតសេញុក ដែលបាន៨២អាសនៈ។
គណបក្សមួយទៀត ដែលចាត់ទុកខ្លួនឯងជា បក្សប្រឆាំង ក្នុងការបោះឆ្នោតកន្លងទៅ ក៏ចេះដណ្តើមបានអាសនៈចំនួនដល់ ៦៤ ប៉ុន្តែត្រូវពួកបាតុករ ដែលផ្តុំគ្នានៅពីមុខអគាររដ្ឋសភា ស្រែកហួចចំអកឲ្យ ទាំងត្មះតិះដៀលគេ ថាចង់បម្រើឲ្យផលប្រយោជន៍រុស្ស៊ីឬ?
សម័យប្រជុំពេញអង្គថ្ងៃនេះ បន្ទាប់ពីដកឃ្លាទៅសម្រាកមួយរយៈសិន នឹងចាប់ផ្តើមធ្វើការ បោះឆ្នោតជ្រើសរើសរូបប្រធានថ្មីនៃរដ្ឋសភា។
ជាការកត់សម្គាល់ តាំងពីអ៊ុយក្រែនបានឯករាជ្យក្នុងឆ្នាំ១៩៩១មក រដ្ឋសភាលើកនេះ ជា រដ្ឋសភានីតិកាលទី៨ ដែលមានអាណត្តិរយៈពេល៥ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ