ជំនួបកំពូលចតុភាគី៖បុគ្គលអាសាដបន្តជាឧបសគ្គក្នុងការស្វែងរកដំណោះស្រាយឲ្យវិបត្តិស៊ីរី
នៅថ្ងៃសុក្រ ទី២៣ តុលានេះ ជំនួបកំពូលចុតភាគីចូលរួមដោយប្រទេសរុស្ស៊ី អាមេរិក អារ៉ាប៊ីសាអូឌីត និងប្រទេសតួកគីបានរៀបចំធ្វើនៅក្នុងទីក្រុងវីយែន ប្រទេសអូទ្រីស។ ជំនួបកំពូលបានចូលរួមដោយថ្នាក់រដ្ឋមន្រ្តីការបរទេស និងមានគោលដៅស្វែងរកដំណោះស្រាយឲ្យវិបត្តិស៊ីរីដែលបានផ្ទុះដំបូងក្នុងខែមីនា ឆ្នំា ២០១១ និងដែលបានបន្តអូសបន្លាយមកដល់សព្វថ្ងៃ។ ម្យ៉ាងទៀត ជំនួបកំពូលចតុភាគីថ្ងៃនេះបានធ្វើឡើង ចំពេលដែលអាមេរិក និងកម្លំាងសម្ព័ន្ធមិត្តបានបើកការវាយប្រហារផ្លូវអាកាសលើក្រុមជីហាតអង្គការរដ្ឋអ៊ីស្លាមក្នុងទឹកដីស៊ីរី និងចំពេលដែលទ័ពរុស្ស៊ីក៏កំពុងអន្តរាគមន៍ផ្លូវអាកាសដាច់ដោយឡែកលើពួកអ៊ីស្លាមជ្រុលនិយមនៅស៊ីរីដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣៨
តំាងពីវិបត្តិស៊ីរីបានចាប់ផ្តើមផ្ទុះក្នុងខែមីនា ឆ្នំា ២០១១ ដែលបានបណ្តាលឲ្យស្លាប់មនុស្សជាង ២៥ម៉ឺននាក់មក នេះជាលើកទី១ ដែលមានជំនួបកំពូលការទូតចតុភាគីមួយត្រូវបានរៀបចំឡើង។ របៀបវារៈនៃកិច្ចប្រជុំការទូតត្រូវបានរៀបចំជាពីរដំណាក់កាលធំៗចំនួនពីរ ទី១ ជាកិច្ចប្រជុំចតុភាគីចូលរួមដោយរុស្ស៊ី អាមេរិក អារ៉ាប៊ីសាអូឌីត និងប្រទេសតួកគី និងទី២ ជាកិច្ចប្រជុំត្រីភាគីចូលរួមដោយអាមេរិក អារ៉ាប៊ីសាអូឌីត និងតួកគី។ បន្ទាប់មកជាកិច្ចសន្ទនាទ្វេភាគី ពិសេសរវាងលោករដ្ឋមន្រ្តីការបរទេសអាមេរិកចន ឃ៊ែរី និងសមភាគីរុស្ស៊ីសែរហ្កី ឡាវឺរ៉ូស។
នៅក្នុងដំណើរស្វែងរកដំណោះស្រាយឲ្យវិបត្តិស៊ីរី ភាគីនីមួយៗបានទទួលស្គាល់រៀងៗខ្លួននាពេលនេះថា គេពិតជាមិនអាចទុកបណ្តោយឲ្យវិបត្តិស៊ីរីបន្តអូសបន្លាយទៅមុខទៀតបានទេ និងថា ដំណោះស្រាយឲ្យវិបត្តិស៊ីរីនឹងដោះស្រាយតាមផ្លូវនយោបាយ ពោលតាមកិច្ចចរចាដោយមានការចូលរួមពីគ្រប់ភាគីជម្លោះទំាងអស់។
អង្គការរដ្ឋអ៊ីស្លាមជាសត្រូវគ្រោះថ្នាក់ខ្លំាងសម្រាប់ពិភពលោក
តំាងពីវិបត្តិស៊ីរីបានផ្ទុះឡើងដោយចម្លងតាមបដិវត្តអារ៉ាប់ភ្លាម សហគមន៍អន្តរជាតិចង់ជួយកម្លំាងបះបោរដើម្បីរំលំរបបរបស់លោកប្រធានាធិបតីស៊ីរីអាសាដ។ អាមេរិក និងបារំាងធ្លាប់បានគិតគូរពីការវាយប្រហារស៊ីរីតាមផ្លូវអាកាស តែទីបំផុត លោកប្រធានាធិបតីអូបាម៉ាក៏បានបោះចោលគម្រោងនោះទៅវិញ។ មួយវិញទៀត ប្រទេសរុស្ស៊ីដែលជាសម្ព័ន្ធមិត្តចាក់ទឹកមិនលេច និងជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិតែងតែចេញមុខការពារលោកអាសាដគ្រប់កាលៈទេសៈទំាងអស់។
គឺទើបតែលេចវត្តមានអង្គការរដ្ឋអ៊ីស្លាមនៅក្នុងប្រទេសអ៊ីរ៉ាក់ និងស៊ីរីទេដែលបានធ្វើឲ្យសហគមន៍អន្តរជាតិយល់ឃើញថា អង្គការរដ្ឋអ៊ីស្លាមជាអង្គការភេរវនិយមដ៏គ្រោះថ្នាក់ខ្លំាងសម្រាប់ពិភពលោក និងដែលត្រូវកំចាត់មុនគេ។ សូម្បីតែកម្លំាងរបស់លោកអាសាដក៏បានប្រឈមមុខនឹងពួកជីហាតអង្គការរដ្ឋអ៊ីស្លាមដែរ។ គឺនៅក្នុងន័យនេះហើយបានជាអាមេរិក និងកម្លំាងសម្ព័ន្ធមិត្តបានបើកប្រតិបត្តិការផ្លូវអាកាសកំចាត់ពួកជីហាតអង្គការរដ្ឋអ៊ីស្លាមនៅអ៊ីរ៉ាក់ និងនៅស៊ីរី។ ចំណែករុស្ស៊ីក៏ទើបបានចូលខ្លួនវាយប្រហារផ្លូវអាកាសនៅស៊ីរីនាពេលថ្មីៗនេះដែរ។
តែសហគមន៍អន្តរជាតិកំពុងសង្ស័យលើប្រតិបត្តិការយោធារបស់រុស្ស៊ីថា តើជាការវាយប្រហារលើពួកជីហាតអង្គការរដ្ឋអ៊ីស្លាម ឬមួយក៏ជាប្រតិបត្តិការវ៉ៃក្រុមបះបោរដើម្បីជួយការពារលោកអាសាដ។ ដូច្នេះ គឺស្ថានការណ៍វិវត្តន៍ចុងក្រោយនេះហើយដែលបានធ្វើឲ្យមានជំនួបកំពូលចតុភាគីស្តីពីវិបត្តិស៊ីរីពេលនេះ។
បង្កើតចេញនូវរដ្ឋាភិបាលអន្តរកាល
ដំណោះស្រាយនយោបាយឲ្យវិបត្តិស៊ីរីអាចចេញតាមផ្លូវចរចាដោយមានការចូលរួមពីគ្រប់ភាគីជម្លោះទំាងអស់ មានន័យថា មិនត្រូវទាត់ចោលភាគីណាមួយទេ។ អ្វីដែលសហគមន៍អន្តរជាតិចង់បានពេលនេះ គឺបង្កើតរដ្ឋាភិបាលអន្តរកាលមួយ។ គំនិតនៃការបង្កើតឲ្យមានរដ្ឋាភិបាលអន្តរកាលធ្លាប់បានលើកឡើងជាច្រើនដង តែបញ្ហាដែលកំពុងបន្តចោទ និងដែលនៅមិនទាន់និយាយចុះសម្រុងគ្នានោះ គឺទាក់ទងនឹងបុគ្គលប្រធានាធិបតីស៊ីរីអាសាដ។
ក្នុងចំណោមប្រទេស ៤ នៅក្នុងជំនួបកំពូលថ្ងៃនេះ មាន ៣ប្រទេស គឺអាមេរិក អារ៉ាប៊ីសាអូឌីត និងប្រទេសតួកគីបានបញ្ជាក់ជាច្រើនដងថា គេត្រូវតែដកលោកអាសាដចេញពីឆាកនយោបាយស៊ីរី មានន័យថា របបរបស់លោកអាសាដជាតួអង្គមួយនៅក្នុងរដ្ឋាភិបាលអន្តរកាល តែមិនត្រូវមានបុគ្គលអាសាដទេ។ ចំណែកប្រទេសរុស្ស៊ីបានយល់ផ្ទុយទៅវិញថា បុគ្គលអាសាដនៅតែជាតួអង្គឯកមិនអាចខ្វះបាននៅក្នុងដំណោះស្រាយឲ្យវិបត្តិស៊ីរី។ ជំហររបៀបនេះរបស់ក្រុងមូស្គូក៏ត្រូវបានសម្តែងចេញក្នុងពេលដែលលោកប្រធានាធិបតីរុស្ស៊ីពូទីនបានទទួលលោកអាសាដនៅវិមានក្រិមឡាំងកាលពីថ្ងៃអង្គារ ទី២០ តុលា។
ទន្ទឹមគ្នានេះនាថ្ងៃព្រហស្បតិ៍ ទី២២ តុលា លោកពូទីនថែមទំាងបានថ្លែងបរិហារបស្ចិមលោកពីការលេងបៀរ ៤សន្លឹកនៅក្នុងយុទ្ធនាការប្រយុទ្ធប្រឆំាងនឹងភេរវនិយម។ លោកពូទីនថ្លែងថា នៅម្ខាង បស្ចិមលោកបានតំាងខ្លួនជាអ្នកប្រឆំាងនឹងពួកភេរវជន និងនៅម្ខាងទៀត ពួកគេបែរជាបានគាំទ្រ និងប្រើប្រាស់ពួកភេរវជនមួយភាគដើម្បីប្រយោជន៍របស់ខ្លួននៅក្នុងតំបន់ដើមបូព៌ាទៅវិញ។
តើបុគ្គលអាសាដនៅតែជាមនុស្សដែលត្រូវជម្រុះចេញពីឆាកនយោបាយស៊ីរី?
តំាងពីដំបូងម្ល៉េះ បស្ចិមលោកបានបញ្ជាក់ថា ទោះបីជាវិបត្តិស៊ីរីត្រូវដោះស្រាយតាមផ្លូវណាក៏ដោយ គឺមិនត្រូវមានបុគ្គលអាសាដជាដាច់ខាត។ អ្នកដែលមានជំហរដាច់ណាត់របៀបនេះជាងគេ គឺអាមេរិក អារ៉ាប៊ីសាអូឌីត និងប្រទេសតួកគី។ តែគេសម្គាល់ឃើញថា ជំហររបៀបនេះហាក់ដូចជាបានប្រែប្រួលបន្តិចនៅប៉ុន្មានខែចុងក្រោយនេះ។ អាមេរិកទើបបានបានលើកឡើងថា អ្វីៗអាចចរចាបាន។ នៅក្នុងដំណើរទស្សនកិច្ចក្នុងប្រទេសអាល្លឺម៉ង់នាថ្ងៃម្សិលមិញ លោកប្រមុខការទូតអាមេរិកចន ឃ៊ែរីមិនបានទាមទារដាច់អហង្ការឲ្យលោកអាសាដត្រូវតែចាកចេញពីឆាកនយោបាយស៊ីរីទេ។
ប្រទេសអារ៉ាប៊ីសាអូឌីតដែលជាសត្រូវនឹងស៊ីរីត្រូវបានរដ្ឋមន្រ្តីអារ៉ាប៊ីសាអូឌីតម្នាក់បង្ហើបឲ្យដឹងនៅដើមសប្តាហ៍ថា លោកអាសាដអាចនឹងស្ថិតក្នុងឆាកនយោបាយក្នុងពេលបង្កើតរដ្ឋាភិបាលអន្តរកាល។ ចំណែកនៅខាងប្រទេសតួកគីដែលជាសត្រូវមួយទៀតរបស់ស៊ីរីក៏បានបញ្ជាក់នាពេលថ្មីៗនេះថា គេអាចបង្កើតរដ្ឋាភិបាលអន្តរកាលមួយនៅស៊ីរីជាមួយនឹងវត្តមានលោកអាសាដ។ នេះជាលើកទី១ ដែលប្រទេសតួកគីបានប្រកាសឲ្យដឹងពីជំហររបៀបនេះ។
ដូច្នេះឃើញថា ជំនួបកំពូលចុតភាគីថ្ងៃនេះអាចនឹងជាសញ្ញាវិជ្ជមានក្នុងការបិទបញ្ចប់វិបត្តិស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ