ហេតុអ្វីបានជាបារំាងទទួលរងការវាយប្រហារពីអ៊ីរ៉ង់ខ្លំាងម៉្លេះ?
នៅថ្ងៃពុធ ទី២៩ កក្កដា លោករដ្ឋមន្រ្តីការបរទេសបារំាង Laurent Fabius នឹងទៅបំពេញទស្សនកិច្ចនៅក្នុងប្រទេសអ៊ីរ៉ង់។ ដំណើរទស្សនកិច្ចរបស់លោកប្រមុខការទូតបារំាងនៅអ៊ីរ៉ង់បានធ្វើឡើង ក្រោយពីមានកិច្ចព្រមព្រៀងជាប្រវត្តិសាស្រ្តស្តីពីកម្មវិធីនុយក្លេអ៊ែរអ៊ីរ៉ង់ចុះហត្ថលេខាកាលពីថ្ងៃទី១៤ កក្កដាកន្លងទៅរវាងសហគមន៍អន្តរជាតិ និងភាគីអ៊ីរ៉ង់។ តែនាប៉ុន្មានថ្ងៃមុនការទៅដល់របស់លោកប្រមុខការទូតបារំាងនៅអ៊ីរ៉ង់ ក្រុមអ្នកអភិរក្សនិយម រួមទំាងមធ្យោបាយឃោសនាមហាជនអ៊ីរ៉ង់មួយចំនួនបាននាំគ្នាវាយប្រហារខ្លាំងៗលើរូបលោក Fabius។ នៅថ្ងៃអង្គារ ទី២៨ កក្កដានេះ លោកប្រធានាធិបតីបារំាងហ្រ្វង់ស័រ ហូឡង់បានព្រមានទុកជាមុនរួចជាស្រេចថា ឥរិយាបថរបស់អ៊ីរ៉ង់ចំពោះលោក Fabius គឺជាតេស្តដ៏សំខាន់សម្រាប់ទំនាក់ទំនងអ៊ីរ៉ង់ និងបារាំង។
ចុះផ្សាយនៅថ្ងៃ៖
ស្តាប់ - ០៤:៤៦
បើនិយាយជាលក្ខណៈទូទៅ គឺប្រទេសបារំាងតែម្តងដែលកំពុងទទួលរងការវាយប្រហារយ៉ាងចាស់ដៃពីប្រទេសអ៊ីរ៉ង់ ពិសេសពីក្រុមអ្នកអភិរក្សនិយមអ៊ីរ៉ង់។ ចូរកុំភ្លេចថា ប្រជាជនអ៊ីរ៉ង់មិនមែនទើបស្គាល់លោក Laurent Fabius ដោយសារតែលោកកាន់តំណែងជារដ្ឋមន្រ្តីការបរទេសបារំាងសព្វថ្ងៃទេ តែធ្លាប់ស្គាល់តំាងពីលោកកាន់តំណែងជានាយករដ្ឋមន្រ្តីបារំាងចន្លោះខែកក្កដា ឆ្នំា ១៩៨៤ និងខែមីនា ឆ្នំា ១៩៨៦ ក្រោមលោកប្រធានាធិបតី François Mitterrand។ មានរឿងរ៉ាវសំខាន់ចំនួនពីរដែលប្រជាជនអ៊ីរ៉ង់មិនអាចបំភ្លេចឈ្មោះលោក Laurent Fabius បាន គឺរឿងអតីតកាលក្នុងនាមលោកជានាយករដ្ឋមន្រ្តី និងរឿងបច្ចុប្បន្នក្នុងនាមលោកជារដ្ឋមន្រ្តីការបរទេស។
រឿងបច្ចុប្បន្ន គឺជាប់ពាក់ព័ន្ធនឹងជំហររបស់បារំាងទាក់ទងនឹងសំណុំរឿងនុយក្លេអ៊ែរអ៊ីរ៉ង់។ ជាការពិត ជិត ២សប្តាហ៍កន្លងមកហើយដែលសហគមន៍អន្តរជាតិ និងភាគីអ៊ីរ៉ង់បានចុះហត្ថលេខាលើកិច្ចព្រមព្រៀងជាប្រវត្តិសាស្រ្តមួយស្តីពីកម្មវិធីនុយក្លេអ៊ែរអ៊ីរ៉ង់ដ៏ចម្រូងចម្រាស តែគេក៏មិនត្រូវភ្លេចនិយាយទេថា ក្នុងចំណោមភាគីចរចា ៥ បូក១ ដែលមានអាមេរិក អង់គ្លេស រុស្ស៊ី ចិន និងអាល្លឺម៉ង់ បារំាងជាប្រទេសដែលមានជំហរតឹងតែងជាងគេចំពោះអ៊ីរ៉ង់ ពោលមិនចេះតែផ្តល់សម្បទានងាយៗឲ្យអ៊ីរ៉ង់ទេ។ ធ្ងន់ធ្ងរជាងនេះ អ៊ីរ៉ង់បានចោទលោក Laurent Fabius ពីបទគំាទ្រជំហររបស់ប្រទេសអ៊ីស្រាអែល និងអារ៉ាប៊ីសាអូឌីតដែលជាសត្រូវស៊ូពូជរបស់អ៊ីរ៉ង់ពាក់ព័ន្ធនឹងរឿងនុយក្លេអ៊ែរអ៊ីរ៉ង់។
ចំណែករឿងអតីតកាលដែលមិនអាចរំងាប់កំហឹងរបស់ប្រជាជនអ៊ីរ៉ង់ គឺទាក់ទងនឹងរឿងឈាមមានផ្ទុកមេរោគអេដស៍ ឬមេរោគថ្លើមដែលក្រុមហ៊ុនបារំាងមួយបានលក់ទៅបរទេស ពិសេសទៅអ៊ីរ៉ង់ ដោយបានចម្លង និងសម្លាប់ប្រជាជនអ៊ីរ៉ង់ជាច្រើននាក់។ រឿងអាស្រូវនេះបានផ្ទុះឡើងក្នុងចន្លោះឆ្នំា ១៩៨៣ និង ១៩៨៥ ពោលចំពេលដែលលោក Laurent Fabius ធ្វើជានាយករដ្ឋមន្រ្តីបារំាង។ តែលោកត្រូវបានតុលាការបារំាងកាត់ទោសឲ្យរួចខ្លួនក្នុងឆ្នំា ១៩៩៩។
លោកហូឡង់៖ទស្សនកិច្ចរបស់លោក Fabius នៅអ៊ីរ៉ង់ជាតេស្តសម្រាប់ទំនាក់ទំនងបារំាង-អ៊ីរ៉ង់
តំាងពីមានកិច្ចព្រមព្រៀងជាប្រវត្តិសាស្រ្តស្តីពីកម្មវិធីនុយក្លេអ៊ែរអ៊ីរ៉ង់មក មានថ្នាក់ដឹកនំាលោកខាងលិចជាច្រើនបានបន្តកន្ទុយគ្នាទៅដណ្តើមទីផ្សារនៅអ៊ីរ៉ង់។ ចំពោះបារំាង តើគេនិយាយបានទេថា ជារឿងពិបាក ព្រោះកំហុសធ្ងន់ធ្ងរជាងគេ និងដែលបារំាងពិបាកលុបលាងខ្លួននោះ គឺជំហររបស់ទីក្រុងប៉ារីសនៅក្នុងកិច្ចចរចារឿងនុយក្លេអ៊ែរអ៊ីរ៉ង់នារយៈពេលជាង ១០ឆ្នំាកន្លងទៅ ពិសេសជំហររបស់បារំាងដែលទៅគំាទ្រប្រទេសអ៊ីស្រាអែល និងអារ៉ាប៊ីសាអូឌីតដែលជាសត្រូវស៊ូពូជរបស់អ៊ីរ៉ង់។ សូម្បីតែអាមេរិកដែលជាសម្ព័ន្ធមិត្តចាក់ទឹកមិនលេចរបស់អ៊ីស្រាអែល និងអារ៉ាប៊ីសាអូឌីតក៏មានជំហរមិនតឹងតែងខ្លំាងជ្រុលដូចបារំាងដែរ។ ដូច្នេះបើអ៊ីរ៉ង់មានអកប្បកិរិយាមិនរាក់ទាក់ ឬមួយក៏ធ្វើព្រងើយកន្តើយចំពោះបារំាងពេលនេះ គឺជារឿងមួយធម្មតា។
គួរជម្រាបជូនថា តំាងពីមានកិច្ចព្រមព្រៀងជាប្រវត្តិសាស្រ្តស្តីពីកម្មវិធីនុយក្លេអ៊ែរអ៊ីរ៉ង់មក មានថ្នាក់ដឹកនំាលោកខាងលិចជាច្រើនបានបន្តកន្ទុយគ្នាទៅអ៊ីរ៉ង់ដើម្បីចែចូវស្វែងរកទីផ្សារនៅក្នុងប្រទេសមួយដែលមានប្រជាជន៨០លាននាក់ និងដែលកំពុងមានសក្តានុពលសេដ្ឋកិច្ចធំធេងមិនអាចមើលរំលងបានឡើយ។ សម្រាប់ប្រទេសបារំាងវិញ គេត្រូវរកចំាមើលថា តើដំណើរទស្សនកិច្ចរបស់ប្រមុខការទូត Laurent Fabius នឹងត្រូវអ៊ីរ៉ង់ទទួលយ៉ាងម៉េច។
នៅថ្ងៃអង្គារ ទី២៨ កក្កដានេះ លោកប្រធានាធិបតីបារំាងហ្រ្វង់ស័រ ហូឡង់បានព្រមានទុកជាមុនរួចជាស្រេចថា ឥរិយាបថរបស់អ៊ីរ៉ង់ចំពោះលោក Fabius គឺជាតេស្តដ៏សំខាន់មួយសម្រាប់ទំនាក់ទំនងអ៊ីរ៉ង់ និងបារាំង។ គួរជម្រាបជូនថា នៅពេលអ៊ីរ៉ង់ជាប់ទ័ណ្ឌកម្មសេដ្ឋកិច្ចអន្តរជាតិ ការដោះដូរពាណិជ្ជកម្មរវាងបារំាង និងអ៊ីរ៉ង់មានទឹកប្រាក់តែ ៥០០អឺរ៉ូប៉ុណ្ណោះក្នុងឆ្នំា ២០១៣ ពោលតិចជាងដល់ទៅ ៨ដងបើធៀបនឹងឆ្នំា ២០០៤។ ដូច្នេះវាជាពេលវេលាមួយដែលបារំាងត្រូវរៀបចំឥរិយាបទថ្មីដើម្បីអាចដណ្តើមទីផ្សារនៅអ៊ីរ៉ង់ដែលជាសក្តានុពលសេដ្ឋកិច្ចធំណាស់សម្រាប់ក្រុមហ៊ុនបារំាង ពិសេសក្រុមហ៊ុនផលិតរថយន្ត និងក្រុមហ៊ុនប្រេងឥន្ធនៈ ដូចយ៉ាង Total ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ