សេដ្ឋីរុស្ស៊ីដែលធ្វើបត្យាប័នពីកម្ពុជាបានទៅដល់រុស្ស៊ីហើយត្រូវអាជ្ញាធរចាប់ឃុំខ្លួន
គ្រាន់តែចេញពីយន្តហោះនៃក្រុមហ៊ុនអាកាសចរណ៍ Vietnam Airlines ដែលបានចុះចតនៅអាកាសយានដ្ឋាន Domodiedovo ក្រុងម៉ូស្គូនៅម៉ោង១៩ ថ្ងៃ១៧ ឧសភាភ្លាម ពាណិជ្ជកររុស្ស៊ីស៊ែរហ្គៃ ប៉ូឡូនស្គី ស្វែងរកចាប់ខ្លួនដោយអាជ្ញាធររុស្ស៊ីជិត២ឆ្នាំមកហើយត្រូវបានដឹកតាមឡានទ្រុងរបស់ប៉ូលិសទៅឃុំទុកក្នុងមន្ទីរស៊ើបអង្កេតនៃពន្ធនាគាររដ្ឋធានីរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
តាមសម្តីអ្នកនាំពាក្យផ្លូវការនៃក្រសួងមហាផ្ទៃរុស្ស៊ី លោកស្រី Elena Alexeieva ធុរជនរុស្ស៊ីស៊ែរហ្គៃ ប៉ូឡូនស្គីត្រូវបានធ្វើបត្យាប័នពីកម្ពុជាមករុស្ស៊ី គឺដើម្បីឲ្យគាត់ទទួលខុសត្រូវនៅចំពោះមុខច្បាប់រុស្ស៊ីតែម្តង។ ចំណែកអ្នកនាំពាក្យនៃតុលាការក្រុងម៉ូស្គូលោកស្រី Anna Fadeyeva បានឲ្យដឹងថារូបប៉ូឡូនស្គីត្រូវបានតុលាការសម្រេចឃុំខ្លួនរយៈពេល២ខែសិន គឺតាំងពីគាត់មិនទាន់មកដល់រុស្ស៊ីម៉្លេះ។ ថ្ងៃ១៨ ឧសភានេះ ស្ថាប័នស៊ើបអង្កេតរុស្ស៊ី SKR បើកការស៊ើបអង្កេតគ្រប់ជ្រុងជ្រោយលើសំណុំរឿងលោកប៉ូឡូនស្គី ដែលជាប់ក្នុងក្តីសង្ស័យថា បានប្រព្រឹត្តបទឆបោក កឹបយកធនធានក្នុងទឹកប្រាក់ប្រមាណ ១៥០លានដុល្លារ អង្គាសបានពីប្រជាពលរដ្ឋរុស្ស៊ីរងគ្រោះជាង ៨០នាក់ដើម្បីឲ្យក្រុមហ៊ុនគាត់ Mirax Group សង់ឡើងជាអគារលំនៅដ៏ស្កឹមស្កៃក្នុងសង្កាត់មួយនៃក្រុងម៉ូស្គូសម្រាប់ពួកគេ ប៉ុន្តែដោយមកពីវិបត្តិហិរញ្ញវត្ថុឆ្នាំ២០០៨ អគារនេះស្ថិតនៅអេ សង់មិនទាន់ហើយឯណា។
មេធាវីគាត់ លោក Alexandre Karabanov បានថ្លែងព្រឹកមិញទៅពួកអ្នកកាសែតថា កូនក្តីគាត់ធុរជនប៉ូឡូនស្គី ប្រកែកមិនចុះកិច្ចព្រមព្រៀងជាមួយស្ថាប័នស៊ើបអង្កេតរុស្ស៊ី SKR ដើម្បីឲ្យគាត់ជាប់ក្នុងការឃុំឃាំងតែ១ខែប៉ុណ្ណោះ រួចបន្ទាប់មក គឺក្នុងលក្ខណៈមានសេរីភាពទៅហើយ គាត់ត្រូវខិតខំរកលទ្ធភាពសង់អគារលំនៅនោះឲ្យហើយជាក់ស្តែងមែន រួចមិនគ្រាន់តែនិយាយដោយសម្តីប្រហោងក្នុងប៉ុណ្ណោះទេ តែគឺត្រូវសងការបង់ខាតឲ្យបានទាំងស្រុងទៅប្រជាពលរដ្ឋដែលរងគ្រោះ ដើម្បីឲ្យសំណុំរឿងគាត់ឆ្លងចេញពីក្រមព្រហ្មទណ្ឌទៅក្រមរដ្ឋប្បវេណីវិញ គ្រាន់នឹងរក្សាទុកកន្លែងរបស់គាត់ក្នុងមជ្ឈដ្ឋានធុរកិច្ច និងកេរ្តិ៍ឈ្មោះគាត់ជាសហគ្រិនសុចរិត។
ប៉ុន្តែគួរឲ្យស្តាយដែលកូនក្តីខ្ញុំមិនយល់ព្រមតាមសំណើរបស់ SKR ដូច្នេះអ្វីៗ គឺត្រូវចាប់ផ្តើមសាឡើងវិញពីដើមទីតែម្តង។ កាសែតក្រុងម៉ូស្គូ Kommersant លេខថ្ងៃ១៨ ឧសភានេះបង្ហើបឲ្យដឹងថា រូបប៉ូឡូនស្គីក៏អាចត្រូវជាប់ចោទតាមបទលាងលុយបានមកតាមផ្លូវឧក្រិដ្ឋ ដោយយោងលើអចលនទ្រព្យច្រើនសន្ធឹកដែលគាត់បានទិញក្នុងប្រទេសកម្ពុជា។ ជាសរុប គាត់អាចត្រូវកាត់ទោសឲ្យជាប់ពន្ធនាគារដល់ ១០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ