ការបោះឆ្នោតប្រធានាធិបតីកូរ៉េខាងត្បូងនឹងត្រូវរៀបចំនៅថ្ងៃពុធទី១៩ធ្នូ២០១២
ការបោះឆ្នោតនៅថ្ងៃពុធ១៩ធ្នូស្អែក គឺដើម្បីជ្រើសរើសអ្នកបន្តស្នងពីលោកប្រធានាធិបតីកូរ៉េខាងត្បូង Lee Myung-bak ដែលពុំអាចឈរឈ្មោះជាបេក្ខជនប្រធានាធិបតីសំរាប់មួយអាណត្តទៀតបានឡើយ។ បេក្ខជនសំខាន់ពីររូបដែលនឹងត្រូវប្រកួតប្រជែងគ្នានៅថ្ងៃស្អែកនេះ មានលោកស្រី Park Geun-hye នៃបក្ស អភិរក្សនិយម Saenurនិងលោក Moon Jae-in នៃគណបក្ស ឆ្វេងនិយម PDU សំរាប់អាណត្តិប្រធានាធិបតី៥ឆ្នាំ។ ប្រសិនបើលោកស្រី Park Geun-hye ជាប់ឆ្នោតជាប្រធានាធិបតីកូរ៉េខាងត្បូងនៅថ្ងៃពុធស្អែក លោកស្រី Park នឹងក្លាយជាស្រ្តីទីមួយដឹកនាំប្រទេសកូរ៉េខាងត្បូងដែលជាប្រទេសមួយឲ្យតម្លៃខ្ពស់តែទៅលើបុរសភេទប៉ុណ្ណោះ៕
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
មានអាយុ ៦០ឆ្នាំ លោកស្រី Park Geun-hye ដែលមានបទពិសោធន៍ខ្លាំងក្នុងការងារជាអ្នកតំណាងរាស្រ្តកូរ៉េខាងត្បូងតាំងពី១៥ឆ្នាំកន្លងមកហើយនោះ ជាបេក្ខនារី នៃគណបក្សអភិរក្សនិយមកូរ៉េខាងត្បូង Saenur។ លោកស្រី Park បានថ្លែងពន្យល់ថា « ការដែលគាត់សម្រេចចិត្តចូលប្រឡូកក្នុងឆាកនយោបាយ គឺដើម្បី ជួយដល់ប្រទេសកូរ៉េខាងត្បូងក្រោយពីប្រទេសនេះ បានជួបវិបត្តិហិរញ្ញវត្ថុក្នុងឆ្នាំ ១៩៩៧-១៩៩៨"។
ក៏ប៉ុន្តែ បក្សព័ន្ធនៃគូបដិបក្សរបស់លោកស្រី ដែលជា គណបក្សឆ្វេងនិយមរបស់លោក Moon Jae-in- បានរិះគន់ថា" បេក្ខនារីនៃគណបក្សអភិរក្សនិយមនេះ ពុំសាក់សមជាអ្នកតំណាងដើម្បីការពារឲ្យស្រ្តីឡើយ នៅខណៈពេលដែលបេក្ខជនប្រធានាធិបតីទាំងពីររូបមានកំរិតប្រជាប្រិយភាពប្រកិតៗគ្នា ។ លោកស្រី Park Geun-hye គ្មានលក្ខណៈជាស្រ្តីភេទទេ និងក៏ពុំធ្លាប់រៀបការ ក៏ព្រមទាំងគ្មានកូនចៅដែរ"-នេះ ជាការរៀបរាប់របស់លោក Park Kwang-on អ្នកនាំពាក្យម្នាក់នៃគណបក្សឆ្វេងនិយមកូរ៉េខាងត្បូង។ “ បេក្ខនារីនេះ ក៏ពុំដែលនឹកខ្វល់ខា្វយដែរ ពីរឿងទៅរកមន្ទីរសម្ភព ឬក៏ទៅរកទីកន្លែងសំរាប់ដាក់កូនចៅ មិនដែលស្គាល់ការថែទាំចិញ្ចឹមកូនចៅ ឬ ក៏ ចាយវាយលុយ សំរាប់ទិញម្ហូបអាហារអ្វីឡើយ-នេះជាការបញ្ជាក់បន្ថែមរបស់អ្នកនាំពាក្យដដែលនេះ។
សូមបញ្ជាក់ថាលោកស្រី Park Geun-hye ប៉ាកគុនហ៊ើ ជាកូនស្រីរបស់ លោក Park Chung-hee ប្រធានាធិបតីកាន់អំណាចផ្តាច់ការកូរ៉េខាងត្បូងក្នុងទស្សវត្តន៍ឆ្នាំ១៩៦១-១៩៧៩និងត្រូវស្លាប់ដោយគេធ្វើឃាតដូចជាភរិយារបស់គាត់ដែរ។ លោកស្រី ប៉ាកគុនហ៊ើ ចង់និយាយបង្ហាញពីគុណសម្បត្តិរបស់គាត់ដោយប្រៀបប្រដូចរូបគាត់ទៅនឹងអតីតនាយករដ្ឋមន្ត្រីអង់គ្លេសដ៏ល្បីល្បាញលោកស្រី Magaret Thatcher នៅក្នុងតំបន់អាស៊ីខាងកើត ឬ ក៏លោកស្រី Angela Merkel នាយករដ្ឋមន្ត្រីអាល្លឺម៉ង់នាបច្ចុប្បន្ននេះ។
ការបោះឆ្នោតប្រធានាធិបតីនៅកូរ៉េខាងត្បូង គឹធ្វើឡើងតែមួយជុំ ។ បេក្ខជនណាដែលបានទទួលសំឡេងភាគច្រើននឹងត្រូវជាប់ជាប្រធានាធិបតីនិងកាន់មុខតំណែងប្រធានាធិបតីតែមួយអាណត្តិប៉ុណ្ណោះក្នុងរយៈពេល៥ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ