សហភាពអឺរ៉ុបព្យាយាមទប់ស្កាត់លំហូរជនអន្តោប្រវេសន៍នៅឯប្រភពដើម
ចប់ហើយជំនួបកំពូលរវាងអឺរ៉ុប និងអាហ្រ្វិកស្តីពីបញ្ហាជនអន្តោប្រវេសន៍រយៈពេល ២ថ្ងៃនៅក្នុងទីក្រុងវ៉ាឡែត ប្រទេសម៉ាល់ត៍។ គោលដៅនៃជំនួប គឺទប់ស្កាត់លំហូរជនអន្តោប្រវេសន៍ទៅក្នុងទ្វីបអឺរ៉ុប។ បន្ទាប់ពីបានចរចាគ្នាយ៉ាងតានតឹងអស់រយៈពេលជាង ២៤ម៉ោង កិច្ចព្រមព្រៀងមួយត្រូវបានចុះហត្ថលេខារវាងភាគីទំាងពីរ។ នៅក្នុងកិច្ចព្រមព្រៀងនោះ ភាគីនីមួយៗបានយល់ព្រមធ្វើសម្បទានឲ្យគ្នាទៅវិញ ទៅមកដើម្បីធ្វើយ៉ាងណា រារំាងកុំឲ្យពលរដ្ឋអាហ្រ្វិកធ្វើចំណាកស្រុក។ បន្ទាប់ពីបើកជំនួបកំពូលជាមួយអាហ្រ្វិក អឺរ៉ុបមានគម្រោងនឹងបើកជំនួបកំពូលជាមួយប្រទេសតួកគីនៅថ្ងៃខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២៨
គឺនៅពីមុខក្រុមអ្នកកាសែតដែលលោកប្រធានក្រុមប្រឹក្សាអឺរ៉ុបដូណាល់ ទូស និងលោកប្រធានសហភាពសេដ្ឋកិច្ចនៃរដ្ឋអាហ្រ្វិកម៉ាកគី សាលបានលំអិតត្រួសៗលើកិច្ចព្រមព្រៀងដែលអឺរ៉ុប និងអាហ្រ្វិកបានចុះហត្ថលេខារួមគ្នា។ នៅក្នុងកិច្ចព្រមព្រៀងនោះ អឺរ៉ុបបានសម្រេចបង្កើតឲ្យមានមូលនិធិជំនួយក្នុងទឹកប្រាក់ ១ ៨០០លានអឺរ៉ុបសម្រាប់ជួយគំាទ្រសេដ្ឋកិច្ច និងការគ្រប់គ្រងជនភៀសខ្លួននៅក្នុងទ្វីបអាហ្រ្វិក។ ទន្ទឹមគ្នានោះ ថ្នាក់ដឹកនំាអឺរ៉ុប និងអាហ្រ្វិកក៏បានចុះហត្ថលេខាលើសេចក្តីថ្លែងការណ៍នយោបាយរួមគ្នា និងលើផែនការសកម្មមួយចំនួនសម្រាប់ឆ្នំាខាងមុខៗ។ ឧទាហរណ៍ជាក់ស្តែង អឺរ៉ុបបានសន្យាបង្កើនទ្វេដងចំនួនទិដ្ឋាការ និងអាហាររូបករណ៍សម្រាប់និស្សិត និងអ្នកស្រាវជ្រាវជនជាតិអាហ្រ្វិក។
ជាថ្នូរនឹងសម្បទានរបស់អឺរ៉ុប អាហ្រ្វិកបានសន្យាទប់ស្កាត់ការធ្វើចំណាកស្រុករបស់ពលរដ្ឋខ្លួនទៅកាន់ទ្វីបអឺរ៉ុប។ អឺរ៉ុបបានយល់ច្បាស់ណាស់ថា ដើម្បីអាចទប់ស្កាត់លំហូរជនភៀសខ្លួន និងលំហូរជនអន្តោប្រវេសន៍ក្នុងទ្វីបអឺរ៉ុបបាន គេត្រូវតែទប់ស្កាត់នៅឯប្រភពដើមរបស់វា។ យ៉ាងណាក៏ដោយ នៅមានសំណូមពរផ្សេងៗទៀតរបស់អឺរ៉ុបដែលអាហ្រ្វិកកំពុងពិចារណា ដូចយ៉ាងអឺរ៉ុបបានស្នើឲ្យប្រទេសអាហ្រ្វិកទទួលយកវិញនូវពលរដ្ឋខ្លួនណាដែលគ្មានសិទ្ធិរស់នៅក្នុងទឹកដីអឺរ៉ុប។ សំណុំរឿងដ៏រសើបមួយនេះមានជាប់ពាក់ព័ន្ធតែ ១០ប្រទេសអាហ្រ្វិកប៉ុណ្ណោះ។
តែដោយនៅមិនទាន់ឯកភាពគ្នាជាធ្លុងមួយ អឺរ៉ុប និងអាហ្រ្វិកបានត្រឹមតែព្រមគ្នាជាគោលការណ៍ដោយយល់ព្រមបញ្ជូនមន្រ្តីអន្តោប្រវេសន៍អាហ្រ្វិកទៅកាន់ទ្វីបអឺរ៉ុបដើម្បីកំណត់ពីសញ្ជាតិរបស់ជនអន្តោប្ររវេសន៍អាហ្រ្វិកណាដែលកំពុងរស់នៅក្នុងទ្វីបអឺរ៉ុបដោយខុសច្បាប់។ សម្រាប់លោកប្រធានសហភាពសេដ្ឋកិច្ចនៃរដ្ឋអាហ្រ្វិកម៉ាកគី សាល អឺរ៉ុបបានធ្វើសំណូមពរច្រើនជ្រុល និងថា អឺរ៉ុប និងរដ្ឋអាហ្រ្វិកធ្លាប់បានលើកយកសំណុំរឿងនេះទៅនិយាយម្តងហើយ ព្រមទំាងមានកិច្ចព្រមព្រៀងជាមួយគ្នាទៀតផង។
អាហ្រ្វិក៖អឺរ៉ុបបានធ្វើសំណើច្រើនជ្រុល
ទំាងភាគីអឺរ៉ុប និងអាហ្រ្វិក គឺគ្មាននរណាម្នាក់បានប្រើពាក្យបរាជ័យ ហើយក៏មិនបាននិយាយពីជោគជ័យដែរ។ អឺរ៉ុបបានយល់ឃើញថា ខ្លួនបានធ្វើអ្វីៗគ្រប់យ៉ាងអស់ហើយ តែអាហ្រ្វិកបានយល់ផ្ទុយទៅវិញថា នៅមិនទាន់គ្រប់គ្រាន់នៅឡើយទេ និងថា អឺរ៉ុបបានធ្វើសំណើច្រើនជ្រុល និងមានសំណើខ្លះពិបាកនឹងទទួលយកថែមទៀត ដូចយ៉ាងឲ្យអាហ្រ្វិកទទួលយកវិញនូវពលរដ្ឋខ្លួនដែលគ្មានសិទ្ធិរស់នៅក្នុងប្រទេសអឺរ៉ុបជាដើម។ ជាទូទៅ គឺភាគីអាហ្រ្វិកដែលមិនសូវពេញចិត្ត ពេញថ្លើមនឹងជំនួបកំពូលជាមួយអឺរ៉ុបពេលនេះ។
យ៉ាងណាក៏ដោយ លោកប្រធានាធិបតីសេណេហ្កាល់បានគូសបញ្ជាក់ពីសារៈសំខាន់នៃកិច្ចសន្ទនាជាមួយអឺរ៉ុបពេលនេះ ពិសេសសារៈសំខាន់នៃការបន្តកិច្ចសន្ទនារវាងអឺរ៉ុប និងអាហ្រ្វិកនៅពេលខាងមុខជាបន្តទៀត។ ចំណាប់អារម្មណ៍ដូចគ្នានេះក៏មានពីលោកអគ្គនាយកអង្គការអន្តោប្រវេសន៍អន្តរជាតិ William Swing ដែរ។ លោក William បានថ្លែងថា ការដែលមានជំនួបកំពូលអឺរ៉ុប អាហ្រ្វិកពេលនេះ គឺជាដំណឹងល្អមួយស្រេចទៅហើយ និងថា នេះជាលើកទី១ ដែលអឺរ៉ុប និងអាហ្រ្វិកបានអង្គុយជជែកទល់មុខគ្នាដើម្បីនិយាយពីបញ្ហាជនអន្តោប្រវេសន៍។
អឺរ៉ុបបែរក្បាលរកតួកគីដើម្បីបន្តនិយាយពីបញ្ហាជនអន្តោប្រវេសន៍
ក្រៅពីជំនួបកំពូលជាមួយអាហ្រ្វិក អឺរ៉ុបត្រៀមបើកជំនួបកំពូលជាមួយប្រទេសតួកគីនៅថ្ងៃខាងមុខដើម្បីនិយាយពីបញ្ហាជនអន្តោប្រវេសន៍ដូចគ្នា។ នេះមកពីតួកគី ជាតួអង្គសំខាន់នៅក្នុងការគ្រប់គ្រងជនអន្តោប្រវេសន៍ដែលកំពុងស្ថិតក្នុងដែនដីអឺរ៉ុបសព្វថ្ងៃ។ នៅក្នុងជំនួបកំពូលអឺរ៉ុបក្នុងទីក្រុងព្រុចសែល ប្រទេសបែលហ្ស៊ិកកាលពីពាក់កណ្តាលខែតុលាកន្លងទៅ សមាជិកអឺរ៉ុបទំាង ២៨ប្រទេសបានសន្យាផ្តល់លុយឲ្យប្រទេសតួកគីចំនួន ៣ ០០០លានអឺរ៉ូសម្រាប់រយៈពេល ២ឆ្នំា។ ជាថ្នូរត្រឡប់វិញ រដ្ឋាភិបាលតួកគីត្រូវតែរៀបចំទទួលឲ្យបានត្រឹមត្រូវនូវចំនួនជនភៀសខ្លួន ២លាន ២សែនដែលកំពុងមានវត្តមានក្នុងទឹកដីខ្លួន ភាគច្រើនជាជនជាតិស៊ីរី។ ទន្ទឹមគ្នានេះ តួកគីក៏ត្រូវទទួលយកបន្ថែមទៀតនូវជនអន្តោប្រវេសន៍ណាដែលអឺរ៉ុបមិនអាចទទួលយកបាន។
រហូតមកដល់ពេលនេះ ក្នុងចំនួនជនអន្តោប្រវេសន៍ទំាង ១៦០ ០០០ម៉ឺននាក់ដែលប្រទេសអឺរ៉ុបនីមួយៗត្រូវចែកគ្នាទទួលយក គឺមានមិនដល់ ១៥០នាក់ផងដែលបានបញ្ជូនពីប្រទេសអ៊ីតាលី និងក្រិកទៅកាន់ប្រទេសសមាជិកអឺរ៉ុបផ្សេងទៀត។ លោកប្រធានគណៈកម្មការអឺរ៉ុប Jean-Claude Juncker បានទាញសញ្ញាអាសន្នថា បើការយឺតយ៉ាវនៅតែបន្តមានយ៉ាងដូច្នេះ នោះប្រតិបត្តិការនៃការបញ្ជូនជនអន្តោប្រវេសន៍ទំាង ១៦០ ០០០នាក់នឹងត្រូវចប់សព្វគ្រប់នៅឆ្នំា ២១០១។ ទាក់ទងនឹងកិច្ចព្រមព្រៀងជាមួយតួកគីត្រូវបានលោកប្រធានាធិបតីបារំាងហ្រ្វង់ស័រ ហូឡង់យល់ឃើញថា ហាក់ដូចជាមិនសូវមានដំណើរការទៅមុខសោះ។
ដូច្នេះជំនួបកំពូលអឺរ៉ុប និងតួកគីនៅថ្ងៃខាងមុខ គឺជាឱកាសមួយដែលអឺរ៉ុប និងតួកគីត្រូវលើកយកកិច្ចព្រមព្រៀងនោះទៅពិនិត្យមើលឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ