ក្រុងគៀវព្រមានអំពីការបង្កប់មីនខ្ទប់ដែនដីក្រោមការត្រួតត្រារបស់ពួកឧទ្ទាម
អាជ្ញាធរអ៊ុយក្រែនព្រមានថាផ្លូវណាដែលឃ្វាងពីច្រកចេញចូលជាផ្លូវការសម្រាប់ ធ្វើដំណើរចូលដែនដីនៃរបស់ដែលហៅថា សាធារណរដ្ឋស្វ័យប្រកាស ដូណេតនិងលូហ្កាន់គឺអាចបង្កប់ទៅដោយមីន។ ហើយពីទីនោះ ដើម្បីចូលមកក្នុងដែនដីក្រោមអំណាច ក្រុងគៀវ និងវិលត្រឡប់ទៅវិញគឺមានតែច្រកចេញចូល ៧កន្លែងប៉ុណ្ណោះ ដោយព្រមជាមួយនេះ ទាំងចរាចរណ៍តាមឡាន Bus ក៏ឈប់ប្រព្រឹត្តទៅដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ដោយប្រកាសនារសៀលថ្ងៃទី៧មករា អំពីបទព្រមាននេះ ក្រុមប្រឹក្សាសន្តិសុខជាតិនិងការពារប្រទេសអ៊ុយក្រែន ហៅកាត់ថា SNBO បានរាយឈ្មោះប៉ុស្តត្រួតពិនិត្យការចេញចូល ៧ កន្លែងដែលភ្ជាប់ម្ខាងគឺទីប្រជុំជននានា នៅលើដែនដីខេត្តដូណេតនិងលូហ្កាន់ ដែលនៅក្រោម អំណាចក្រុងគៀវ និងម្ខាងទៀត គឺទីប្រជុំជននៅលើដែនដីខេត្តទាំងពីរនេះដែរ ប៉ុន្តែក្រោមការ ត្រួតត្រាពួកឧទ្ទាមផ្តាច់ទឹកដីអ៊ុយក្រែន ដែលរុស្ស៊ីនិយម។
តាមការពន្យល់បំភ្លឺនៃអ្នកនាំពាក្យផ្លូវការរបស់ស្ថាប័នសន្តិសុខនេះគឺលោក Andrei Lyssenko សម្រាប់ធ្វើដំណើរឆ្លងកាត់ប៉ុស្តកុងត្រូលទាំង៧កន្លែងនេះ បុគ្គលម្នាក់ៗ ចាំបាច់ត្រូវតែមាន ជាប់នឹងខ្លួនគឺ អត្តសញ្ញាណប័ណ្ណសម្គាល់ខ្លួន។
ចំណែកប្រធាននៃស្ថាប័ន SNBO លោក Alexandre Turchinov បានប្រកាសអំពីការរឹតត្បិត ចរាចរណ៍នៃមនុស្ស និងទំនិញឆ្លងកាត់តាមខ្សែសមរភូមិ នៅតំបន់បះបោរនោះ ខាងកើត អ៊ុយក្រែន ហៅថា Donbass ដោយព្រមានថា ក្នុងករណីបើក្នុងរង្វង់ ៣០គ.ម. ពីច្រកចេញចូល ទាំង ៧កន្លែង ស្រាប់តែមានលាន់ឭជាការបាញ់ផ្លោងនោះ ច្រកទាំងនេះនឹងត្រូវបិទខ្ទប់ភ្លាម។
តបនឹងនឹងការព្រមានខាងលើរបស់ក្រុងគៀវ ប្រធាននៃ សភា សាធារណរដ្ឋស្វ័យប្រកាស ដូណេត លោក Andrei Pouguine បានប្រតិកម្មថា សេចក្តីថ្លែងការណ៍របស់លោក Turchinov គឺ ផ្ទុយនឹងកិច្ចព្រមព្រៀងដែលមានសម្រេចបានពីមុននិងជាការប៉ុនប៉ងដាក់គំនាបមកលើ ភាគីបះបោរ មុនពេលចាប់ផ្តើមកិច្ចចរចាលើកបន្តបន្ទាប់។
គួរនិយាយថា ក្រុងគៀវ ចាប់បំពេញទៅហើយផែនការខ្លួនខាងបន្ថប់ដង្ហើមដែនដីបះបោរ។ តាំងពីថ្ងៃទី៦មករាមក អធិការកិច្ចរដ្ឋអ៊ុយក្រែន ខាងសន្តិសុខដឹកជញ្ជូនតាមផ្លូវគោកលើដី បានប្រកាសផ្តាច់ចរាចរណ៍រថយន្ត Bus ជាមួយ សាធារណរដ្ឋស្វ័យប្រកាស ដូណេតនិង លូហ្កាន់ ក្រោមលេសថា វិធានការធានាសន្តិសុខជាតិអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ