វិបត្តិស៊ីរី៖រុស្ស៊ី និងសហគមន៍អន្តរជាតិបន្តមិនចុះសម្រុងគ្នាជុំវិញវត្តមានលោកអាសាដ
នៅថ្ងៃពុធ ទី១៦ កញ្ញានេះ ប្រទេសបារំាង តាមរយៈលោករដ្ឋមន្រ្តីក្រសួងការពារជាតិ Jean-Yves Le Drian បានប្រកាសឲ្យដឹងថា ទ័ពអាកាសបារំាងនឹងបើកការវាយប្រហារផ្លូវអាកាសជាលើកទី១នៅប៉ុន្មានសប្តាហ៍ខាងមុខដើម្បីប្រឆំាងនឹងអង្គការរដ្ឋអ៊ីស្លាមនៅក្នុងប្រទេសស៊ីរី។ ទន្ទឹមគ្នានេះ សង្រ្គាមពាក្យសម្តីកំពុងបន្តកើតមានយ៉ាងផុសផុលរវាងរុស្ស៊ី និងសហគមន៍អន្តរជាតិពិសេសអាមេរិកជុំវិញការគំាទ្រ និងការចូលរួមរបស់ទ័ពរុស្ស៊ីជួយជ្រោមជ្រែងទ័ពរដ្ឋាភិបាលស៊ីរីរបស់លោកប្រធានាធិបតីអាសាដ។ នៅក្នុងកិច្ចសន្ទនាជាមួយសារព័ត៌មានរុស្ស៊ីចេញផ្សាយថ្ងៃនេះ លោកអាសាដមិនបានបញ្ជាក់លើព័ត៌មាននេះទេ តែបានអះអាងពីការគំាទ្ររបស់ប្រទេសអ៊ីរ៉ង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:១១
នេះមិនមែនជាលើកទី១ ទេដែលលោកប្រធានាធិបតីស៊ីរីអាសាដបានប្រកាសសារភាពជាសាធារណៈថា លោកទទួលបានការគំាទ្រពីប្រទេសអ៊ីរ៉ង់តំាងពីស៊ីរីបានធ្លាក់ក្នុងវិបត្តិនយោបាយក្នុងឆ្នំា ២០១១។ យោងតាមលោកអាសាដ អ៊ីរ៉ង់បានផ្តល់ការគំាទ្រទំាងនៅក្នុងផ្នែកនយោបាយ យោធា និងសេដ្ឋកិច្ច។ នៅក្នុងការគំាទ្រផ្នែកយោធាត្រូវបានលោកអាសាដលំអិតថា មានត្រឹមតែជំនួយសម្ភារៈយោធា និងការដោះដូរក្រុមអ្នកជំនាញយោធាប៉ុណ្ណោះ ពោលមិនមានវត្តមានទាហានអ៊ីរ៉ង់នៅក្នុងប្រទេសស៊ីរីទេ។
លោកអាសាដបានបញ្ជាក់ជាថ្មីថា ការគំាទ្រយ៉ាងពេញទំហឹងរបស់អ៊ីរ៉ង់ចំពោះស៊ីរី និងរូបលោក គឺជារឿងមួយធម្មតាក្នុងនាមជាប្រទេសជិតខាងទំាងពីរដែលមានទំនាក់ទំនងល្អតំាងពី ៣ទសវត្សកន្លងមក និងថា តួនាទីរបស់អ៊ីរ៉ង់ចំពោះស៊ីរី គឺជាតួនាទីមួយមិនអាចខ្វះបាន។ សម្រាប់លោកអាសាដ សម្ព័ន្ធភាពរវាងទីក្រុងតេហេរ៉ង់ និងទីក្រុងដាម៉ាស់បានផ្អែកលើសេចក្តីទុកចិត្តរវាងគ្នា។ គួររម្លឹកជូនថា ស៊ីរីជាប្រទេសអារ៉ាប់តែមួយគត់នៅក្នុងតំបន់ដែលបានគំាទ្រអ៊ីរ៉ង់នៅក្នុងសង្រ្គាមប្រឆំាងអ៊ីរ៉ាក់ចន្លោះឆ្នំា ១៩៨០ និង ១៩៨៨។
ដូច្នេះអ្វីដែលអ៊ីរ៉ង់បានធ្វើចំពោះស៊ីរីពេលនេះ ជាការសងគុណ ឬមួយជាការជួយគ្នាទៅវិញ ទៅមកក្នុងគ្រាអាសន្ន។ តែគេក៏មិនត្រូវភ្លេចនិយាយថា អ៊ីរ៉ង់ដែលជាប្រទេសកាន់សាសនាអ៊ីស្លាមនិកាយឈីអ៊ីតធំជាងគេក្នុងតំបន់ក៏ត្រូវមានកាតព្វកិច្ចការពារអ្នកដឹកនំាស៊ីរីដែលជាក្រុមនិកាយឈីអ៊ីតដូចគ្នាដែរ។
លោកពូទីនបានបញ្ជាក់ពីការបន្តជំហរគំាទ្ររបបលោកអាសាដ
នៅក្នុងកិច្ចសន្ទនាជាមួយសារព័ត៌មានរុស្ស៊ីដដែលនោះ លោកអាសាដមិនបានបញ្ជាក់លើព័ត៌មានជុំវិញវត្តមានទាហានរុស្ស៊ីក្នុងទឹកដីស៊ីរីដែលសហគមន៍អន្តរជាតិ ពិសេសអាមេរិកកំពុងចោទរុស្ស៊ីទេ។ ចំណែកលោកប្រធានាធិបតីពូទីនផ្ទាល់ខ្លួនក៏មិនបានបញ្ជាក់ព័ត៌មាននេះដែរ តែបានចេញមុខឆ្លើយថា រុស្ស៊ីបានគំាទ្រពេញទី និងជួយការពាររបបស៊ីរីរបស់លោកអាសាដនៅក្នុងយុទ្ធនាការប្រយុទ្ធប្រឆំាងនឹងការឈ្លានពានរបស់ពួកភេរវជន និងថា មូស្គូបន្ត និងនៅតែបន្តផ្តល់ការគំាទ្រជំនួយបច្ចេកទេសយោធាដល់រដ្ឋាភិបាលទីក្រុងដាម៉ាស។
ទន្ទឹមគ្នានេះ លោកពូទីនបានបដិសេធយ៉ាងដាច់អហង្ការលើការចោទប្រកាន់របស់សហគមន៍អន្តរជាតិដែលថា រុស្ស៊ីជាអ្នកឆ្កឹះឆ្កៀល និងជាអ្នកចិញ្ចឹមបញ្ហានៅស៊ីរីសព្វថ្ងៃ ពិសេសលំហូរជនភៀសខ្លួននៅក្នុងទ្វីបអឺរ៉ុប។ ការថ្លែងរបស់លោកពូទីនយ៉ាងដូច្នេះត្រូវបានធ្វើឡើងនៅក្នុងជំនួបកំពូលអង្គការនៃសន្ធិសញ្ញាសន្តិសុខរួមរៀបចំនៅក្នុងទីក្រុងឌូស្ហាន់បេ ប្រទេសតាហ្ស៊ីគីស្ថាននាថ្ងៃអង្គារ ទី១៥ កញ្ញា។ មនុស្សខ្លំាងក្រុងក្រិមឡំាងរូបនេះបានអះអាងថា បើមូស្គូបញ្ឈប់ការគំាទ្រចំពោះក្រុងដាម៉ាស ម្ល៉េះស្ថានការណ៍នៅស៊ីរីនឹងធ្លាក់ដុនដាបជាងសព្វថ្ងៃ ហើយលំហូរជនភៀសខ្លួនទៅកាន់ទ្វីបអឺរ៉ុបនឹងមានច្រើនជាងនេះ។ ទន្ទឹមគ្នានេះ លោកពូទីនក៏មិនភ្លេចធ្វើការវាយប្រហារសហគមន៍អន្តរជាតិវិញដោយបញ្ជាក់ថា វិបត្តិស៊ីរី និងវិបត្តិជនភៀសខ្លួនសព្វថ្ងៃ គឺជាលទ្ធផលនៃការឈឺឆ្អាលរបស់បរទេស។
ប្រសាសន៍របស់លោកប្រធានាធិបតីរុស្ស៊ីពូទីនប្រែសម្រួលដោយ គួច គន្ធារ៉ា
« សព្វថ្ងៃនេះ រុស្ស៊ីបានទទួលរងការចោទប្រកាន់ថា ជាអ្នកទទួលខុសត្រូវតែម្នាក់គត់ក្នុងការបង្កើតឲ្យមានបញ្ហានៅក្នុងប្រទេសស៊ីរី និងវិបត្តិជនភៀសខ្លួនសព្វថ្ងៃ។ ខ្ញុំចង់និយាយថា ការដែលប្រជាជនស៊ីរីបានរត់ចោលស្រុក គឺដើម្បីគេចពីសង្រ្គាមដែលបរទេសជាអ្នកបញ្ឆេះឡើង។ ពិតណាស់ ពលរដ្ឋស៊ីរីបានរត់ភៀសខ្លួនពីការធ្វើទុក្ខបុកម្នេញរបស់ពួកភេរវជន តែបើគ្មានការគំាទ្រពីរុស្ស៊ីទេ ស៊ីរីនឹងធ្លាក់ដុនដាបជាងលីប៊ី ហើយចំនួនជនភៀសខ្លួននឹងមានច្រើនជាងនេះ »។
បុគ្គលអាសាដនៅបន្តជាបញ្ហាសម្រាប់ដំណោះស្រាយឲ្យវិបត្តិស៊ីរី
លោកប្រធានាធិបតីស៊ីរីអាសាដកំពុងបន្តជាឆ្អឹងទទឹង កនៅក្នុងដំណោះស្រាយឲ្យវិបត្តិស៊ីរីដែលបានអូសបន្លាយអស់រយៈពេល ៤ឆ្នំា។ នៅខាងសហគមន៍អន្តរជាតិគឺច្បាស់ណាស់ គេត្រូវតែភាត់លោកអាសាដចេញពីឆាកនយោបាយស៊ីរី តែសម្រាប់រុស្ស៊ី និងសម្ព័ន្ធមិត្តរបស់ស៊ីរីវិញបានយល់ឃើញថា លោកអាសាដនៅតែជាតួអង្គនយោបាយមួយមិនអាចខ្វះសម្រាប់ដំណោះស្រាយឲ្យវិបត្តិស៊ីរី។
ថ្មីៗនេះ ប្រទេសរុស្ស៊ីថែមទំាងបានអំពាវនាវឲ្យសហគមន៍អន្តរជាតិចាប់ដៃជាមួយលោកអាសាដដើម្បីប្រយុទ្ធប្រឆំាងនឹងពួកជីហាតអង្គការរដ្ឋអ៊ីស្លាម។ ក្រុងម៉ូស្គូបានយល់ឃើញថា មានតែការរួមសហការណ៍ជាមួយលោកអាសាដទើបទើបគេអាចយកឈ្នះលើអង្គការរដ្ឋអ៊ីស្លាមនៅស៊ីរី និងអ៊ីរ៉ាក់។
តែសហគមន៍អន្តរជាតិបានបដិសេធដោយសំអាងថា លោកអាសាដជាមនុស្សផ្តាច់ការសម្លាប់ពលរដ្ឋខ្លួនឯង។ គួរជម្រាបជូនថា ក្រៅពីធ្វើសង្រ្គាមប្រឆំាងនឹងពួកបះបោរ ទ័ពរបស់អាសាដក៏កំពុងប្រឈមមុខនឹងពួកជីហាតអង្គការរដ្ឋអ៊ីស្លាមដែរ។ លោករដ្ឋមន្រ្តីការពារជាតិ Jean Yves Le Drian បានបញ្ជាក់នៅថ្ងៃនេះថា រុស្ស៊ីជាប្រទេសមួយសម្រាប់ដំណោះស្រាយឲ្យវិបត្តិស៊ីរី តែមិនត្រូវឆ្លងកាត់តាមលោកអាសាដទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ