ម្តាយសិស្សចាក់សម្លាប់គ្រូស្រី នៅចំពោះមុខសិស្សសាលាច្រើននាក់នៅបារាំង
នៅក្រុងអាល់ប៊ី Albi ភាគនិរតីប្រទេសបារាំង ព្រឹកថ្ងៃសុក្រទី ៤កក្កដា ស្ត្រីគ្រូបង្រៀនអាយុ៣៤ឆ្នាំម្នាក់ ត្រូវបានស្ត្រីជាម្តាយសិស្សសាលាម្នាក់ យកកាំបិតចាក់រហូតស្លាប់ នៅពីមុខក្មេងៗសិស្សសាលាជាច្រើនរូប ក្នុងសាលាមត្តេយ្យនិងបឋមសិក្សា មួយកន្លែង។ ស្ត្រីឃាតករត្រូវបានចាប់ខ្លួនភ្លាមៗតែម្តង ក្រោយអំពើឃាតកម្ម។ ក្រុមអ្នកស៊ើបអង្កេតនឹងស៊ើបរកមូលហេតុនៃឃាតកម្មនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ប្រធានាធិបតីបារាំង លោកហ្វ្រង់ស៊័រ ហូឡង់ បានថ្កោលទោសឃាតកម្មនេះ ថាជាសោកនាដកម្មដ៏អប្រិយ។ ឃាតកម្មសម្លាប់ស្ត្រីគ្រូបង្រៀន នេះកើតឡើងនៅសាលាបឋមសិក្សាមួយកន្លែង ក្នុងក្រុងអាល់ប៊ី ភាគនិរតី ប្រទេសបារាំង កើតចំថ្ងៃចុងក្រោយនៃឆ្នាំសិក្សា ឆ្នាំ២០១៣-២០១៤ នៅបារាំង។ អ្វីដែលគួរអោយរន្ធត់ថែមទៀតនោះ គឺការចាក់សម្លាប់គ្រូបង្រៀន នៅព្រឹកថ្ងៃសុក្រនេះ ធ្វើឡើងនៅចំពោះមុខសិស្សសាលាជាច្រើនរូបតែម្តង។ អាជ្ញាធរបារាំងបានយកចិត្តទុកដាក់ ជួយផ្លូវចិត្តដល់សិស្សសាលាតូចៗ និងបុគ្គលិកបំរើការសាលា ដែលបានឃើញហេតុការណ៍ឃាតកម្មផ្ទាល់ភ្នែក។
រដ្ឋមន្ត្រីអប់រំបារាំង លោក បឺន័រ អាម៉ុង បានចុះទៅដល់កន្លែងកើតហេតុផ្ទាល់។ យោងតាមរដ្ឋមន្ត្រីអប់រំបារាំង ស្ត្រីឃាតករអាយុ៤៧ឆ្នាំដែលចាក់សម្លាប់គ្រូបង្រៀននោះ ប្រហែលជាមានបញ្ហាផ្លូវចិត្តធ្ងន់ធ្ងរ។ ក្រោយហេតុការណ៍នេះ ក្រសួងអប់រំបារាំងបានគូសបញ្ជាក់ពីភាពចាំបាច់នៃការប្រយុទ្ធប្រឆាំងអំពើហិង្សានៅសាលារៀន ភាពចាំបាច់នៃការការពារសាលារៀន គ្រូបង្រៀន និងសិស្សានុសិស្សគ្រប់រូប។ កន្លងមកនេះ ការសិក្សាស្រាវជ្រាវផ្សេងៗ បានបង្ហាញថា អំពើហិង្សាបង្កឡើងដោយឳពុកម្តាយសិស្ស ប្រឆាំងគ្រូបង្រៀន និងនាយកសាលា មានការកើនឡើងច្រើន។
យោងតាមការស៊ើបអង្កេតមួយចុះផ្សាយឆ្នាំ២០១២ អ្នកបំរើការងារសាលាជិត៣៦ភាគរយ បានប្រាប់ថា ធ្លាប់រងការជេរប្រមាថ ជាង១៧ភាគរយ ប្រាប់ថារងការគំរាមកំហែង ហើយ១៤ភាគរយ រងការធ្វើទុក្ខបុកម្នេញផ្លូវចិត្ត និង៣,៦ភាគរយទៀត រងការវាយដំរាងកាយ។ ការស្រាវជ្រាវមួយផ្សេងទៀត បានផ្តល់តួលេខថា នាយកសាលាមេតេយ្យ និងសាលាបឋមសិក្សាបារាំងជិត៥០ភាគរយ បានរងការវាយ ប្រហារដោយពាក្យសំដី និងរាងកាយ ក្នុងឆ្នាំសិក្សា២០១២-២០១៣កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ